АМУДАРЁДА ЁҒ-МОЙ ИШЛАБ ЧИҚАРИШ ЙЎЛГА ҚЎЙИЛАДИ
Амударё туманида масъулияти чекланган жамият шаклидаги “Amudaryotex” хорижий корхонасида пахтачилик-тўқимачилик кластери ташкил этилганлиги соҳада муҳим юксалишларга асос бўлмоқда. Кластер тизими пахтани экишдан то ҳосилидан тайёр маҳсулот ишлаб чиқаришгача бўлган жараёнларни ягона технологик занжирга бирлаштиради. Бунда илм-фан, ҳамда ишлаб чиқариш интеграцияси чуқурлашади, янги инновацион технолонияларни амалиётга жорий этишга қулай шароит яратилади.
Пахтачилик-тўқимачилик кластери ер майдонларида интенсив технологияларни ишлаб чиқаришга кенг жорий этиш орқали пахтачиликдан юқори ҳосил олиниб, фермер хўжаликлари иқтисодиёти барқарорлашди. Техник таъминоти яхшиланиб, қишлоқ хўжалиги меҳнаткашлари моддий манфаатдорлиги ошишига асос бўлмоқда.
Ушбу пахтачилик-тўқимачилик кластери туманимиз фермер хўжаликларида етиштирилган пахтани қайта ишлаш учун собиқ “Амударё пахта тозалаш заводи”нинг бино ва иншоотларини беш йил муддатда тўлаш шарти билан сотиб олиб, ўз таркибига қўшди. Ҳозирги кунгача мазкур заводда тозаланиб, чигитидан ажратилиб, тола ҳолига келтирилган пахтадан “Amudaryotex” хорижий корхонасида калава ип тайёрланиб, чигити четга сотилаётган эди.
Айни кунларда кластер корхонада ушбу чигитлардан ёғ-мой ишлаб чиқариш мақсадида 4 миллион 300 минг долларлик лойиҳани ишга тушириш учун саъй-ҳаракатлар олиб борилмоқда.
Лойиҳага мувофиқ зарур ускуналар, технологияларни олиб келиб ўрнатиш ишлари қизғин давом этмоқда. Технологияларни ўрнатиш ишларига малакали мутахассислар жалб этилган бўлиб, уларнинг унумли ишлашларига зарур шароитлар яратилган. Лойиҳа қурилиши тугалланса, пахтачилик-тўқимачилик кластерида пахтадан маҳсулот ишлаб чиқариш турлари яна биттага кўпаяди. Йилига 10 минг тонна ўсимлик мойи ишлаб чиқариш қувватига эга лойиҳа қурилиши тугалланса, бу ерда яна 100 та янги иш ўрни яратилади.
Масъулияти чекланган жамият шаклидаги “Amudaryotex” хорижий корхона пахта-тўқимачилик кластерида келгусида амалга оширилиши мўлжалланаётган режалар талайгина. Хусусан, 2024-2025 йилларда 5 миллион погонометр калава ип ишлаб чиқариш, 2025-2026 йилларда ишлаб чиқарилган калава ипларни тўқимачилик маҳсулотларига айлантириш каби лойиҳалар ҳам кўзда тутилган. Яъни деҳқонларимиз етиштирган пахта ҳосили шу ернинг ўзида тозаланади, тола ишлаб чиқарилиб, тола калава ипга айлантирилиб, тўқимачилик маҳсулоти, яъни газлама ишлаб чиқарилади. Натижада яна қўшимча 2 минг ишчи ўрин яратилади, маҳсулот экспорти кўлами ҳам ортади. Бу ўз-ўзидан аёнки, ушбу жараёнларда иштирок этадиган деҳқонлар-у ишчиларнинг манфаатдорлиги ортади, турмуши яна ҳам фаровон бўлади.
Кластер корхонасининг моддий қўллаб-қувватлаши натижасида жорий йилда ҳам пахтадан мўл ҳосил етиштириш учун пухта замин яратилди, ерлар лазерь ускунаси ёрдамида текисланиб, суғорилмоқда, экиш мавсумига техникалар таъмирланиб тайёрланди, пахтани зарарли ҳашаротлардан, касалликлардан ва ёввойи ўтлардан биологик ҳимоя қилиш чора-тадбирлари олиб борилмоқда.
Бу ўз навбатида туманимиз иқтисодиёти юксалишига, халқимиз турмуши сифати яхшиланишига муҳим ҳисса бўлиб қўшилади.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
