Қорақалпоғистонда Ҳосил байрами кенг нишонланди

19 декабрь куни Нукус шаҳридаги Отчопар майдонида Қишлоқ хўжалиги ходимлари куни кенг нишонланиб, Ҳосил байрами ўтказилди. Байрам тадбирида қорақалпоғистонлик деҳқон ва фермерлар, қишлоқ хўжалиги соҳаси фаоллари, кенг жамоатчилик вакиллари иштирок этди. Тадбирда Қорақалпоғистон Республикаси Жўқорғи Кенгеси Раиси Мурат Камалов иштирок этиб, эл дастурхони тўкинлигига ҳисса қўшаётган соҳа ходимларини байрам билан табриклади.

Ҳосил байрами ўтказилган Отчопар майдонининг кириш қисмида ҳар бир шаҳар ва туманларнинг, вазирликларнинг махсус қора уйлари тикланиб, деҳқонларимиз етиштирган маҳсулотлар кўргазмаси ташкил этилди.

Байрам тадбирида амударёлик қишлоқ хўжалиги соҳаси ходимлари ҳам фаол иштирок этдилар.

Туманимиз деҳқон ва фермерлари бу йил ҳам барча қишлоқ хўжалиги экинларидан мўл ҳосил олиб, юксак хирмонлар бунёд этдилар. Жорий қишлоқ хўжалиги йилини ҳам амударёлик пахтакор ва ғаллакорлар, пиллакор-у чорвадорлар, қўйингки, қишлоқ хўжалигининг барча тармоқлари вакиллари меҳнатдаги ютуқлари сабабли ёруғ юз билан якунлаб, келгуси йилги мўл ҳосил учун пухта тараддуд кўрмоқдалар.

Бу йилги илк ҳосил хирмонини кўтарган пиллакорларимиз шартномавий режадаги 221 тонна ўрнига 223,7 тонна юқори сифатли ҳосил олиб, бу борадаги режани 101,2 фоизга ортиғи билан адо этдилар.

Ғаллакорларимиз эса 3800 гектар майдонда бошоқли дон етиштириб, 9 500 тоннадан ортиқ "қирмизи дон" ҳосилини давлат омборларига топширдилар.

Пахтакорларимиз режадаги 45 750 тонна ўрнига 45 800 тоннага яқин пахта ҳосилини йиғиб-териб олиб, меҳнат зафарига эришдилар.

Туманимизда Қорақалпоғистон Республикасидаги энг салмоқли “оқ олтин” хирмони биринчилар қаторида бўй тиклаб, деҳқон ва фермерларимиз масъулияти чекланган жамият шаклидаги “Amudaryotex” хорижий корхонаси кластери билан тузилган шартнома шартларини ортиғи билан бажардилар.

Қолаверса, амударёлик фидойи деҳқон ва фермерлар, томорқачилар мева-сабзавот ҳамда полиз экинларидан ҳам мўл ҳосил олиб, халқимиз дастурхонининг тўкинлиги ва бозорларимизда нарх-навонинг барқарор бўлишига замин яратдилар.

Шунингдек, чорвачилик ва паррандачилик, асаларичилик ҳамда бошқа соҳаларда ҳам йирик лойиҳалар амалга оширилиб, халқимизни гўшт, сут, тухум, асал ва бошқа зарур кундалик истеъмол моллари билан таъминлашда ҳам соҳа ходимлари фидойилик намуналарини кўрсатиб, меҳнат қилдилар.

Бир сўз билан айтганда, Амударё тумани қишлоқ хўжалиги соҳаси жонкуярлари ўзларининг ҳалол ва баракали меҳнати билан Қорақалпоғистон Республикаси ва мамлакатимиз миқёсида юксак натижаларга эришдилар.

Байрамнинг асосий томоша майдонида арқон тортиш, от чоптириш, кураш мусобақалари бўлиб ўтди. Арқон тортишда Чимбой тумани вакиллари 1-ўринни қўлга киритган бўлса, кураш баҳсларида шуманайлик Зарапат полвоннинг қўли баланд келиб, бош соврин - Gentra автомобили билан тақдирланди. Чавандозлар эса Отчопар майдонини 5, 7, 10 айланиш бўйича куч синашдилар. Муросасиз кечган мусобақаларда тошкентлик чавандоз ғолиб чиқди.

Тадбир давомида қишлоқ хўжалигида юқори натижаларга эришган деҳқон ва фермерлар, боғбонлар, чорвадор ва пиллакорлар, сувчилар ва ирригаторлар, агроном ва механизаторлар, агрокластерлар раҳбарлари ҳамда ишчи-ходимларига қимматбаҳо совғалар топширилди.

Амударё тумани ҳокимлигининг ахборот хизмати