МАРРАГА ЯҚИНЛАШАЁТГАН ФЕРМЕРЛАР

Айни кунларда бутун мамлакатимизда пахтакор деҳқонлар учун ғалвир сувдан кўтариладиган палла – “Пахта - 2021” кампанияси қизғин давом этмоқда. Пахтакорларга беминнат хизмат кўрсатиш, йиғим-теримда иштирок этаётган ижарачи-деҳқонлар ва кўнгилли ҳашарчиларнинг вақтида тушлик қилишлари, терган пахталарини муаммосиз тарозида тортиб олиш, дала бошида кўнгилли тушлик қилувчилар учун яратилган шарт-шароитлар туфайли пахтачилик фермер хўжаликларида терим суръати тобора ошмоқда.

Амударё туманидаги “Тўлқин” овулида ҳам йиғим-терим кампанияси юксак ташкилотчилик ва жипслик билан давом этмоқда. Овул ҳудудида 13 та пахтачилик фермер хўжаликлари бўлиб, эрта баҳорда 625 гектар майдонга чигит экилди. Ғўза вегетацияси даврида барча мавсум ишлари агротехника қоидаларига мувофиқ амалга оширилди.

Мазкур деҳқончилик йилининг аввалги йилларга нисбатан анча қурғоқчил келиши фермер хўжаликлари раҳбарлари ва ижарачи-деҳқонларни анча қийнаб қўйди. Шундай мураккаб шароитда ҳам ҳар қатра сувнинг қадрига етиб, ғўзани суғориш, озиқлантириш ишларини кеча-ю кундуз, аниқ режа асосида ташкил этган фермерлар ва фермер хўжаликлари мутахассислари ҳамда ижарачи деҳқонларнинг бугунги етиштирилган ҳосилдан кўнгиллари тўқ.

Овул бўйича давлатга 625 гектар ердан шартномадаги 1930 тонна пахта топшириш ниятида меҳнат қилаётган тўлқинликлар айни пайтда далаларидан кунига 70-80 тонналик юқори сифатли пахта териб олишга эришмоқдалар. Фермер хўжаликлари далаларида ҳар куни 850-900 нафар теримчи иштирок этишмоқда.

Тўлқинлик фермерлар пахта йиғим-терими билан бирга 510 гектар майдонда кузги буғдой экиш ишларини барвақт якунлаб, айни пайтда бир текис  униб чиққан буғдой майсаларини зараркунанда ҳашаротлардан ҳимоя қилиш, буғдойзорларда зараркунандаларга қарши ишлов бериш каби мавсум юмушларини ҳам сифатли амалга оширишмоқда.

Овул ҳудудидаги “Аҳмедов Ражаббой” фермер хўжалигига Руфат Аҳмедов раҳбарлик қилади. Эрта баҳорда 90 гектар ерга серҳосил ва эртапишар “Султон” навли чигит эккан хўжалик деҳқонлари айни кунларда йил бўйи қилинган самарали меҳнатлари меваси шартномадаги 288 тонналик юксак ҳосил хирмонини яратиш ниятида фидойилик билан меҳнат қилишмоқда. Пахта йиғим-теримида 82 нафар ижарачи-ишчилардан ташқари, тўлқинлик кўнгилли ҳашарчи-ёшлар ҳам иштирок этишмоқда.

Йиғим-терим ишларининг тўғри  ташкил этилгани, теримчилар ва кўнгилли ҳашарчилар учун яратилган шарт-шароитлар, терилган ҳар бир кило пахта учун иш ҳақлари ўз вақтида ҳисоб-китоб қилиниб, борилаётгани туфайли терим суръати юқори.

Фермер хўжалигида пахтачиликдан ташқари, ғаллачилик соҳасида ҳам салмоқли натижаларга эришилмоқда. Айни кунда 25 гектар майдондаги кузги буғдойзорларда ниҳоллар бир текис униб чиқиб, баравж ўсмоқда.

Хўжаликнинг пахта далалари эса ижарачи-деҳқонлар ва тўлқинлик кўнгилли ҳашарчилар учун чинаккам ризқ-рўз ва барака манбаига айланган. Терилган пахтаси учун ўз вақтида иш ҳақларини ҳисоб-китоб қилиб олаётган теримчиларнинг кайфиятлари баланд. Бу эса пахта йиғим-теримининг кунлик ўсишини таъминламоқда. Фермер хўжалининг илғор теримчилари Гулсара Ерназарова ҳамда Гулбаҳор Тўрабоевалар кунига 150-170 килограммдан пахта теришмоқда.

Оқ олтин овулидаги Давронбек Холменов раҳбарлигидаги “Гавҳар Ёқубова”  фермер хўжалиги далаларида ҳам йиғим-терим мавсуми ҳамжиҳатлик билан олиб борилмоқда.

Жорий деҳқончилик йилида 90 гектар ерга “Манғит-1” навли чигит эккан хўжалик деҳқонлари 287 тонналик хирмон кўтариш ниятида фидойилик билан меҳнат қилишмоқда. Айни пайтда 150 нафар теримчи хўжалик далаларидан кунига 10-15 тонна пахтани йиғиб-териб давлатга топшираётган фермер хўжалиги ишчиларининг шаҳдлари баланд. Улар 287 тонналик шартномавий режаларини яна бир ҳафтага уддалашга аҳд қилишган.

Илғор теримчилардан Сабоҳатхон Исмоилова ҳамда Сайёрахон Шомуродовалар кунига 120-130 килограммдан пахта теришиб, тенгдошларига ўрнак бўлишмоқда.

Робия Йўлдошева.