“ТАМАКИДАН ВОЗ КЕЧИШ ВАҚТИ КЕЛДИ” ШИОРИ ОСТИДА САЛОМАТЛИК ТАДБИРИ ЎТКАЗИЛДИ

Маълумки, 31 май 1988 йилдан Жаҳон Соғликни сақлаш ташкилоти томонидан “Халқаро чекишга қарши курашиш куни” сифатида белгиланган ва ҳар йили ушбу сана муносабати билан бутун дунёда турли мавзуларда тадбирлар ўтказилиб, кенг нишонланади. Сана муносабати билан йил шиорлари белгиланиб, турли хил тадбирлар, саломатлик сабоқлари бўйича давра суҳбатлари, спорт тадбирлари ва марофонлар ўтказилади.

2021 йилдаги “Халқаро чекишга қарши курашиш куни”, “Тамакидан воз кечиш вақти келди!” шиори остида, аҳолининг барча қатламлари вакиллари иштирокида нишонланмоқда.

Туманимизда ҳам “Халқаро чекишга қарши курашиш куни” арафасида туман Тиббиёт бирлашмаси  Саломатлик  маркази шифокорлари Жумабой Явкашев, Матёқуб  Эрназаров, Тамара  Саидовалар, кўп тармоқли марказий поликлиника оилавий шифокорлари  Тамара  Нурмаганбетова, Меҳри Ҳусаинова, Гулнора Эшмуродова,  фтизиатр Гуларо Абдуллаева, тиббиёт бирлашма спорт тарғиботчиси Ибодулла Нуримбетовлар ҳамкорлигида  2021 йил 29 май куни  Манғит шаҳридаги Истироҳот боғида  “Биз тамакисиз худудни танлаймиз!” шиори остида маданий-маърифий тадбир ўтказилди. Унда чекишнинг инсон организмига зарари тўғрисида иштирокчилар билан савол-жавоб тарзидаги суҳбатлар,  “Ассалом тонг” мавзусида нафис гимнастика спорти бўйича спортчи-қизларнинг кўргазмали чиқишлари, “Биз тамакисиз мухитни танлаймиз!” декларациясини қуллаб-қувватлаш учун имзоларни тўплаш ташкил этилди. Шунингдек, антропометрик ўлчовларни ўтказиш, семизлик даражаси ва вазн индексини аниқлаш орқали кузатув натижаларидан келиб чиқиб, тушунтириш ишларини олиб борувчи саломатлик майдончаси, тўғри овқатланиш таомилларига риоя  қилиш тўғрисида  тавсиялар берилиб, соғлом овқатланиш ярмаркалари ташкил қилинди. Ярмаркада Олмазор, Гулзор МФЙларнинг уюшмаган аҳолисига ҳамда саломатлик куни тадбири иштирокчиларига Президентимизнинг 2020 йил 30 октябрдаги 6099-сон Фармонида белгиланган вазифалардан келиб чиқиб, аҳоли ўртасида соғлом турмуш тарзи, жисмоний фаоллик, кун тартиби қоидаларига амал  қилиш, оммавий спорт билан шуғулланиш, соғлом ва тўғри овқатланиш, зарарли одатларга берилмаслик, айниқса, кашандалик, тамаки чекишнинг аянчли ва салбий оқибатлари хусусида тушунтиришлар, тавсиялар берилди. Шифокорлар ҳар йили тамаки истеъмоли  натижасида дунёда 6 миллионга якин киши ҳаётдан кўз юмиши ва агар унга қарши курашилмаса, бу кўрсаткич 8 миллиондан ошишини мисоллар билан батафсил тушунтирдилар.

Иштирокчиларга “Тамаки чекиш ва саломатлик”, “Соғлом бўлишнинг олтин қоидаси”, “Ёшлар ўртасида соғлом турмуш тарзини шакллантириш”, “Ёшлар - зарарли одатларга қарши”  мавзуларида  буклетлар таркатилди. Тадбир давомида туман маданият булими томонидан тайёрланган дам олиш концерт дасури намойиш этилди.

Тадбирда иштирокчилар шифокорлар билан бевосита мулоқотга киришишлари, ўзларини қизиқтирган саволлар билан мурожаат қилишлари учун имконият яратилди. Мутахассис шифокорлар тадбир иштирокчиларининг барча саволларини батафсил тингладилар. Шу баробарида, тушган саволлар мазмун-моҳиятидан келиб чиқиб, ҳаётий мисоллар орқали кенг тушунча ва маълумотлар бердилар. Иштирокчилар чекишнинг инсоният насли учун жуда жиддий оқибатлар келтириши ва хавф-хатари ҳақида зарур тушунчаларга эга бўлдилар.

Ж.ЯВКАШЕВ, Туман тиббиёт бирлашмаси шифокори.