“Эл деса Навоийни” деб номланган адабий-мусиқий тадбирда улуғ шоирга эҳтиром кўрсатилди

Алишер Навоий! Бу ном қайси даврада, қандай минбарда янграшидан қатъий назар, барча учун севимли, азиз. Чунки ер юзида ўзбек деган буюк миллатни ана шу ном билан билгувчи давлатлар, эл-у элатларда ҳам Навоий, десалар қалбларида эзгу туйғулар жунбушга келгувчи, Навоий даҳосига юксак эҳтиром билан яшагувчи инсонлар бисёр. Мамлакатимизда улуғ шоирга эҳтиром, шоирнинг бебаҳо меросига муҳаббат ҳар бир ватандошимиз учун шон-шараф, фахрдир.

Юртимизнинг барча ҳудудларида айни кунларда бўлиб ўтаётган А.Навоий таваллудининг 579 йиллигига бағишланган маънавий-маърифий, адабий-мусиқий тадбирларда  ҳам улуғ шоир даҳосига беқиёс катта ҳурмат ва эътибор, эҳтиром кўрсатилмоқда.

9 феварль – Алишер Навоий таваллуди куни муносабати билан 22-сонли умумтаълим мактабида бўлиб ўтган адабий-мусиқий тадбирда ўқувчи-ёшларнинг Навоий асарларини қай даражада ўзлаштираётганлари, шу баробарида Навоий асарларидан олган таассуротлари турли саҳна кўринишлари, шоир ғазаллари, рубоий ва туюқлари, маснавий ҳамда мухаммаслари талқинида ўз ифодасини топди.

Мактабнинг она тили ва адабиёт фани ўқитувчиси Насиба Матсафоева раҳбарлигида ташкил этилган, “Эл деса Навоийни” деб номланган тадбирнинг маънавий-маърифий қисмида 9-синф ўқувчилари икки гуруҳ бўлиб ўзаро беллашдилар. Ўқувчилар Алишер Навоийнинг ниҳоятда инсонпарвар, ватанпарвар, элпарвар шахс сифатида юксак обрў-мартабага  эришганлигини саҳна кўринишлари орқали кўрсатиб бердилар.

Йирик давлат ва жамоат арбоби сифатида қилган бунёдкорлик ишлари, мадраса талабалари учун ўз ҳисобидан нафақалар ажратиб, уларни дарсликлар билан таъминлагани, кутубхоналар, маънавият ва маърифат масканлари, кўприклар ҳамда масжидлар қуриб, етим-есирларга, эҳтиёжманд инсонларга кўрсатган беминнат ёрдамлари хусусида ўқувчилар ҳавас ва ҳайрат, ифтихор билан сўзладилар.

Тадбирнинг адабий-бадиий қисмида Чойкўл маданият маркази ходими Раҳима Худойберганова сўзга чиқиб, мактаб ўқувчиларининг Навоий даҳосига юксак эҳтиром ила ташкиллаштирган ушбу тадбири жамиятимизда Навоий асарларининг билимдонлари сафи ошишига хизмат қилишини таъкидлади. Шу билан бирга навоийхонлик кечаларини ташкил этиш анъанага айлангани ёшларнинг онгу тафаккурини юксалтириш, уларни ватанпарварлик, инсонпарварлик ва миллий қадриятларимизга ҳурмат руҳида тарбиялашга хизмат қилаётганини сўзлади. Ўз ўрнида таълим даргоҳларида ўтказилаётган бу каби хайрли ишлар улуғ мутафаккир асарлари мазмунини чуқур англашга, ёшларни Ватанга муҳаббат, юртга садоқат руҳида тарбиялашга, меҳр-оқибат ва ўзаро ҳурмат туйғуларини мустаҳкамлашга хизмат қилишини ҳам айтиб ўтди.

Шундан сўнг, ўқувчи-ёшлар “Навоий ва Гули”, “Навоий ва Ҳусайн Бойқаро” адабий композицияларини маҳорат билан ижро этишди. Навоий ғазаллари, рубоий ва туюқлари асосида баҳри-байтлар айтишиб, тадбирга файз бағишладилар.

Робия Йўлдошева.