Амударёлик Шаҳзод Солиев – Ўзбекистон чемпиони!
Мамлакатимизда болалар спортини ривожлантиришга қаратилаётган эътибор туфайли ўз қобилиятларини амалда намоён этиб, турли нуфузли спорт мусобақаларида совринли ўринларни эгаллаб келаётган ёшлар сафи тобора ошмоқда.
Дурунки маҳалласида туғилиб ўсган Шаҳзод Солиев спортнинг стол тенниси билан шуғулланишни бошлаганида ҳали жуда кичкина, 5-6 яшар болакай эди. 36-сонли умумтаълим мактабида жисмоний тарбия фани ўқитувчиси бўлган бобоси Солий Йўлдошев неварасининг қизиқишлари билан шахсан ўзи жиддий шуғуллана бошлади. Уйида невараси учун теннис столи ўрнатиб, унинг ҳар бир ҳаракати, интилишларини эринмай кузатиб борди, шу билан бирга, машғулотлар узвийлигини таъминлашга алоҳида эътибор қаратди.
Шаҳзод аввал оилавий мусобақаларда дадасини, кейинчалик бобосини эпчилликда ортда қолдирди. Ўзи таълим олаётган 36-сонли мактабда эса синфлараро ва ҳудудий мусобақаларда доимий ғолиблар сафидан жой олди.
10 ёшидан туман Болалар-ўсмирлар спорт мактабининг стол тенниси тўгарагига қатнай бошлаган Ш.Солиев тўгарак раҳбари Ҳамида Ражабовадан бу нозик спорт турининг сир-асрорларини ўрганди. БЎСМда ўтказилган стол тенниси мусобақаларида, туман биринчилигида фаол иштирок этиб, мунтазам равишда юқори ўринларни эгаллади.
Неварасидаги стол теннисига бўлган қизиқишни рағбатлантириш мақсадида Солий ота Йўлдошев уни 2017 йилда Нукус шаҳридаги олимпия заҳиралари коллежига олиб борди. Коллежда танлаган йўналиши бўйича маҳорат ва эпчиллик ҳамда тест синовларидан муваффақиятли ўтган Ш.Солиев ўқиш жараёнида нафақат стол тенниси спортининг нозик жиҳатларини, балки спортчига хос бўлган маданиятни, шу билан бирга умумтаълим фанларини пухта ўрганди. Қисқа фурсат ичида у намунали, интизомли хулқи, билимдонлиги билан ва стол тенниси бўйича моҳир спортчи сифатида танилди.
Яқинда, баҳор байрамлари арафасида Ш.Солиев устозлари учун муносиб совға ҳозирлади. У жорий йилнинг 1-7 март кунларида Фарғона вилоятида, 2004-2006 йилларда туғилган ўсмир ўғил болалар ва қизлар ўртасида стол тенниси бўйича бўлиб ўтган Ўзбекистон чемпионатида энг чиройли ўйин кўрсатиб, 1-ўринни қўлга киритди ҳамда Ўзбекистон Республикаси Спорт ишлари Вазирлиги томонидан 1-Даражали Диплом ва олтин медаль билан тақдирланди.
Ўз йўналиши бўйича Ўзбекистон чемпиони бўлган Ш.Солиевнинг бу ютуғи ўзи таълим олаётган Нукус шаҳридаги олимпия заҳиралари коллежидаги устозлари, таълим олган 36-сонли мактаби ҳамда туман БЎСМдаги устозлари учун ҳам чексиз қувонч бағишлади.
Р.ИБРАГИМОВА, amunews.uz жамоатчи мухбири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
