Халқ депутатлари Амударё туман Кенгашининг 44-сессияси тўғрисида ахборот
2021 йил 30 декабрь куни Халқ депутатлари Амударё туман Кенгашининг навбатдаги 44-сессияси бўлиб ўтди. Сессия мажлисида туман ҳокими Султонбой Йўлдашев, туман Кенгаши депутатлари, сектор раҳбарлари, туман ҳокими ўринбосарлари, ҳокимлик масъул ходимлари, ҳуқуқ-тартибот органлари масъуллари, бўлимлар, тижорат банклари раҳбарлари, фуқароларнинг ўзини ўзи бошқариш органлари раислари ҳамда оммавий ахборот воситалари вакиллари иштирок этдилар.
Сессия ишида дастлаб Амударё туманида жисмоний ва юридик шахсларнинг қишлоқ хўжалигига мўлжалланмаган ерларига 2022 йил учун ер солиғи ставкаларини белгилаш тўғрисидаги масала кўриб чиқилди ҳамда ушбу масала юзасидан туман давлат солиқ инспекцияси бошлиғи Айдос Сеитовнинг ҳисоботи тингланди.
Ҳисоботда келтирилишича, қишлоқ хўжалигига мўлжалланмаган ерлар учун Манғит шаҳри марказида жойлашган 12 та маҳалла фуқаролар йиғинларида ер солиғи ставкалари жисмоний шахсларга 1 кв метр учун 286 сўм, юридик шахсларга 1 га учун 30 млн 800 минг сўм миқдорида қилиб белгиланган. Қолган бошқа ҳудудларда эса жисмоний шахсларга 1 кв метр учун 200,2 сўм, юридик шахсларга эса 1 га учун 21 млн 560 минг сўм қилиб белгиланган.
Шундан сўнг, Амударё тумани Маҳалла ва оилани қўллаб-қувватлаш бўлими томонидан 2021 йилда амалга оширилган ишлар, фуқароларнинг ўзини ўзи бошқариш органлари фаолиятида учраётган долзарб муаммо ва камчиликлар ҳамда уларнинг ечими тўғрисида Маҳалла ва оилани қўллаб-қувватлаш бўлими бошлиғи Алишер Юлдашевнинг ҳисоботи тингланди.
Ҳисоботда “Обод ва хавфсиз маҳалла” тамойилига асосланган тизимни самарали жорий этиш бўйича амалга оширилган ишлар, хусусан, янгидан қуриб фойдаланишга топширилган ҳамда қайта таъмирланган маҳалла фуқаролар йиғини бинолари ҳақида батафсил маълумот берилди. Бундан ташқари, 2021 йил давомида “Аёллар дафтари” га киритилган аёл-қизларнинг ҳаётда ўз ўрнини топишлари учун кўрсатилган моддий, психологик, ижтимоий ёрдамлар ҳақида тўхталиб ўтилди. Шунингдек хисоботда, кексаларни ижтимоий ҳимоя қилишга қаратилган ишларнинг йил якуни бўйича хулосаси баён этилди.
Сессия ишида Мажбурий ижро бюросининг туман бўлими томонидан йил якунига қадар амалга оширилган ишлар тўғрисида Мажбурий ижро бюроси Амударё туман бўлими бошлиғининг билдиришномаси тингланди. Бюро томонидан жорий йилда алимент, солиқ, ва жарималарни ундириш бўйича самарали фаолият олиб борилган. Билдиришномада қайд этилишича, жиноят натижасида давлатга етказилган зарар, давлат божи, жиноий ва маъмурий жарималар, давлат фойдасига ўтказилган мол-мулкларни сотиш эвазига тушган маблағларнинг 50 фоизини “Темир дафтар”, “Аёллар дафтари” ва “Ёшлар дафтари”га киритилган фуқароларни қўллаб-қўвватлаш мақсадида бюро томонидан ўтказиб берилиши белгиланган.
Сессияда Амударё тумани халқ таълими бўлимига қарашли 47-сонли мактабда бўшаб қолган директорлик лавозимига ўтказилган танлов якунлари бўйича номзодга келишим бериш масаласи ҳам кўриб чиқилди. Сессия давомида директорликка номзод Ўктам Бекбергеновнинг мактабда таълим сифати ва самарадорлигини ошириш бўйича келгуси 3 йилда амалга оширадиган мақсад ва вазифалари акс этган дастури тингланди.
Номзоднинг дастури ўқиб эшиттирилганидан сўнг номзодга келишим бериш масаласи бўйича очиқ овоз бериш жараёни ташкил этилди. Депутатлар орасидан саноқ комиссияси тузилди. Овоз бериш якунларига кўра, Ўктам Бекберганов 47-сонли умумий ўрта таълим мактаби директори лавозимига муносиб деб топилди ва туман Кенгаши томонидан тегишли қарор қабул қилинди.
Сессияда шунингдек халқ депутатлари туман Кенгаши ваколатига кирувчи бошқа масалалар ҳам муҳокама қилинди.
Кун тартибига киритилган барча масалалар атрофлича кўриб чиқилиб, улар юзасидан депутатлар ва сессия иштирокчиларининг фикр-мулоҳазалари тингланди ҳамда ҳисоботлар ва ахборотлар юзасидан берилган саволларга тегишлича жавоблар қайтарилди. Кун тартибидаги барча масалалар бўйича Кенгашнинг тегишли қарорлари қабул қилинди ва шунинг билан сессия ўз ишини якунлади.
Амударё тумани ҳокимлигининг ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
