64-сонли мактаб ўқитувчиси “Йил ўқитувчиси” кўрик-танловининг Қорақалпоғистон Республикаси босқичи ғолиби бўлди

Маълумки, ўқувчининг билим даражаси кўп ҳолларда унга дарс берадиган муаллимнинг тайёргарлиги ва масъулият ҳиссига боғлиқ бўлади. Педагогнинг касб маҳоратини холис баҳолаш ҳамда унинг меҳнатини моддий рағбатлантириш тизими сўнгги йилларда таълим соҳасидаги ўзгаришларнинг ажралмас қисмига айланди, зеро аттестация, тоифа ва устама механизмлари ўқитувчини доимий изланишга, ўз устида тинимсиз ишлашга ундайдиган амалий омил ҳисобланади.

Мамлакатимизда 1 октябрь — Ўқитувчи ва мураббийлар куни нишонланиши олдидан анъанавий тарзда ўтказиладиган кўрик-танловлар эса соҳанинг етакчи вакилларини аниқлаш, уларнинг тажрибасини кенг жамоатчиликка танитиш ва ёш мутахассислар учун ўрнак яратиш имконини беради. Хусусан, “Йил ўқитувчиси” кўрик-танлови ҳам йиллар давомида шу вазифани бажариб келмоқда.

Яқинда жорий йилги “Йил ўқитувчиси” кўрик-танловининг Қорақалпоғистон Республикаси босқичи якунланиб, ғолиблар аниқланди. Уларнинг сафида Амударё туманидаги 64-сонли мактаб ўқитувчиси Нодира Раҳимова ҳам бор бўлиб, у республика босқичида муваффақият қозонган 17 нафар педагог қаторидан жой олди.

Нодира Раҳимова 1986 йилда Оқ Олтин овулида таваллуд топган. У 2010 йилда Тошкент давлат педагогика университетини тамомлаб, “Миллий истиқлол ғояси ва фалсафа асослари” мутахассислиги бўйича олий маълумот эгаси бўлган. Унинг педагоглик йўли ана шу билим даргоҳида олган назарий тайёргарлик асосида шаклланди.

Айтиш жоизки, Нодира Раҳимова 64-сонли мактабга 2019 йилда ишга кирган ва қисқа вақт ичида жамоада ўз ўрнини топган, талабчанлиги, иқтидори ҳамда интилувчанлиги билан ҳам ҳамкасблари, ҳам ўқувчилар эътиборига тушган педагоглардан бирига айланган. Педагогик фаолиятда изчиллик ва масъулият, айниқса, тарбиявий йўналишдаги фанларда алоҳида аҳамият касб этади.

Ўқитувчи ўз малакасини изчил ошириб борган ҳолда ҳуқуқ ва тарбия фанларидан олий тоифага эга бўлди. Бу эса дарс машғулотларини замонавий талаблар асосида ташкил этиш, ўқувчиларда ҳуқуқий онг ва маданиятни шакллантириш борасидаги изланишларининг натижаси ҳисобланади. Қайд этиш жоизки, олий тоифа педагогга нафақат обрў, балки катта масъулият ҳам юклайди.

Шу билан бирга, жорий йилнинг баҳорги аттестациясида у тарбия фанидан 88 балл тўплаб, 70 фоизлик устамага сазовор бўлди, ҳуқуқ фанидан эса 100 фоизлик вазир устамасини қўлга киритди — бу кўрсаткичлар педагогнинг назарий ва методик тайёргарлиги юқори эканини кўрсатади.

Мактаб жамоаси Нодира Раҳимовани ўз фахри деб ҳисоблайди, чунки битта ўқитувчининг республика миқёсидаги эътирофи бутун муассасанинг таълим сифати, устоз-шогирд анъаналари ва жамоавий меҳнати юксак даражада йўлга қўйилганидан далолат беради. Ҳозирда муассасада фаолият юритаётган ўқитувчилар учун ҳам бу натижа ўзига хос мезон вазифасини ўтайди.

Ўз навбатида биз ҳам Нодира Раҳимовани Қорақалпоғистондаги йилнинг энг фаол ўқитувчилари сафидан жой олгани билан табриклаб, жамоадаги барча ўқитувчилар ва юртимиздаги устоз ҳамда мураббийларни яқинлашиб келаётган касб байрами билан муборакбод этамиз. Барча устоз ва мураббийларга мустаҳкам соғлик, сабр-бардош, шогирдларининг камолини кўриб, давлатимиз ва жамиятимиз эъзозида юриш бахти насиб этишига тилакдошмиз.