Жисмоний тайёргарликдан ўтган чақирилувчилар ҳарбий қисм вакиллари билан суҳбатлашди
Ҳарбий хизмат ёш йигит ҳаётидаги жиддий синов ва чинакам тобланиш мактаби бўлиб, бу йўлга қадам қўйишдан аввал ҳар бир номзод бир неча босқичли саралашдан ўтади. Мамлакатимизда Қуролли Кучлар сафини жисмонан бақувват, маънан етук ва Ватанга садоқатли ёшлар билан тўлдириш давлат сиёсатининг устувор йўналишларидан бири сифатида белгиланган.
Сўнгги йилларда муддатли ҳарбий хизматга чақирув тизими ҳам изчил такомиллаштирилиб, номзодларни танлашда уларнинг саломатлиги, жисмоний ҳолати, билим даражаси ва шахсий фазилатлари ҳар томонлама ўрганилмоқда. Бу эса хизматга руҳан ва жисмонан тайёр, масъулиятни ҳис қила оладиган йигитлар юборилишини таъминлайди. Хусусан, тиббий кўрик, жисмоний тайёргарлик синовлари ва ҳарбий қисм вакиллари билан суҳбат ана шу саралаш тизимининг асосий бўғинларини ташкил этади.
Айни кунларда Амударё тумани ҳудудида яшовчи 2000–2009 йилларда туғилган ўғил болалар учун 2027 йилги муддатли ҳарбий хизматга чақирув тадбирларига тайёргарлик ишлари қизғин кечмоқда. 2026 йил 10 августдан бошлаб тасдиқланган жадвал асосида чақирув ёшидаги фуқароларни саралаш ва танлаш тадбирлари ўтказилмоқда. Туман Мудофаа ишлари бўлимида жисмоний тайёргарлик синовларидан ўтган чақирилувчилар ҳарбий қисмдан ташриф буюрган вакиллар билан суҳбатга келишди.
Суҳбатни ҳарбий қисм номидан Амударё тумани Мудофаа ишлари бўлими бошлиғи подполковник Шуҳрат Маматов олиб борди. Қайд этиш жоизки, жисмоний тайёргарлик босқичи чақирув жараёнининг муҳим қисми ҳисобланиб, унда йигитларнинг чидамлилиги ва куч-қуввати синовдан ўтказилади. Ушбу босқичдан кейинги суҳбатлар эса чақирилувчини яқиндан билиш, унинг хизматга қанчалик тайёр эканини аниқлаш мақсадида ташкил этилади. Туман Мудофаа ишлари бўлими вакиллари ҳар бир номзод билан алоҳида мулоқот қилиб, унинг маълумоти, оилавий шароити, қизиқишлари ва ҳарбий хизматга муносабатини ўрганди, шу асосда йигитнинг қайси йўналишда хизмат қилиши мақсадга мувофиқ экани ҳақида хулоса чиқарилади.
Таъкидлаш керакки, суҳбатнинг холис ва пухта ўтказилиши ҳар бир номзоднинг келгуси хизмати самарали кечишида муҳим аҳамиятга эга. Мазкур босқич натижасида саралаб олинган чақирилувчилар кейинги саралаш босқичларида иштирок этишади. Саралашнинг барча босқичларидан ўтган йигитлар эса белгиланган тартибда хизмат жойларига жўнатилади ва у ерда йигитлик бурчини ўтаб, ҳарбий касб сирларини ўрганишни бошлайди.
Чақирув жараёнининг ҳар бир босқичи масъулият билан ва очиқ ташкил этилиши армия сафига тўғри танланган, ўз бурчини англаган ёшлар қўшилишига хизмат қилади. Ушбу суҳбатдан ўтган йигитлар учун эса бу — оддий расмиятчилик эмас, балки ҳарбий қасамёд ва Ватан ҳимояси сари ташланган яна бир аниқ қадамдир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
