Ёшлар фестивали доирасида турли спорт мусобақалари ўтказилмоқда

Бугунги кунда мамлакатимизда ёшларнинг ҳар томонлама етук, барча соҳаларда илғор, баркамол авлод бўлиб етишишларига катта эътибор қаратилиб, эртамиз эгаларига кенг имконият ва шароитлар яратилмоқда. Айниқса, уларни жисмоний тарбия ва спорт билан шуғулланишлари, ҳам жисмонан ва манан етук бўлиб етишишлари йўлида қатор самарали ишлар амалга оширилмоқда.

“Янги Ўзбекистон ёшлари, бирлашайлик!” шиори остида Амударё туманида “Ёшлар фестивали” доирасида ўтказилаётган спорт мусобақалари ҳам шу мақсадларга хизмат қилмоқда. Жорий йилнинг 3-8 июнь кунлари туманимиздаги ёшлар ўртасида спортнинг шахмат тури бўйича “Ёшлар шахмат тахтаси” мусобақаси ўтказилди. 8 июнь санасида эса мазкур мусобақанинг туман босқичи бўлиб ўтди. Мусобақада туманимиздаги 7 ёшдан 30 ёшгача бўлган ҳарбий хизматчилар, ҳаваскор спортчилар, ўқувчи талабалар, уюшмаган ёшлар иштирок этдилар. Беллашувлар Халқаро шахмат федерациясининг қоидалари асосида ўтказилди.

Мусобақанинг ҳудудий босқичларида 1-2-3-ўринни эгаллаган иштирокчиларга туман босқичида қатнашишга рухсат берилди. Мусобақалар жуда қизиқарли бахс-мунозарага бой тарзда ўтди. Беллашувларнинг туман босқичи якуний натижаларига кўра қизлар ўртасида Дурунки маҳалласида яшовчи 56-сонли мактабнинг 3-синф ўқувчиси Ирода Тўлибоева 3-ўринни, 6-синф ўқувчиси Умида Тўлибоева 2-ўринни, Ўзбекистон маҳалласида яшовчи 44-сонли мактабнинг 5-синф ўқувчиси Райҳона Шомуратова фахрли 1-ўринни эгалладилар.

Ўғил болалар ўртасида ҳам беллашувлар муросасиз тарзда ўтди. Якуний натижаларга кўра Хитой овулида яшовчи, 2-сонли мактабнинг 7-синф ўқувчиси Муродбек Ражабов 3-ўринни, Қипчоқ овулида яшовчи 18-сонли мактабнинг 8-синф ўқувчиси Шерзод Саъдуллаев 2-ўринни, Дурунки маҳалласида яшовчи, 56-сонли мактабнинг 9-синф ўқувчиси Оғабек Тўраев фахрли 1-ўринни эгалладилар.

Туман босқичида ғолиб бўлган иштирокчилар туман ҳокимлигининг I-II-III даражали дипломлари ҳамда қимматбаҳо совғалари билан тақдирландилар.

“Янги Ўзбекистон ёшлари, бирлашайлик!” шиори остида ўтказилаётган фестивал доирасида спортнинг сузиш тури бўйича ҳам мусобақалар ташкил қилинди. Сузиш мусобақасида туманимизда яшовчи 12 ёш ва ундан кичик ёшдаги ёшлар иштирок этдилар. Сузиш бўйича беллашувлар қизлар ва ўғил болалар ўртасида ҳам мусобақалар ташкил қилинди. Мусобақа 8 июнь санасида туман Болалар ва ўсмирлар спорт мактабининг сузиш бассейнида ўтказилди.

Бу каби спорт мусобақаларини ўтказишдан асосий мақсад – туманда спортнинг барча турларини янада ривожлантириш, спортнинг ҳар бир тури бўйича кучли спортчиларни аниқлаш ҳамда туман терма жамоасини шакллантириш, ёшлар ўртасида соғлом турмуш тарзини тарғиб қилишдан иборатдир.

Сузиш бўйича ўтказилган мусобақаларнинг якуний натижаларига кўра ўғил болалар ўртасида ҳар учала ўринни ҳам 30-мактаб ўқувчилари, жумладан, Бўстон маҳалласида яшовчи Арслонбек Холбоев 3-ўринни, Беруний маҳалласида яшовчи Худойберди Ўтамуратов 2-ўринни, Бўстон маҳалласида яшовчи Шоҳжаҳон Сафарбоев фахрли 1-ўринни эгалладилар.

Шунингдек, қизлар ўртасидаги бахсларда Хизр эли маҳалласида яшовчи 46-сонли мактаб ўқувчиси Маржона Тозабоева 3-ўринни, Олмазор маҳалласида яшовчи 31-мактаб ўқувчиси Айгерим Марксова 2-ўринни, Гулзор маҳалласида яшовчи 55-мактаб ўқувчиси Диёра Жумамуратова фахрли 1-ўринни совриндори бўлдилар.  Мусобақа ғолиблари туман ҳокимлигининг I-II-III даражали дипломлари ҳамда қимматбаҳо совғалари билан тақдирландилар.

“Янги Ўзбекистон ёшлари, бирлашайлик!” шиори остида ўтказилаётган фестивал давом этмоқда.

Чарос Арслонова, туман ҳокимлигининг Ахборот хизмати раҳбари.