ЖУМУРТОВ ШАҲАРЧАСИ ОБОД МАСКАНГА АЙЛАНМОҚДА

“Обод қишлоқ” давлат дастури доирасида Жумуртов шаҳарчасида ҳам кенг кўламли қурилиш ва ободонлаштириш ишлари амалга оширилмоқда. Айни кунларда ушбу масканда қурилиш ва таъмирлаш ишлари жадаллик билан давом этмоқда.

17 февраль куни туманнинг энг чекка ҳудуди бўлган ушбу шаҳарчада амалга оширилаётган ишлар билан танишиш, дуч келаётган муаммоларни ўрганиб, бартараф этилишига кўмаклашиш мақсадида Президентнинг тумандаги Халқ қабулхонаси бошлиғи Эркин Ражабов, туман ҳокими ўринбосари Жасур Норимов, 3-сектор раҳбари, туман Ички ишлар бўлими бошлиғи Улуғбек Худойбергановлар ташриф буюрди. 

Жумуртов шаҳарчасида жойлашган ижтимоий соҳа объектлари ҳолатини яхшилаш мақсадида режага кўра, ҳудуддаги 43-, 63-, 72-сонли мактаблар ва шу мактаб филиали биноларида мукаммал таъмирлаш ишлари амалга оширилади. Аҳолига қулайлик яратиш мақсадида эҳтиёжга кўра янгидан мактабгача таълим ташкилоти биноси қурилади.

Шунингдек, шаҳарча фуқаролар йиғинининг маъмурий биносида таъмирлаш ишлари амалга оширилади. Ҳудуддаги инфратузилма объектлари ҳолатини яхшилаш мақсадида эса автомобиль ва ички кўча йўлларида ҳам таъмирлаш ишлари бажарилади. Дастур доирасида шаҳарчада 5,35 км. узунликдаги ички кўча йўллари ҳамда шаҳарчага олиб келувчи асосий 4р160 “Куюк кўпир овули – Жумуртов каръери” автомобиль йўллари таъмирланади.

Шунингдек, ушбу автомобиль йўллари бўйига 20 та тунги кўча ёритиш чироқларини ўрнатиш, 44 та таянч устунларини реконструкция қилиш, 19,3 км узунликдаги электр тармоқларини, 5 та трансформатор пунктларини мукаммал ва жорий таъмирлаш ишларини амалга ошириш кўзда тутилган.

Аҳолига тоза ичимлик сувини етказиб бериш мақсадида ҳудудга янгидан 2 та сув тарқатиш шохобчаси қурилади. Шаҳарча ҳудудидаги якка тартибдаги турар жойлар ҳолатини яхшилаш мақсадида 38 та уйнинг том қисми таъмирланади, 120 та уйнинг фасад қисми, 14 та уйнинг дарвозаси қайта тузатилади. Шунингдек, 20 та тўсиқ деворлар янгидан қурилиб, 20 тасида таъмирлаш ишлари амалга оширилади.

Ундан ташқари, шаҳарча ҳудудини ободонлаштириш, янада файзли масканга айлантириш мақсадида манзарали ва мевали дарахтлар, турли гуллар кўчатлари экилади. Мавжуд дарахтларга шакл берилиб, ҳудуд қиёфаси тубдан ўзгартирилади.

Аҳолининг яшаш шароитини яхшилаш, қулайлик яратиш мақсадида ҳудудда тадбиркорликни ривожлантиришга ҳам эътибор қаратилади. Дастур доирасида шаҳарчада 4 та савдо мажмуаси ташкил қилиниб, янги иш ўринларини ташкил этиш, кундалик рўзғорда зарур бўладиган маҳсулотларни арзон нархларда шу ердан харид қилишларига имкон яратиш мўлжалланмоқда.

Шаҳарчага ташриф буюрган масъуллар ҳудудда амалга оширилаётган бунёдкорлик ишлари билан танишдилар. Ҳар бир объектда бажарилаётган қурилиш, таъмирлаш ишларини яқиндан ўргандилар. Мавжуд ва аниқланган камчиликларни бартараф этиш бўйича мутасаддиларга тегишли топшириқлар бериб, ҳал этилишига кўмаклашдилар.

Айни кунларда Жумуртов шаҳарчаси аҳолисининг кайфияти баланд. Шаҳарчанинг обод гўшага айланаётганидан мамнун бўлган ҳолда ҳар бири ўз хонадони, ўз маҳалласида кўтаринки руҳ билан ободонлаштириш ишларини амалга оширишмоқда. Шу масканнинг янада фаровон, гўзал қиёфа касб этишига имкон борича ҳисса қўшишга ҳаракат қилишмоқда.

Озода Худойберганова.