Chekka hududlar aholisi ham toza ichimlik suvi bilan taʼminlanmoqda

Insonning kundalik hayotida hech narsa toza ichimlik suvining oʻrnini bosa olmaydi. Shu bois aholini sifatli ichimlik suvi bilan taʼminlash, mavjud infratuzilmani modernizatsiya qilish va xizmatlar sifatini oshirish mamlakatimizda davlat siyosati darajasidagi ustuvor vazifalardan biri sifatida belgilangan boʻlib, bu borada xalqaro moliya institutlarining grant va kredit mablagʻlari, shuningdek davlat investitsiya dasturlari asosida keng koʻlamli loyihalar amalga oshirilmoqda.

Ayniqsa, markazlashgan ichimlik suvi taʼminoti bilan qamrab olinmagan mahallalarda yangi tarmoqlar qurishga alohida eʼtibor qaratilmoqda. Oʻz navbatida mutasaddi tashkilotlar tomonidan suv tarmoqlari yangidan tortilgan hududlarda shartnomaviy munosabatlarni tartibga solish, aholini rasmiy xizmatlar bilan qamrab olish hamda toʻlov intizomini mustahkamlash yuzasidan oʻrganish ishlari olib borildi.

Jumladan, Qoraqalpogʻiston Respublikasi Qurilish va uy-joy kommunal xoʻjaligi sohasida hududiy nazorat qilish inspektsiyasi tomonidan yil boshidan buyon 49 ta mahallada xonadonma-xonadon oʻrganishlar amalga oshirilib, fuqarolarga ichimlik suvidan oqilona foydalanish, xizmatlardan qonuniy asosda foydalanishning ahamiyati, shartnoma tuzish tartibi hamda mavjud imtiyoz va qulayliklar haqida keng tushuntirish ishlari olib borildi. Natijada 91 ta isteʼmolchi bilan ichimlik suvi taʼminoti boʻyicha rasmiy shartnomalar tuzildi. Bu esa xizmatlarning shaffof va tizimli yoʻlga qoʻyilishiga, kommunal xizmatlar sifatini yanada oshirishga zamin yaratadi.

Eʼtiborlisi, amalga oshirilgan ishlar natijasida 395 nafar aholi markazlashgan ichimlik suvi taʼminoti xizmati bilan qamrab olindi. Bu orqali fuqarolarning turmush sharoiti yaxshilanib, sanitariya-gigiyena holatini taʼminlash, aholi salomatligini muhofaza qilish va ekologik barqarorlik borasida muhim qadam tashlandi.

Shu bilan birga, Oʻzbekiston Respublikasi Prezidentining 2019-yil 9-aprel kungi “Osiyo taraqqiyot banki ishtirokida “Oʻzbekistonning gʻarbiy qismida ichimlik suv taʼminoti tizimlarini rivojlantirish” loyihasini amalga oshirish chora-tadbirlari toʻgʻrisida”gi qaroriga muvofiq Nukus tumani Baqanshaqli ovul fuqarolar yigʻini hududidagi Abadan aholi punktini ichimlik suvi bilan taʼminlash maqsadida “Abadan” suv taqsimlash inshooti yangidan qurildi hamda 6,5 kilometr ichimlik suvi tarmoqlari tortildi. Ushbu ishlar natijasida ovul hududida istiqomat qiluvchi 150 ga yaqin xonadonning ichimlik suvi taʼminoti sezilarli darajada yaxshilandi.

Mutaxassislarning taʼkidlashicha, ichimlik suvi infratuzilmasini rivojlantirish nafaqat aholini toza suv bilan taʼminlaydi, balki hududlarning ijtimoiy-iqtisodiy rivojlanishiga ham ijobiy taʼsir koʻrsatadi. Zero, suv — hayot manbai boʻlib, inson salomatligi va farovon turmushining eng muhim omillaridan biri sanaladi. Kelgusida ham bu kabi amaliy ishlar izchil davom ettirilib, yangi loyihalar asosida yanada koʻproq aholi punktlarini markazlashgan ichimlik suvi tarmoqlariga ulash rejalashtirilgan.