ТУМАН ГАЗЕТАСИНИНГ БИРИНЧИ МУҲАРРИРИ

Дарҳақиқат, туманимиздаги барча журналистларнинг устози, тажрибали журналист ва муҳаррир Собир Юсупов туман матбуотида ўзидан ўчмас из қолдирди. Агар ҳаёт бўлганларида бу йил табаррук юз ёшини биргаликда нишонлаган бўлардик.

Раҳматли устозим Собир Юсупов Хитой қишлоғида туғилиб, таълим-тарбия олган, ёшлигидан матбуотга, журналистикага жуда қизиққан. У 1940 йилдан олдин “Социализм йўли” туман газетасида ишлай бошлаган. Оддий ходимликдан муҳаррирлик даражасига етишган. Юртимизни фашистлардан озод этишда ҳам иштирок этган. Урушдан ярадор бўлиб қайтгач, яна “Социализм йўли” газетасида журналистлик фаолиятини давом эттирган.

1957 йилнинг декабрь ойи охирида Хоразм вилоятининг Манғит ва Қорақалпоғистон Республикасига қарашли Қипчоқ туманлари бирлаштирилган, ўша пайтда Собир Юсупов Қипчоқ тумани вакили сифатида янги туманга ном танлаш ҳайъатида қатнашган. Йўлдош Файзуллаев эса Манғит тумани вакили бўлган. Раҳматли Йўлдош Файзуллаев суҳбатларнинг бирида “туманга Амударё деб ном беришни С.Юсупов таклиф этди” дегандилар.

1958 йилнинг январь ойидан бошлаб, янги туманда “Амударё ҳақиқати” деган газета ташкил этилиб, унинг биринчи муҳаррири устозимиз Собир Юсупов бўлганлар. Мен устоз билан 1958 йилнинг февраль ойларида таҳририятда танишганман. Устоз менга мақола ва шеърлар ёзиш бўйича маслаҳатлар берар, хабар, мақолаларимни газетада ёритиб, рағбатлантирар эди, 1960 йилдан туман газеталари тугатилиб, туманлараро газета “Коммунизм ғалабаси” чиқа бошлади. Бу  даврларда устоз партия ва касаба уюшма ташкилотларида ишлади.

1965 йилнинг июль ойидан туман газеталари қайта ташкил қилинди. Шу йили Собир Юсупов яна “Амударё ҳақиқати” газетаси муҳаррири бўлиб ишлай бошлади. Устоз мени 1966 йил январь ойида газетага ишга таклиф этди. Дастлаб адабий ходим, кейинчалик бўлим мудири вазифаларида биргаликда ишлаганмиз.

Устоз Собир Юсуповнинг шогирдлари жуда кўп эди. Турсунбой Давлатбоев, Собир Қутлимуродов, Нурилла Худоёров, Қодир Олламуродов, Йўлдош Эрназаров, Жумамурод Эримматов, Гулнора Матёқубова, Сафо Матчонов, Турсунбой Султонов, Қурбонбой Олламуродов, Олламберган Жуманиёзов, Гулжон Кенжабоева, Бибиҳожар Дўсниёзовалар Собир Юсуповда сабоқ олган, муносиб шогирдлари эдилар.

1975 йилда устоз Собир Юсуповни туман партия ташкилотига ишга олишди, у ерда тарғибот бўлими мудири ўринбосари бўлиб ишлади. Кейинчалик пенсияга чиқди. 1985-87 йилларда, яъни вафот этгунига қадар яна “Амударё ҳақиқати” газетасида махсус мухбир бўлиб, самарали ишлади.

Қадрдон устозимиз мақолалар ёзиш билан биргаликда шеърлар ҳам ёзарди, шу боисдан у газетага муҳаррирлик қилган пайтда “Адабиёт саҳифаси” ойда икки-уч марта чиқарди. Тайёрлаб берилган шеър ва ҳикоялар газетанинг барча сонларида ёритилиб туриларди. 1985-87 йилларда газетада устознинг жуда кўп туюқлари ёритилди, шу жумладан, шеърлари ҳам. Ёритилган ижод намуналари икки китоб қилиб босишга етади, чамамда. Буларнинг бари устоздан қолган ўчмас излардир. Шунингдек, у Тўхта момомиз билан узоқ яшаб фарзандлар, неваралар кўришди. Айни кунда чеваралари ҳам жамиятимизнинг фаол аъзоларидан бири. Невараси Зумрад Бекатова эса айни кунда Ўзбекистон Республикаси Олий Мажлиси Қонунчилик Палатаси депутати бўлиб, элимизга хизмат қилмоқда.

Ушбу мақолани ёзишдан мақсад, устоз руҳига яна бир марта эҳтиром кўрсатмоқ, замондошларининг, шогирдларининг у ҳақдаги хотираларини газетада ёритилишига туртки бўлишдир. Биз учун қадрли бўлган устозимизнинг 100 йиллик юбилей тадбирини куз ойларида ўтказиш ниятимиз бор.

Илоҳим, руҳингиз шод, иймонингиз ҳамроҳ, охиратингиз обод бўлсин, Устоз!

Саъдулла ХЎЖАНИЁЗОВ,

фахрий журналист.