БОЛАЛАР-ЎСМИРЛАР СПОРТ МАКТАБИДА БУТУНЖАҲОН ДЗЮДО КУНИ ТАНТАНА ҚИЛИНДИ
Дунёда оммавийлиги бўйича футболдан сўнг иккинчи ўринда турадиган дзюдо – якка кураш спорт турининг ватани Япониядир. Ушбу спорт тури бўйича илк мактаб очган ушбу яккакураш асосчиси Дзигоро Кано шарафига бу ўйин дзюдо деб номланган.
Японияда ушбу миллий спорт тури жуда оммалашган, ҳатто 1907 йилдан бошлиб у мактаб дастурига мажбурий фан сифатида киритилган. 1964 йилдан халқаро олимпия ўйинлари дастурига киритилган дзюдога мамлакатимизда ҳам улкан эътибор қаратилмоқда. Бу қатор олимпия ва жаҳон чемпионатларида юртдошларимиз, туманимиз спортчилари қўлга киритаётган ютуқларда ҳам намоён бўлмоқда.
Дзюдо асосчиси Дзигоро Кано таваллуд топган кун шарафига бутун дунёда 28 октябрда Бутунжаҳон дзюдо кунини кенг нишонлаш анъанага айланиб қолган. Шу муносабат билан туманимизда ҳам ҳар йили сана улкан тантана қилинади. Бу бежиз эмас. Чунки туманимиздан ҳам дзюдо бўйича таниқли спортчилар, Европа, Осиё чемпионати, халқаро турнирлар ғолиб ва совриндорлари, “Токио - 2020” олимпия ўйинлари иштирокчиси етишиб чиққан.
2020 йилда Бутунжаҳон дзюдо куни “Дарахт эк” шиори остида ўтказилган бўлса, жорий йилда ушбу сана “Бирдамлик” шиори остида ўтказилди.
Шу муносабат билан 28 октябрь куни туман Болалар-ўсмирлар спорт мактабида ҳам тантанали тадбир ташкил этилди.
Тадбирга спорт мактаб тренерлари, тарбияланувчилари ва кўпгина халқаро мусобақалар ғолиби, “Токио - 2020” олимпия ўйинлари иштирокчиси, ушбу мактабда илк дзюдо сабоқларини олган Шарофаддин Болтабоев иштирок этди.
Бутунжаҳон дзюдо кунига бағишланган тадбирни спорт мактаби директори Чоршам Тожимуродов очди ва йиғилганларни байрам билан қизғин қутлади, маҳоратли дзюдочиларни тарбиялаб вояга етказаётган мураббийларнинг машаққатли ишларида муваффқиятлар тилади.
Мамлакатимизда бугунги кунда спортнинг барча турларини ривожлантириш ҳамда унинг оммавийлигини таъминлаш борасида салмоқли ишлар олиб борилмоқда. Хусусан, дзюдо билан шуғулланувчи ёшлар сафи ҳам тобора кенгаймоқда. Туманимизда фаолият юритаётган Болалар-ўсмирлар спорт мактаби ҳам умидли спортчиларни тарбиялашга хизмат қилмоқда.
Шуни алоҳида таъкидлаш жоизки, ушбу спорт мактабида 1360 нафар ўсмир ўқувчилар спортнинг 17 тури билан шуғулланишаётган бўлса, шунинг 250 нафардан зиёди айнан спортнинг дзюдо турини танлашган. Уларга 7 нафар тажрибали мураббийлар машғулотлар олиб боришаяпти.
Шу боисдан ҳам Бутунжаҳон дзюдо куни ҳар йили спорт мактабда улкан байрам қилинади. Жорий йилги тантанали тадбир ҳам ёш дзюдочилар ва мураббийларга жуда юқори кайфият бағишлади.
Тадбир сўнгида Шарофиддин Болтабоев спорт мактабнинг дзюдо билан шуғулланаётган ёш спортчиларига маҳорат дарси ўтди ва ўзининг ушбу даргоҳда тарбияланган даврлари босиб ўтган шонли спорт йўли ҳақида гапириб бериб, уларни янги-янги ғалабалар сари руҳлантирди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
