Сув тармоқларига ноқонуний уланишлар бўйича назорат тадбирлари ўтказилмоқда
Аҳоли пунктларидаги ичимлик суви тизимлари ягона муҳандислик тармоғи сифатида ишлайди. Шу боис биргина хонадоннинг белгиланган тартибни четлаб ўтиб уланиши бутун кўча ёки маҳалладаги сув босими, сифати ва узлуксизлигига салбий таъсир кўрсатиши мумкин. Шу сабабли тармоқларга уланиш жараёни техник шартлар асосида амалга оширилиши қонунчиликда қатъий белгилаб қўйилган.
Мамлакатимизда сўнгги йилларда коммунал соҳада амалга оширилаётган ислоҳотлар доирасида аҳолини тоза ичимлик суви билан барқарор таъминлаш, мавжуд инфратузилмани асраш ҳамда хизмат кўрсатишда интизомни мустаҳкамлашга алоҳида эътибор қаратилмоқда. Бу йўналишда назорат идораларининг ўрни ҳам ортиб, қоидабузарликларнинг олдини олиш ва уларга ўз вақтида муносабат билдириш устувор вазифага айланди.
Қорақалпоғистон Республикаси қурилиш ва уй-жой коммунал хўжалиги соҳасида назорат қилиш инспекцияси томонидан ичимлик суви ва оқова сув йўналишида 2026 йилнинг январь–ноябрь ойларида бир қатор ишлар амалга оширилди. Хусусан, ичимлик суви таъминоти ва оқова сувларни чиқариб юбориш тармоқларига уланишда қонунчилик талабларига риоя этилишини таъминлаш мақсадида тизимли назорат тадбирлари ўтказилмоқда.
Жорий йилда Қорақалпоғистон Республикаси бўйича ичимлик суви таъминоти ва оқова сувларни чиқариб юбориш тармоқларига ноқонуний уланиш бўйича жами 461 та ҳолат аниқланиб, айбдорларга белгиланган тартибда Ўзбекистон Республикасининг «Маъмурий жавобгарлик тўғрисидаги кодекси» асосида умумий ҳисобда 1 миллиард 898 миллион сўм миқдорида жарималар расмийлаштирилди. Ушбу кўрсаткичлар тармоқларга уланишда белгиланган талабларни четлаб ўтиш ҳолатлари ҳамон учраб турганидан далолат бериб, бу борада назоратни сусайтирмаслик зарурлигини яна бир бор кўрсатади.
Назорат тадбирлари фақат ҳужжатларни ўрганиш билан чекланиб қолмаяпти. Инспекция мутахассислари бевосита жойларга чиқиб, техник шартларнинг қай даражада бажарилаётганини, хонадон ва объектларнинг ичимлик суви ҳамда оқова сув тармоқларига қандай уланганини атрофлича ўрганмоқда. Бу эса мавжуд ҳолатни қоғоздаги маълумотлар эмас, балки амалдаги манзара асосида баҳолаш имконини беради.
Жумладан, Амударё туманидаги Қум ёп овули ҳамда Дўстлик ва Навоий номли маҳаллаларда ана шундай ўрганишлар ташкил этилди. Бундай ўрганишлардан кўзланган асосий мақсад техник шартларда белгиланган талабларнинг бажарилишини назорат қилиш, аниқланган камчиликларни ўз вақтида бартараф этиш ҳамда тармоқларга уланиш жараёнида қонунчилик меъёрларига оғишмай амал қилинишини таъминлашдан иборат. Қайд этиш керакки, эрта аниқланган кичик нуқсонни бартараф этиш унинг кейинчалик авария ёки сув йўқотилиши каби жиддий муаммога айланишининг олдини олади.
Инспекция томонидан бу йўналишдаги назорат тадбирлари изчил давом эттирилмоқда. Тармоқларга уланишда тартиб-интизомнинг қарор топиши, бир томондан, сув таъминоти тизимининг барқарор ишлашини кафолатласа, иккинчи томондан, қонун талабларига амал қилиб келаётган истеъмолчиларнинг ҳақ-ҳуқуқларини ҳимоя қилишга хизмат қилади.
Ҳар бир хонадон ва ташкилотнинг сув тармоғига белгиланган тартибда, техник шартларга тўла риоя қилган ҳолда уланиши умумий инфратузилманинг узоқ муддат бехато ишлашига, исрофгарчилик камайишига ва ҳудуд аҳолисининг сифатли хизматдан тенг баҳраманд бўлишига замин яратади.

▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶