Texnikumda Oʻzbekiston Agrosanoat majmui xodimlari kasaba uyushmasi tashabbusi bilan yigʻilish oʻtkazildi

Amudaryo tumanidagi 1-sonli texnikumda Oʻzbekiston Agrosanoat majmui xodimlari kasaba uyushmasi tomonidan yigʻilish oʻtkazildi. Unda uyushma raisi oʻrinbosari Nodirbek Nazarov, Qoraqalpogʻiston Respublikasi boʻyicha masʼul xodim Yergʻali Sitnazarov, texnikum direktori Davronbek Abdulayev, shuningdek, Amudaryo, Toʻrtkoʻl, Ellikqalʼa va Beruniy tumanlarining kasaba uyushmasi raislari hamda boshlangʻich qoʻmita vakillari, oʻquvchi yoshlar ishtirok etdi.

Yigʻilishni Yergʻali Sitnazarov ochib, ishtirokchilar eʼtiborini Oʻzbekiston Kasaba uyushmalari federatsiyasi raisi, senator Qudratulla Rafiqovning qalamiga mansub «Millat shavkati» kitobiga qaratdi. Asarda «Gʻarbda Rim, Sharqda Samarqand» deya eʼtirof etilgan koʻhna shaharning qariyb 3000 yillik ulugʻvor tarixi, XIX va XX asrlardagi inqirozli davrlari hamda chinakam maʼnaviy va iqtisodiy uygʻonishi qanday kechgani haqida batafsil maʼlumot beriladi.

Kitobda 2001 va 2003-yillar oraligʻidagi tarixiy burilish pallasi – davlatimiz rahbari, oʻsha vaqtlarda Samarqand viloyati hokimi boʻlgan Shavkat Mirziyoyevning viloyatdagi faoliyati chuqur tahlil qilingan. Oʻsha davrda viloyat iqtisodiyoti ogʻir ahvolda boʻlib, 4 millionga yaqin aholining atigi 7 foizi tadbirkorlik bilan shugʻullanar edi. Ushbu murakkab vaziyatda islohotlar dastlab shahar gigiyenasi va ekologiyasini tiklashdan boshlangan. Birgina hokimlik atrofidan 70 ta yuk mashinasida chiqindi olib chiqilgani hududdagi haqiqiy manzarani aks ettirgan edi. Aynan shu davrda shahar sektorlarga boʻlinib, bugungi kundagi markazlashgan boshqaruv tizimining ilk namunasi yaratilgan.

Ijtimoiy sohadagi oʻzgarishlar doirasida koʻp yillar hujjatsiz yashab kelgan aholi qatlamiga pasportlar berilgani asarda alohida qayd etib oʻtilgan. Taʼlim tizimidagi inqirozni bartaraf etish maqsadida keskin choralar koʻrilib, viloyatdagi 1050 ta maktabning moddiy-texnik bazasini yaxshilash maqsadida homiylik asosidagi yordamchi xoʻjaliklar tizimi joriy etilgan. Qisqa vaqt ichida 20 dan ortiq sport inshootlari foydalanishga topshirilgan.

Iqtisodiy koʻrsatkichlar ham keskin oʻsib, sanoat mahsulotlari ishlab chiqarish 107 foizni, xalq isteʼmoli mollari esa 112 foizni tashkil etgan. Qishloq xoʻjaligida tuproq unumdorligini oshirish maqsadida har gektar yerga 20 tonnadan mahalliy oʻgʻit berish yoʻlga qoʻyilgan, Toyloq tumanida gektaridan oʻrtacha 50 tsentnergacha gʻalla hosili olinishiga erishilgan. Bu davrda nafaqat iqtisodiy, balki ulkan maʼnaviy uygʻonish ham yuz bergan. Registon, Shohi Zinda, Amir Temur kabi qator tarixiy obidalar tarixiy qiyofasiga mos tarzda tiklangan va Imom Moturidiy hazratlarining qabri topilib, maʼnaviy hayotda ulkan voqelikka aylangani mazkur asarda alohida eʼtirof etilgan.

Yigʻilishning ikkinchi qismida bevosita kasaba uyushmasi faoliyatiga doir muhim tashkiliy masalalar ham koʻrib chiqildi. Unda 4 ta tuman vakillari ishtirokida jamoa shartnomalarining ijrosi, ularning bajarilishi ustidan nazorat oʻrnatish va xodimlar huquqlarini himoya qilish mexanizmlari atroflicha muhokama qilindi.

Mazkur uchrashuv tarixiy xotirani mustahkamlash, Yangi Oʻzbekiston poydevori qanday yaratilganini chuqur anglash va mehnatkashlarning ijtimoiy-iqtisodiy manfaatlarini taʼminlash yoʻlidagi muhim amaliy qadam boʻldi.