Qoraqalpogʻiston Respublikasi Joʻqorgʻi Kengesi Raisi Amanbay Orinbayev boshchiligida Respublikamiz faollari Mangʻit suv tozalash inshooti faoliyati bilan tanishdilar

Oʻzbekiston Respublikasi mustaqilligining 35 yilligi arafasida mamlakatimizning barcha hududlarida bunyodkorlik va obodonlashtirish ishlari yangi bosqichga koʻtarildi. Yurtimizning har bir burchagida odamlar turmush darajasini yaxshilashga, hayot sifatini oshirishga qaratilgan yirik loyihalar amalga oshirilmoqda. Aynan shunday ezgu ishlar qatorida Qoraqalpogʻistonda ishga tushirilgan yirik obʼektlardan biri — Amudaryo tumanidagi “Mangʻit” suv tozalash inshooti boʻldi.

Toza ichimlik suvi — bu nafaqat kundalik ehtiyoj, balki inson salomatligi va farovonligining asosiy garovi. Shu bois ushbu inshootning foydalanishga topshirilishi tuman aholisi uchun haqiqiy quvonch manbaiga aylandi. Qoraqalpogʻiston Respublikasi Joʻqorgʻi Kengesi Raisi Amanbay Orinbayev boshchiligida Respublikamiz faollari va nuroniylar bu yerda amalga oshirilgan ishlar bilan yaqindan tanishdi. Mehmonlar inshootning zamonaviy imkoniyatlari, qurilish jarayonida qoʻllanilgan ilgʻor yechimlar hamda loyihaning aholi hayotiga beradigan samarasi haqida batafsil maʼlumot oldi.

Umumiy qiymati 167,7 milliard soʻm boʻlgan loyiha doirasida sutkasiga 40 ming kub metr suvni tozalash quvvati yaratildi. Bu — mintaqa miqyosidagi salmoqli koʻrsatkich boʻlib, tumanning uzoq yillik ehtiyojini qoplashga xizmat qiladi. Shu bilan birga, loyiha doirasida 3 ta ichimlik suvi inshooti hamda 300 kilometrdan ziyod suv tarmoqlari yangilandi. Ushbu bunyodkorlik ishlari natijasida Amudaryo tumanida markazlashgan ichimlik suvi bilan taʼminlanish darajasi 80 foizga yetkazildi.

Aytish joizki, ushbu natijalar bir kunda emas, izchil va rejali mehnat evaziga qoʻlga kiritildi. Soʻnggi yillar davomida mintaqada “Amudaryo tumanining ichimlik suv taʼminotini yaxshilash” loyihasi bosqichma-bosqich amalga oshirib kelinmoqda. Loyiha doirasida tuzilgan shartnoma asosida 3 ta yirik ichimlik suvi obʼekti hamda uzunligi 300 kilometrdan ortiq boʻlgan ichimlik suvi tarmoqlarini yangidan qurish va rekonstruktsiya qilish ishlari jadal olib borildi. Maqsad — tumandagi har bir xonadonga toza suv yetkazish edi. Mana shu maqsad yoʻlida qilingan izchil harakatlar bugun oʻz samarasini bermoqda.

Loyihaning texnik va muhandislik imkoniyatlari ham alohida eʼtiborga molikdir. Mazkur zamonaviy inshoot sutkasiga 40 ming kub metr ichimlik suvini tozalash quvvatiga ega. Ayni kunlarda obʼektda barcha qurilish va montaj ishlari yuqori sifat darajasida toʻliq yakuniga yetkazilgan. Stantsiya eng soʻnggi rusumdagi zamonaviy suv tozalash texnologiyalari bilan jihozlangan. Bu esa tozalanayotgan suv sifatining yuqori boʻlishini, uzluksiz va ishonchli taʼminotni kafolatlaydi. “Mangʻit” suv tozalash inshooti hamda unga tutash ichimlik suvi tarmoqlarining toʻliq foydalanishga topshirilishi natijasida tumandagi isteʼmolchilarni toza va markazlashgan ichimlik suvi bilan taʼminlash darajasini 80 foizga yetkazish rejalashtirilgan.

Loyihaning aynan bayram arafasida ishga tushirilishi tuman aholisi uchun munosib tuhfa boʻldi. Endilikda yillar davomida kutilgan orzu ushalib, minglab oilalar xonadonlariga toza suv kirib keladi. Bu — mustaqillik yillarida xalqimiz manfaati yoʻlida qilinayotgan ishlarning amaliy ifodasidir.

Taʼkidlash oʻrinliki, bayram arafasida Qoraqalpogʻiston Respublikasining oʻzida jami 12 ta yirik obʼekt aholi xizmatiga topshirildi. Ularning har biri mintaqa iqtisodiyoti va ijtimoiy sohasini rivojlantirishga, aholi turmush sharoitini yaxshilashga xizmat qiladi. Bu koʻrsatkichlarning ortida esa davlatimiz va hukumatimizning Qoraqalpogʻistonga qaratilayotgan yuksak eʼtibori, minglab mutaxassis va quruvchilarning fidokorona mehnati turadi.

Xulosa oʻrnida shuni aytish mumkinki, mustaqilligimizning 35 yilligi shunchaki tarixiy sana emas, balki amaliy natijalar bilan nishonlanayotgan bayramga aylandi. “Mangʻit” suv tozalash inshooti kabi obʼektlar mamlakatimizda inson qadri va farovonligi eng oliy mezon ekanini yana bir bor koʻrsatmoqda. Bunday bunyodkorlik ishlarining uzluksiz davom ettirilishi esa xalqimizning ertangi kuni yanada yorqin boʻlishidan darak beradi.