Чекка ҳудудлар аҳолиси ҳам тоза ичимлик суви билан таъминланмоқда

Инсоннинг кундалик ҳаётида ҳеч нарса тоза ичимлик сувининг ўрнини боса олмайди. Шу боис аҳолини сифатли ичимлик суви билан таъминлаш, мавжуд инфратузилмани модернизация қилиш ва хизматлар сифатини ошириш мамлакатимизда давлат сиёсати даражасидаги устувор вазифалардан бири сифатида белгиланган бўлиб, бу борада халқаро молия институтларининг грант ва кредит маблағлари, шунингдек давлат инвестиция дастурлари асосида кенг кўламли лойиҳалар амалга оширилмоқда.

Айниқса, марказлашган ичимлик суви таъминоти билан қамраб олинмаган маҳаллаларда янги тармоқлар қуришга алоҳида эътибор қаратилмоқда. Ўз навбатида мутасадди ташкилотлар томонидан сув тармоқлари янгидан тортилган ҳудудларда шартномавий муносабатларни тартибга солиш, аҳолини расмий хизматлар билан қамраб олиш ҳамда тўлов интизомини мустаҳкамлаш юзасидан ўрганиш ишлари олиб борилди.

Жумладан, Қорақалпоғистон Республикаси Қурилиш ва уй-жой коммунал хўжалиги соҳасида ҳудудий назорат қилиш инспекцияси томонидан йил бошидан буён 49 та маҳаллада хонадонма-хонадон ўрганишлар амалга оширилиб, фуқароларга ичимлик сувидан оқилона фойдаланиш, хизматлардан қонуний асосда фойдаланишнинг аҳамияти, шартнома тузиш тартиби ҳамда мавжуд имтиёз ва қулайликлар ҳақида кенг тушунтириш ишлари олиб борилди. Натижада 91 та истеъмолчи билан ичимлик суви таъминоти бўйича расмий шартномалар тузилди. Бу эса хизматларнинг шаффоф ва тизимли йўлга қўйилишига, коммунал хизматлар сифатини янада оширишга замин яратади.

Эътиборлиси, амалга оширилган ишлар натижасида 395 нафар аҳоли марказлашган ичимлик суви таъминоти хизмати билан қамраб олинди. Бу орқали фуқароларнинг турмуш шароити яхшиланиб, санитария-гигиена ҳолатини таъминлаш, аҳоли саломатлигини муҳофаза қилиш ва экологик барқарорлик борасида муҳим қадам ташланди.

Шу билан бирга, Ўзбекистон Республикаси Президентининг 2019 йил 9 апрель кунги “Осиё тараққиёт банки иштирокида “Ўзбекистоннинг ғарбий қисмида ичимлик сув таъминоти тизимларини ривожлантириш” лойиҳасини амалга ошириш чора-тадбирлари тўғрисида”ги қарорига мувофиқ Нукус тумани Бақаншақли овул фуқаролар йиғини ҳудудидаги Абадан аҳоли пунктини ичимлик суви билан таъминлаш мақсадида “Абадан” сув тақсимлаш иншооти янгидан қурилди ҳамда 6,5 километр ичимлик суви тармоқлари тортилди. Ушбу ишлар натижасида овул ҳудудида истиқомат қилувчи 150 га яқин хонадоннинг ичимлик суви таъминоти сезиларли даражада яхшиланди.

Мутахассисларнинг таъкидлашича, ичимлик суви инфратузилмасини ривожлантириш нафақат аҳолини тоза сув билан таъминлайди, балки ҳудудларнинг ижтимоий-иқтисодий ривожланишига ҳам ижобий таъсир кўрсатади. Зеро, сув — ҳаёт манбаи бўлиб, инсон саломатлиги ва фаровон турмушининг энг муҳим омилларидан бири саналади. Келгусида ҳам бу каби амалий ишлар изчил давом эттирилиб, янги лойиҳалар асосида янада кўпроқ аҳоли пунктларини марказлашган ичимлик суви тармоқларига улаш режалаштирилган.