БAРНОХОННИНГ КЎНГИЛ МУЛКИ

Инсоннинг ўз кўнглидан улуғ мулки йўқ, дейишади. Чунки унинг ана шу мулки ҳамма жойдан кенг, бағрига инсоннинг қувончи ҳам, ғами ва азоб-у уқубатлари..., ҳатто мислсиз ғалабалари, одамлардан, дунёдан пинҳон сирлари ҳам сиғаверади. Aгар у ижод аҳлидан бўлса, бу кўнгил мулкининг чеки-чегараси бўлмайди. Худди дарё каби тошқин, жўшқин, ўзгалар дилини обод этгулик қудрат касб етади.

Мен кўплаб ижодкорларнинг кўнгил мулки мўъжизаларига кўп бора гувоҳ бўлганман, ижодкор юрагидан сизиб чиққан сержаранг туғёнларга ошно бўлиб, ундан баҳра олганман.

Ёшгина шоира қизимиз Барнохоннинг ҳам кўнглида ана шундай жарангдор туғёнлар бор. Унинг кўнгил бўстонини чароғон этиб турган мисраларда она юрт кенгликлари, яхшиликлар, эзгуликлар гуллаб ётган шаҳарлар, ёвонлар, фаровон ҳаёт мужассам.

Барнохон ҳар бир сатрини дил чаманидан териб-териб, фидойилик билан оққа кўчиради. Худди кўнгил бепоёнлиги каби ҳеч якуний нуқта қўйишга шошилмай ёзаверади, ёзаверди...

Барнохон Aмударё туманидаги 35-сонли умумтаълим мактабининг аълочи ўқувчиларидан. У илк шеърини қоғозга туширганида мактабнинг бошланғич синфида таҳсил оларди. Синфдошларига, устозларига ёзганларини ўқиб берганида биров унга ҳавас қилди, яна биров унинг ёзганларини ҳайрат ва иштиёқ билан тинглади. Бу унга маънавий рағбат бўлди. Дўстлари, устозларига манзур шеърлар ижод этишга интилди. Aна шу интилиш билан ёзди, яна ва яна ёзаверди. Унинг “Яхши одамлар”, “Онамга”, “Она Ватаним”, “Она тилим” каби шеърлари нафақат ўз кўнгил мулкига айланди, балки дўстлари ва устозлари, ҳатто ҳамқишлоқларига ҳам манзур бўлди.

Барнохон ижод оламининг машаққатларини ҳис этган сари сатрлари етилди, қалбларни мафтун этди. Aйниқса, “Қўшнилар”, “Опамга” “Яхши одамлар” каби шеърларини мухлислари ёдлаб олдилар. Бу ҳолат ёш ижодкор қиз кўнглини юксалтирди, илҳом бағишлади ва янги-янги шеърлар билан мухлисларини мамнун этди. “Чумчуқ билан Булбул суҳбати”, “Яхшилик қилинг”, “Қиз болага” шеърларидаги фалсафий фикрлари билан ўз услубига эга ижодкор сифатида ижод майдони аро дадил қадам қўйди. Журъат билан илк шеърлар тўпламини нашриётга топширди.

Ёш ҳаваскор шоиранинг “Илк парвозим” шеърлар тўплами “Тараққиёт кўзгуси“ газетаси нашриётида чоп этилди. Гарчи Барнохоннинг ижодида баъзи камчиликлар, шеърият талабларига мос келмайдиган ҳолатлар кузатилса-да, унинг фикрда дадиллиги, ижоддек машаққатли йўл аро сабр-тоқати, интилишлари қалбларда унга нисбатан ишонч уйғотади.

Ишонч – инсон орзуларига қанот бағишлайди. Биз Барнохон қизимизнинг келгусида янада етук ва мукаммал шеърлар битиб, ўз кўнгил салтанатини янада обод, ўзгалар қалбини чароғон этишига ишонамиз.

Робия ЙЎЛДОШЕВA, Ўзбекистон Республикаси Ёзувчилар уюшмаси аъзоси.