Ўзбекистон “Қизил ярим ой” жамияти туман бўлими самарали фаолият олиб бормоқда

Жорий йилнинг 25 июнь куни туман тиббиёт бирлашмасида Ўзбекистон “Қизил ярим ой” жамияти туман бўлими томонидан учрашув ташкил этилди.

Учрашувда туман тиббиёт бирлашмаси бўлимлари мудирлари, кўп тармоқли марказий поликлиника шифокорлари, тумандаги қишлоқ оилавий пунктлари ҳамда қишлоқ врачлик пунктлари мудирлари ҳамда ҳамширалари иштирок этдилар. Учрашувни туман тиббиёт бирлашмаси бошлиғи Фарҳод Абдуллаев бошқариб борди.

Бирлашма раҳбари ўз сўзида мамлакатимизда аҳоли саломатлигини тиклаш борасида олиб борилаётган кенг қамровли ислоҳотлар хусусида тўхталиб, бу борада COVID-19 ҳамда инфекцион касалликларнинг олдини олиш ҳамда уларга қарши курашда профилактика ишларини жадаллаштириш, аҳоли ўртасида тушунтириш-тарғибот тадбирларини кучайтириш зарурлигини қайд этиб ўтди.

Таъкидлаш керакки, бугун юртимизда аҳоли саломатлиги, соғлом турмуш тарзини шакллантириш масаласи энг устувор йўналишлардан бири ҳисобланади. Бу борада қатор қонун ҳужжатлари қабул қилиниб, тизимли ишлар олиб борилмоқда. Хусусан, Ўзбекистон Республикаси Президентинининг жорий йилда имзоланган “2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастури тўғрисида”ги ҳамда “Соғлиқни сақлаш тизимида олиб борилаётган ислоҳотларни изчил давом эттириш ва тиббиёт ходимларининг салоҳиятини ошириш учун зарур шарт-шароитлар яратиш тўғрисида”ги фармонлари, Ўзбекистон Республикаси Президентининг “Соғлиқни сақлаш соҳасини комплекс ривожлантиришга доир қўшимча чора-тадбирлар тўғрисида”ги қарори соҳада кенг кўламли ишларни ташкил этишда муҳим ҳужжат бўлиб хизмат қилмоқда.

Мазкур ҳужжатлар мамлакатимизда соғлиқни сақлаш тизимида олиб борилаётган ислоҳотларни изчил давом эттириш, аҳоли саломатлигини сақлаш борасида белгиланган устувор вазифалар ижросини таъминлаш, тиббиёт ходимларининг салоҳиятини ошириш учун зарур шарт-шароитлар яратишда муҳим дастуруламал бўлмоқда.

Учрашувда Ўзбекистон “Қизил ярим ой жамияти” туман бўлими ижрочи директори Ибодулла Нуримбетов жамият томонидан амалга оширилаётган ишлар хусусида сўз юритди.

Қайд этилганидек, Ўзбекистон “Қизил ярим ой жамияти” кўнгилли, инсонпарварлик ташкилоти бўлиб, айни пайтда 15 та минтақавий, 206 та туман, шаҳар ва 1500 дан ортиқ бошланғич ташкилоти, 200 мингдан ортиқ фаол аъзо ва 40 мингдан ортиқ волонтёрлари ёрдамида жамоатчилик асосида фаолият юритиб келмоқда. Жамиятда “Меҳр-шафқат” хизмати ташкил қилинган бўлиб, ушбу хизмат орқали ёлғиз кексалар, ногиронлар, сурункали касаллиги бор беморлар, кўп фарзандли, кам таъминланган оилаларга доимий ғамхўрлик қилиниб, инсонпарварлик ёрдами кўрсатиб келмоқда.

Учрашувда мутасаддилар 14 июнь “Бутунжаҳон донорлар куни” муносабати билан туман Тиббиёт бирлашмасида қон топширган фахрли донорларга, кўнгилли инсонларга совғалар тарқатилди.

Айтиш керакки, ҳар йилнинг 14 июнь санаси бутун дунёда қон донорлари куни сифатида нишонланади. Айнан мана шу куни дунёнинг турли бурчакларида яшовчи инсонлар бошқа одамлар ҳаётини сақлаб қолишга кўмак қўлини чўзадиган, ўз қонини кўнгилли сифатида топширадиган, қонга муҳтож бўлган одамларга “ўзининг бир парчаси”ни бахшида этувчи донорларга миннатдорчилик билдиришади.

Туманимизда ҳам шу каби инсон саломатлигига ўз ҳиссасини қўшувчи ҳамюртларимиз талайгина бўлиб, Ўзбекистон “Қизил ярим ой жамияти” туман бўлими томонидан донорлик қилишга чақирувчи тарғибот-ташвиқот ишлари жадал суръатларда олиб борилши натижасида уларнинг сони тобора ортмоқда.

Чарос Арслонова, туман ҳокимлигининг Ахборот хизмати раҳбари.