10 oy davomida Qoraqalpogʻiston boʻyicha 39 ta holatda ichimlik suvi koʻrsatkichlari belgilangan talablarga javob bermasligi aniqlandi

Toza ichimlik suvidan uzluksiz foydalanish imkoniyati bugungi kunda aholi turmush darajasini belgilaydigan asosiy koʻrsatkichlardan biri hisoblanib, davlat siyosatida bu masala inson salomatligi va ijtimoiy barqarorlik bilan bogʻliq ustuvor yoʻnalish sifatida qaraladi. Shu bois sohada nazorat mexanizmlari izchil takomillashtirilmoqda.

Quvvati oshib borayotgan suv taʼminoti tizimida faqat quvurlarni yangilash yoki inshootlar qurish yetarli emas, xonadonga yetib borgan suvning kimyoviy va bakteriologik jihatdan xavfsizligini aniqlaydigan doimiy monitoring tizimi ham shu qadar zarur. Chunki suv manbaidan isteʼmolchiga qadar boʻlgan yoʻlda uning sifati turli omillar taʼsirida oʻzgarishi mumkin, bu esa faqat laboratoriya tahlili orqali aniqlanadi. Aynan shu vazifa maxsus nazorat organlariga yuklatilgan.

Qoraqalpogʻiston Respublikasi qurilish va uy-joy kommunal xoʻjaligi sohasida nazorat qilish inspektsiyasi tomonidan 2026-yil yanvar-oktyabr oylarida bu borada salmoqli amalga oshirildi.

Hisobot davrida Inspektsiya Qoraqalpogʻiston Respublikasi Sanitariya-epidemiologik osoyishtalik va jamoat salomatligi qoʻmitasi bilan birgalikda ichimlik suvi sifati boʻyicha 1498 ta tahlil oldi. Tahlillar isteʼmolchilarga yetkazib berilayotgan suvning milliy standart talablariga muvofiqligini aniqlash maqsadida oʻtkazildi. Ikkita idoraning hamkorligida ish olib borilishi tahlil natijalarining xolisligini taʼminlaydi: namuna olish va laboratoriya xulosasi turli vakolatli tuzilmalar ishtirokida rasmiylashtiriladi.

Tahlil natijalariga koʻra, jami 39 ta holatda ichimlik suvi koʻrsatkichlari belgilangan talablarga javob bermagani, yaʼni salbiy holat mavjudligi aniqlandi. Bu kamchiliklar respublikaning sakkiz hududida qayd etilgan boʻlib, ularning tabiati bir xil emas. Umumiy tahlillar soniga nisbatan olinganda salbiy natijalar ulushi unchalik katta boʻlmasa-da, ichimlik suvi masalasida har bir holat aholi salomatligiga bevosita daxldor boʻlgani uchun eʼtibordan chetda qoldirilmaydi.

Xususan, kimyoviy koʻrsatkichlar boʻyicha nomuvofiqlik Nukus tumanida 2 ta, Toʻrtkoʻl tumanida 3 ta, Xoʻjayli tumanida 6 ta, Taxiatosh tumanida 17 ta, Qoʻngʻirot tumanida 5 ta va Ellikqalʼa tumanida 2 ta obʼektda qayd etildi. Eng koʻp salbiy natija Taxiatosh tumaniga toʻgʻri keldi.

Bakteriologik koʻrsatkichlar boʻyicha esa Qoraoʻzak tumanida 2 ta va Nukus shahrida 2 ta salbiy holat aniqlandi. Maʼlumki, bakteriologik ifloslanish ichimlik suvi orqali yuqadigan kasalliklar tarqalishi xavfini tugʻdirgani uchun bu turdagi nomuvofiqlik alohida eʼtiborni talab qiladi.

Bu kabi salbiy holatlarning oldini olish maqsadida Xoʻjayli tumani Bayterak mahallasi hududidagi Zulfiya koʻchasida suvning kimyoviy va bakteriologik namunalari olindi.

Oʻtgan 10 davomida aniqlangan kamchiliklar eʼtiborsiz qoldirilmadi: mazkur holatlar yuzasidan “Qoraqalpoq suv taʼminoti” aktsiyadorlik jamiyatiga nuqsonlarni bartaraf etish boʻyicha koʻrsatma kiritildi. Koʻrsatma ijrosi nazoratga olinib, tegishli choralar amalga oshirildi.

Bartaraf etish ishlari doirasida suv tarmoqlari tozalandi, shuningdek, obʼektlardagi uskunalarni yuvish ishlari bajarildi. Bu kabi texnik tadbirlar suv sifatini darhol yaxshilash bilan birga, muammoning takrorlanish ehtimolini kamaytirishga ham xizmat qiladi.

Qayd etish joizki, monitoringning asosiy qiymati aniqlangan kamchiliklar sonida emas, ularning har biri boʻyicha amaliy chora koʻrilganida namoyon boʻladi. Oʻtgan oʻn oy natijalari shuni koʻrsatadiki, nazorat va tezkor bartaraf etish bir tizimga birlashtirilganda, aholi xonadoniga yetib boradigan suvning sifati doimiy ravishda meʼyor darajasida boʻladi. Qoraqalpogʻiston Respublikasi qurilish va uy-joy kommunal xoʻjaligi sohasida nazorat qilish inspektsiyasi tomonidan yil oxiriga qadar tahlillar davom ettirilishi, shuningdek salbiy natija koʻp qayd etilgan hududlarda nazoratning kuchaytirilishi rejalashtirilmoqda.