2021 йил якуни бўйича туманда барча тоифадаги хўжаликларда 171,5 минг бош қорамоллар бор

Амударё туман Ветеринария ва чорвачиликни ривожлантириш бўлими томонидан чорвачиликка ихтисослашган фермер хўжаликлари ва аҳоли ихтиёридаги қорамоллар ҳамда бошқа уй ҳайвонларининг турли мавсумий касалликларга чалиниш ҳолатларининг олдини олишга қаратилган режавий чора-тадбирлар амалга оширилмоқда.

Айни пайтда туман ветеринария ва чорвачиликни ривожлантириш бўлимида 28 нафар малакали мутахассислар фаолият олиб боришмоқда. Ҳудудлардаги витеринария бўлинмаларида 18 нафар ветеринария мутахассислари иш юритишмоқда. Ўтган 2021 йил давомида бўлим томонидан Қорақалпоғистон Республикаси Ветеринария ва чорвачиликни ривожлантириш қўмитаси томонидан белгиланган режа-тадбирлари асосида чорва молларини касалликларга қарши эмлаш ишлари олиб борилди. Хусусан, 50 минг 950 бош йирик шохли, 12 минг 787 бош майда шохли қорамоллар бруцеллёз касаллигига, 177 минг 35 бош майда шохли, 108 минг 810 бош йирик шохли қорамоллар, 2 минг 576 бош эшак куйдирги касаллигига ҳамда 77 минг 185 бош йирик шохли ва 23 минг 630 майда шохли қорамоллар оқсил касаллигига қарши эмланди.

Қишлоқ хўжалиги ҳайвонларини ҳар хил паразитар касалликларга қарши чўмилтириш бўйича самарали ишлар олиб борилиб, 162 минг 342 бош йирик шохли ва 1 минг 148 бош майда шохли молларда чўмилтириш ва терисини тозалаш ишлари амалга оширилди.

Туманида 2021 йил барча тоифадаги хўжаликларда 171,5 минг бош қорамоллар мавжуд бўлиб, шундан 49,1 минг боши сигирлардан иборат. Хусусан, чорвачилик хўжаликларида ҳозирги вақтда жами 4,1 минг бош қорамоллар мавжуд бўлиб, шундан 1,7 минг боши сигирлардир.

Ўтган йилда туманимизда наслдорликни ошириш бўйича олиб борилаётган ишлар натижасида наслдор молларни кўпайтириш, наслини яхшилаш, самарадорлигини ошириш, иқлим шароитига мослаштиришга алоҳида эътибор қаратилди. Амалга оширилиши режалаштирилган чорвачилик лойиҳалари ҳисобидан чет давлатлардан маҳаллий шароитга мослашувчан 485 бош наслли қорамоллар олиб келиниб, парвариши йўлга қўйилди. Натижада туманимизда йил давомида чорвачилик маҳсулотлари ишлаб чиқариш салмоғи ошди, барча тоифадаги чорвачилик хўжаликларида тирик вазнда 10.1 тонна гўшт, 35,3 тонна сут маҳсулотлари етиштирилди.

Озуқабоп экинларини жойлаштириш, чорвачилик озуқа базасини мустаҳкамлаш ҳамда ерлардан самарали фойдаланиш мақсадида ўтган 2021 йилда чорвачилик хўжаликларига ажратилган 1 минг 514 гектар асосий майдонларга, жумладан, 482 гектарга беда пичани учун, 361 гектарга кўк масса учун, 252 гектар ерга силос учун маккажўхори, 168 гектар оқ жўхори, 85 гектар ерга хашаки лавлаги экинлари турлари экилди.

Чорвачилик хўжаликлари томонидан 2021 йилда экилган озуқабоп экин майдонларида белгиланган агротехник тадбирларни ўз вақтида амалга ошириш ҳисобига жами 10280 тонна озуқа бирлиги яратилиб, 2276 тонна беда пичани, 982 тонна беда кўк ўт массаси, 396 тонна хашаки лавлаги, 979 тонна оқ жўхори дони, 733 тонна оқ жўхори пояси, 4915 тонна силос учун яшил маккажўхори пояси етиштирилиб, бу озуқабоп экинларнинг асосий қисми такрорий экин сифатида экилди. Шунингдек, “Полвонвой овули” масъулияти чекланган жамияти томонидан 1,5 тонна озуқабоп маҳсулот етиштиришга мўлжалланган замонавий гидропоника цехи ишга туширилиб, қорамолларнинг озуқа базасини мустаҳкамлаш имкони яратилди.

Амударё туман Ветеринария ва чорвачиликни ривожлантириш бўлими ходимлари иқтисодиётимиз ривожи ва халқимиз фаровонлигига ҳисса қўшиш йўлида самарали меҳнат қилмоқдалар.

Робия ЙЎЛДОШЕВА.