Уйшун овулида чегара ҳудуд аҳолиси билан учрашув ўтказилди

Жорий йилнинг 22 июнь санасида Амударё тумани Уйшин маданият маркази биносида чегара ҳудуд аҳолиси билан учрашув ташкил этилди. Учрашувда туман хокимининг чегара масалалари буйича ёрдамчиси Ойбек Шомуратов, Давлат хавфсизлик хизмати туман бўлими  ходими Кувонч Нурабоев, Давлат хавфсизлик хизмати чегара қўшинларига қарашли харбий кисм командири Элёр Журабоев ҳамда овулдаги маҳаллалар раислари, маҳалла фаоллари, кўчабошилари, овул аҳоли вакиллари иштирок этдилар.

Йиғилишда аҳолига чегара ҳудудда яшаш қоидалари ҳамда “Ўзбекистон Республикаси давлат чегараси тўғрисида”ги Ўзбекистон Республикласи қонуни ҳамда “Ўзбекистон Республикаси ҳудудида чегара режими тўғрисидаги низомни тасдиқлаш ҳақида” Ўзбекистон Республикаси Вазирлар Маҳкамасининг қарори каби ҳужжатларнинг мазмун-моҳияти тушунтирилди.

Масъуллар йиғилганларга Ўзбекистон Республикасининг “Ўзбекистон Республикаси давлат чегараси тўғрисида”ги қонунида белгиланган чегара ҳудудда яшаш тартиб-қоидаларига риоя қилиш, диний экстримизм ва терроризмга қарши курашишда хушёрлик давр талаба эканлиги, давлат чегарасида ўрнатилган муҳандислик тўсиқлари ва иншоатларига етказилган зарар бўйича фуқароларнинг жавобгарлиги, чегара ҳудудда чорва молларини боқмаслик, шунингдек, чегара ҳудуддаги руҳий касал ва спиртли ичимликка берилган фуқароларни назоратга олиш зарурлиги тўғрисида маълумотлар бердилар.

Таъкидлаш керакки, мазкур қонун билан чегара олди режими, чегара олди зонасига кириш, ундан ўтиш, бу ерда бўлиш, ҳаракатланиш ҳамда ишлар бажариш тартибини белгиловчи қоидалар, чегара минтақасига кириш, чиқиш, ҳаракатланиш, фаолият олиб бориш ва яшаш тартиблари белгилаб қўйилган. Аҳоли вакилларидан шу каби қоидаларга қатъий амал қилиш лозимлиги талаб қилинади.

Маълумот тариқасида келтирилишича, чегара олди зонаси – давлат чегарасига туташ туман, шаҳар, шаҳарча, қишлоқ, овул ҳудуди доирасида белгиланади. Чегара олди зонаси таркибига бундай минтақа белгиланган жойдаги Ўзбекистон Республикасининг ички сувлари, чегара бўйи дарёлари, кўллари ва бошқа сув ҳавзалари сув қисми ҳамда шу сувларда жойлашган Ўзбекистон Республикаси ороллари ҳам киритилади. Чегара олди минтақасида чегара қўшинлари томонидан кириш ва чиқиш, бу ерда бўлиш, яшаш, шахслар ва транспорт воситалари ҳаракатланишига оид қўшимча режим қоидалари белгиланади.

Шунингдек, учрашувда чегара ҳудудда диний экстремизм ва терроризмга қарши кураш ва унинг олдини олиш, инсонларни турли ёт ғоялар таъсирига тушиб қолишларига йўл қўймаслик, шу каби ҳолатлар учраганда тезкор чоралар қўллаш, профилактика тадбирларини янада кучайтириш лозимлиги таъкидланди.

Қолаверса, ёшларимизни носоғлом ғоялар таъсирига тушиб қолишларидан асраш, уларнинг ҳаётда ўз ўринларини топишлари учун маҳалла, жамоатчилик ташкилотлари билан ҳамкорликда ишлар олиб бориш зарурлиги, ёшларимизни Ватанга муҳаббат, унинг ҳимоясига доимо шай турадиган авлод қилиб тарбиялаш лозимлиги қайд этилди.

Йиғилишда масъуллар томонидан “Ўзбекистон Республикаси давлат чегараси тўғрисида”ги қонунда кўрсатилганидек, чегара олди ҳудудида чорва молларини боқиш, ёки уларни қаровсиз қолдириш, чегара ҳудудини кесиб ўтишга уруниш, ҳудудда жойлашган ҳар қандай муҳандислик ишоотлари ва тўсиқларга зарар етказиш кабилар ҳуқуқбузарлик ҳисобланиши тушунтирилиб, бу каби ҳолатлар содир этилса, қонун билан тегишлича жазо чоралари белгилаб қўйилганлиги қайд этилди.

Йиғилишда иштирок этган фуқаролар масъулларга ўзларини қизиқтирган саволлар билан мурожаат қилдилар, чегара ҳудуди аҳолиси томонидан берилган саволларга масъуллар жавоб қайтардилар. Шунингдек, аҳоли вакилларининг чегара ҳудуд даҳлсизлиги борасидаги фикр-мулоҳазалари, таклифлари ҳам тингланди.

Чарос Арслонова, туман ҳокимлигининг Ахборот хизмати раҳбари.