“Хон” маиший хизмат кўрсатиш маскани фойдаланишга топширилди

Бугун юртимизда амалга оширилаётган кенг кўламли бунёдкорлик ҳамда ободонлаштириш ишлари натижасида шаҳар-у қишлоқлар, вилоятлар ва туманлар марказлари янги замонавий кўриниш касб этмоқда. Жойларда кўп қаватли биноларнинг қад кўтараётгани, маиший хизмат кўрсатиш объектлари, истироҳат боғлари, дам олиш масканлари киши кўзини қувонтиради ҳамда бу каби бунёдкорлик ишлари орқали юртдошларимизнинг турмуш шароитлари яхшиланиб, кўплаб шароитлар ҳамда қулайликлар яратилмоқда.

Амударё туманида 15 июль куни очилиш маросими ўтказилган “Хон” аҳолига маиший хизмат кўрсатиш масканида ҳам ҳамюртларимиз учун қатор замонавий маиший хизмат турлари йўлга қўйилган. Замонавий қиёфага эга бўлган мазкур 3 қаватли бино олдида ўрнатилган фаввора бино кўркига кўрк қўшмоқда.

Маиший хизмат кўрсатиш масканинг очилиш маросимида туман ҳокими Султонбой Йўлдашев ҳамда туман фаоллари иштирок этдилар. Туман ҳокими бинонинг очилиши билан барча йиғилганларни, шунингдек, тадбиркорни ва ишчи-ходимларни, туманимиз аҳолисини қизғин табриклади.

Туман ҳокими ўз сўзида “Хон” маиший хизмат кўрсатиш маскани раҳбари, тадбиркор Рустам Юсуповнинг келгусидаги ишларида, шу каби янги лойиҳаларни амалга оширишида янги зафарлар ҳамда муваффақиятлар тилади.

Шунингдек, туман фаоллари ҳам масканнинг барпо этилиши барча амударёликлар учун қувончли воқеа бўлганлигини қайд этдилар ҳамда тадбиркор ва маиший хизмат кўршатиш маскани ходимларининг келгусидаги фаолиятларида омад тиладилар.

Шундан сўнг йиғилганлар бинодаги шарт-шароитлар ҳамда қулайликлар билан қиндан танишдилар.

Айтиш керакки, “Хон” аҳолига маиший хизмат кўрсатиш маскани қурилиши учун тадбиркорнинг ўз маблағи ҳисобидан 1 млрд. 150 млн сўм пул маблағи сарф этилган. Қурилиш ишлари “Амударё қурилиш материаллари” масъулияти чекланган жамияти томонидан, сифатли ҳамда замонавий қурилиш материалларидан фойдаланилган ҳолда амалга оширилган.

Бунёдкорлик ишларига 100 нафар қурувчи-ишчилар жалб этилган. Бино 3 қаватдан иборат бўлиб, биринчи қаватида гўзаллик салони, озиқ-овқат ва кийим-кечак дўконлари мавжуд.

Иккинчи қаватида замонавий қандил-у бежирим ўриндиқлар билан жиҳозланган катта ресторан, учинчи қаватида энг сўнгги урфдаги, сифатли мебеллар билан жиҳозланган, меҳмонлар учун барча қулайликларга эга бўлган меҳмонхона ҳамда катта фитнес зали жойлашган.

Мазкур маиший хизмат кўрсатиш маскани ишга тушиши билан 12 нафар юртдошларимиз иш билан таъминланган.

Маросимга йиғилганлар бинодаги барча замонавий шарт-шароит ҳамда қулайликлар билан яқиндан танишдилар. Мазкур бино Манғит шаҳри кўркига кўрк қўшиши билан биргаликда шаҳар аҳолиси ва туманимизга ташриф буюрган меҳмонларнинг дам олиши ва маданий ҳордиқ чиқариши учун хизмат қилади. Бино ҳудуд аҳолиси учун мамлакатимиз мустақиллигининг 30 йиллиги олдидан ўзига хос совға бўлди, десак янглишмаймиз.

Туман ҳокимлигининг Ахборот хизмати.