15 май – Халқаро оила куни. ОИЛА – МУҚАДДАС ДАРГОҲ

Киши умрининг асосий қисми – унинг дунёга келиши, ўсиб-улғайиши, вояга етиши, турмуши оила билан боғлиқ бўлганлиги учун оилавий ҳаёт саломатлик билан бевосита алоқадор. Чунки, саломатликнинг асослари оилада ва оилавий муҳитда яратилиб, шаклланади.

Киши оиласиз яшаши мумкин. Лекин, бундай ҳаёт кемтик бўлиб, ҳеч қачон тўлақонли бўлмайди. Ҳар қандай оиланинг асоси биологик ва ижтимоий қонунларга бориб тақалади. Оиланинг биологик асоси шундан иборатки, ҳар бир жинсда қарама-қарши жинсга ҳаётий зарурат бор. Бу унинг насл-насабини давом қилдириш учун зарурдир.

Оиланинг ижтимоий асоси эса шундан иборатки, ҳаёт, турмуш, табиат  қийинчиликларининг ўзи кишиларни бирлашишга, бирлашиб туриб курашишга мажбур қилган ва ҳаётда яшаб қолиши учун зарур бўлган. Худди шу бирлашиш инсоннинг ҳаётини, саломатлигини, турмушининг мазмунли ва бахтли ўтишига хизмат қилган. Ҳозирги кунда оилавий ҳаёт кишилар умрини мазмунли ўтишига хизмат қилиши, саломатликларини мустаҳкамлаб, умрни узайтирувчи энг муҳим омил эканлиги ҳам илмий, ҳам ҳаётий жиҳатдан исботланган.

Оилада саломатликка таъсир этувчи омиллар, жамиятда кишилар саломатлигига таъсир қилувчи омилларнинг кичик шаклига ўхшайди. Шунинг учун, оиланинг ҳаёти хамда фаолияти билан боғлиқ муаммоларни ҳисобга олган ҳолда унинг аъзолари саломатлигини таъминлашда аҳамиятли бўлган талаблар бу – оилани тўғри ва оқилона ташкил қилиш, оилада соғлом турмуш тарзини шакллантириш, оилавий муносабатларни тўғри ташкил этиш ҳисобланади.
Шунингдек, фарзанд кўришга тайёргарлик кўриш, ҳомиладорлик ва бу даврнинг ўзига хос талабларини ҳисобга олиш, дунёга келган чақалоқни кутиб олиш ва унинг парваришида бўлиш ҳамда шароитларини таъминлаш кабиларга ҳам алоҳида аҳамият бериш керак.

Ундан ташқари, барвақт ва кутилмаган ҳомиладорликнинг олдини олиш усуллари ҳақида маълумотга эга бўлиш, абортнинг оқибатлариии англаш, оилавий қўйди-чиқдиларни саломатлик нуқтаи-назаридан ҳал қилиш, эркаклар ва аёлларда учраши мумкин бўлган баъзи бир таносил касалликлари ҳақида тушунчага эга бўлиш, ёш ўтиши билан боғлиқ бўлган баъзи бир касалликлар ва физиологик муаммоларни тўғри ҳал қилишни билиш ҳам фойдадан ҳоли бўлмайди.
Оила ҳаётида муҳим аҳамиятга эга бўлган талаблар жуда кўп. Лекин юқоридаги талабларни тўғри ҳал қилишнинг ўзи ҳам оила ва унинг ҳар бир аъзосининг саломатлиги ҳамда мазмунли ҳаётини таъминлайди.

Т.Саидова, ТТБ Аҳоли соғлом турмуш тарзини  қўллаб қувватлаш ва жисмоний фаоллигини ошириш  маркази шифокори.