Хитой овулидаги 6-сонли қишлоқ оилавий поликлинкаси 18 мингдан зиёд аҳолига сифатли тиббий хизмат кўрсатмоқда
Бутун мамлакатимизда бўлгани каби Амударё туманида ҳам тиббиёт соҳасида салмоқли ишлар амалга оширилмоқда. Кейинги йилларда тиббиёт бирлашмасига қарашли Марказий шифохона, Кўп тармоқли марказий поликлиника биноси таъмирдан чиқарилиб, атрофи ободонлаштирилди. Замонавий кўринишдаги Тез тиббий ёрдам бўлими биноси ишга туширилди. Айниқса, тиббиёт муассасаларининг замонавий, сўнгги русумдаги тиббиёт асбоб-анжомлари ҳамда техникалар билан таъминлангани даволаш ишлари самарадорлигини оширишда муҳим аҳамият касб этмоқда.
Бу каби янгиланишлар туманнинг чекка ҳудудларида ҳам амалга оширилиб, аҳолининг сифатли тиббий хизматлардан фойдаланишига имконият яратилмоқда.
Хитой овулида жойлашган 6-сонли оилавий поликлиникада ҳам ҳудуд аҳолиси учун малакали тиббий хизмат кўрсатиш йўлга қўйилган. 2013 йилда қишлоқ врачлик пункти сифатида ташкил этилиб, 2020 йилда оилавий поликлинкага айлантирилган ушбу тиббиёт масканида хизмат сифатини янада яхшилаш мақсадида аниқ тадбирлар белгиланиб, ижроси тўлиқ таъминланмоқда. Ҳар бир оилага кириб борилиб, саломатлигидан хабардор бўлинмоқда ва соғлом турмуш тарзи кенг тарғиб этилмоқда. Бундай тарздаги хизматлар кўрсатилаётганидан, эл саломатлигига алоҳида эътибор қаратилаётганидан аҳоли ниҳоятда мамнун.
Овулдаги 18 мингдан зиёд аҳолига мазкур поликлиникада терапевт, педиатр, хирург, акушер-гинеколог, шифокор-лаборант ва УТТ каби тор соҳа шифокорлари томонидан малакали тиббий хизмат кўрсатиб келинмоқда. Поликлиникада 7 нафар умумий амалиёт шифокори, 7 нафар тор доирадаги мутахассис шифокорлар, 54 нафар ўрта тиббиёт ходими ва 20 нафардан зиёд патронаж ҳамширалари иш олиб бормоқда. Шунингдек, ушбу тиббиёт муассасаси замонавий ускуналар, жумладан, УЗИ аппарати, лаборатория таҳлиллари учун зарур жиҳозлар билан таъминланган. Бунинг самарасида ташхис қўйиш сифати яхшиланиб, бирламчи тиббий ёрдам кўрсатиш самарадорлиги ошмоқда.
Турли касалликларнинг олдини олиш тиббиёт маскани фаолиятининг асосий йўналиши ҳисобланганлиги сабабли тарғибот ва ташвиқот ишлари мунтазам равишда амалга оширилиб, аҳолига тушунтириш ишлари олиб борилмоқда. Айниқса, коронавирус инфекцияси тарқалиши авж олаётган айни пайтда касалликдан ҳимояланиш чоралари, чалинишнинг олдини олиш ҳамда вакцинациянинг афзалликлари тўғрисида кенг тушунчалар берилмоқда.
Оилавий шифокор ва патронаж ҳамширалар томонидан эса ўзларига бириктирилган ҳудудлардаги оилалар тиббий-ижтимоий ҳолати ўрганиб чиқилмоқда. Диспансер ҳисобидаги беморларни уйида кўрикдан ўтказиш ва зарур муолажаларни амалга ошириш орқали турли касалликларнинг олдини олиш ишлари йўлга қўйилган. Ҳудудда рўйхатга олинган фертиль ёшидаги аёллар, болалар, кекса ёшдагилар ва ногиронлар саломатлиги доимий назоратда.
Поликлиникада бирламчи тиббий ёрдам кўрсатиш, ташхис қўйиш, соғломлаштириш муолажаларини амалга ошириш, лаборатория хоналари ишлаб турибди. Айниқса, тор доирадаги мутахассисларнинг фаолият кўрсатаётгани аҳолига кўплаб қулайликлар яратмоқда. Жарроҳ, педиатр, акушер-гинеколог, стоматолог, ультратовуш текшируви мутахассиси кабилар ҳудуд фуқароларининг узоғини яқин қилиб, оғирини енгил қилмоқда.
Тиббиёт ходимларининг самарали фаолияти ва бу ерда яратилган шароитлар Хитой овули аҳолисига сифатли тиббий хизматдан фойдаланиш, саломатлигини янада яхшилаш, юқумли касалликлар бўйича барқарор ҳолатни сақлаш ҳамда болалар ўртасида касалликка чалиниш ҳолатларини камайтириш имконини бермоқда.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
