ЁЗ МАВСУМИДАГИ КЎНГИЛСИЗ ҲОДИСАЛАРДАН ЭҲТИЁТ БЎЛИНГ

Ёз мавсумининг иссиқ кунларида нафақат болалар, балки катталар ҳам чўмилиб, юқори ҳароратдан сақланиш, завқ олиш учун сув ҳавзаларига шошади. Бундай кунларда ҳар бир ҳудуддаги мавжуд очиқ ва ёпиқ сув ҳавзалари, дарё ва каналлар, кўллар чўмилишга келган турли ёшдаги фуқаролар билан тўлиб тошади. Аммо табиатдан баҳра олиш пайтида ҳам эҳтиёткорликни унутмаслик керак. Агар тартиб-қоидага амал қилинмаса турли нохуш ҳолатлар келиб чиқмаслигига ҳеч ким кафолат беролмайди.

Айни чўмилиш мавсуми бўлган шу кунларда туман Фавқулодда вазиятлар бўлими томонидан аҳоли ўртасида сувга чўкиш билан боғлиқ бахтсиз ҳодисаларнинг олдини олиш бўйича қатор чора-тадбирлар амалга оширилмоқда. Бу борадаги тегишли режага асосан туманда Фавқулодда вазиятлар бўлими томонидан тарғибот тушунтириш тадбирлари ташкил қилиниб, Амударё дарёси бўйларида сувда оммавий дам олишни таъқиқловчи белгилар, таъқиқланган жойда сувга чўмилиш бўйича жавобгарлик ҳамда сувга чўмилиш билан боғлиқ бахтсиз ҳодисаларнинг олдини олиш бўйича тушунчалар берилмоқда. Фавқулодда вазиятларнинг олдини олиш ва уларни бартараф этиш бўйича Амударё тумани ҳудудий комиссиясининг шу йил 5 июнь кунги йиғилишининг “Чўмилиш мавсуми давомида Амударё тумани ҳудудида жойлашган кўл, дарё ва каналлар акваториялари, ясама ҳавзалар ҳамда чўмилиш таъқиқланган ҳудудларда одамларнинг ҳаёти ва соғлигини муҳофаза қилиш тўғрисида”ги қарори ижроси бу бўйича ишчи гуруҳ томонидан таъминланмоқда.

Чўмилиш таъқиқланган жойларда ишчи гуруҳ аъзолари томонидан мавсум давомида 40 маротаба рейдлар ўтказилиб, 9 та семинар ҳамда 84 маротаба суҳбатлар ташкил этилди. Фуқароларга чўмилиш хавфсизлиги бўйича 702 та эслатмалар тарқатилди. Туман ҳудудидаги чўмилиш таъқиқланган жойларга 16 та чўмилиш таъқиқланганлиги тўғрисидаги белгилар ва белгиланмаган жойлардаги чўмилишларнинг аянчли оқибатлари акс эттирилган баннерлар ўрнатилди.

Жорий йилнинг 8 июль куни ишчи гуруҳ аъзолари томонидан Қипчоқ шаҳарчаси ҳудудидан оқиб ўтувчи Амударё дарёсида яна бир рейд тадбири ўтказилиб, сувга чўмилиш учун келган фуқароларга хавфсизлик қоидалари ва уларга амал қилмасликнинг аянчли оқибатлари тўғрисида тушутириш ишлари олиб борилди ва эслатмалар тарқатилди.

Шу куни яна бир неча фуқаролар билан ҳудудимизда давом этаётган қуруқ ва иссиқ ҳавода зарурият бўлмаганда кўчага чиқмасликлари, тез-тез сув ичишлари, иложи борича иссиқ об-ҳаводан сақланиши ҳамда болаларга белгиланмаган нотаниш жойларда чўмилишларига рухсат бермаслик тўғрисида ҳам огоҳлантиришлар бериб ўтилди.

Кун қаттиқ қизиётган айни кунларда офтоб тиғида юрган одамнинг соғлиги ёмонлашиб, ёмон оқибатларга олиб келиши мумкин. Офтоб уришидан сақланиш учун бошни енгил, оқ рангдаги табиий толали бош кийим билан, кўзларни эса қуёшдан сақловчи кўзойнак ёрдамида муҳофаза қилишни тавсия этилади. Организмда сув миқдорини ушлаб туришга ҳаракат қилиш, вақти-вақти билан баданни совуқ сувда намланган дастрўмол билан артиб туриш уни иссиқланишдан асрайди. Шунингдек, қуёш тиғида, чўмилиш жойларида, айниқса, қуёш фаол даври ҳисобланмиш – соат 12. 00 дан 16. 00гача бўлган даврда узоқ вақт қолишдан сақланиш лозим.

Чўмилганда эса нотаниш жойларда, спиртли ичимликларни истеьмол қилиб, маст ҳолатда сувга тушиш, ёш болаларнинг қаровсиз қолиши асло мумкин эмас. Кўпинча сувда сузишни билмаслик, сузиш тажрибасининг йўқлиги ва ўзининг жисмоний қобилиятини инобатга олмасдан сув қирғоғидан узоқлашиш, таъқиқланган сув ҳавзаларида чўмилиш чўкиш билан боғлиқ мудҳиш ҳодисаларга сабаб бўлади.

Аҳоли ўртасида ёз мавсуми билан боғлиқ кўнгилсиз ҳодисаларнинг олдини олиш бўйича ўтказилаётган тадбирлар давомида сувда чўмилиш учун келган фуқароларнинг хавфсизлигини таъминлаш мақсадида дарё қирғоқларидаги нотаниш жойларда кичик ҳажмли кемалар, ўзи сузмайдиган кемалар ва эшкакли қайиқларда сузмаслик кераклиги ҳам тушунтирилмоқда. Қайиқ эгаларига ва фуқароларга бу бўйича йўриқномалар ҳамда эслатмалар тарқатилмоқда.

Ҳаво ҳарорати юқори бўлган шу кунларда фуқароларимиздан зарур бўлмаса кўчага чиқмасликларини, иссиқ об-ҳаводан сақланиши ҳамда ёш болаларга белгиланмаган жойларда чўмилишларига рухсат бермасликларини сўраб қоламиз.

Б.Тажибаев, туман ФВБ ФВДТ ва ФМФТЭ, ХТБ бошлиғи.