АМУДАРЁ ТУМАН МАКТАБГАЧА ТАЪЛИМ БЎЛИМИДА “КОРРУПЦИЯ – ЖАМИЯТ КУШАНДАСИ” МАВЗУСИДА ТАДБИР БЎЛИБ ЎТДИ

Ҳозирги кунда дунё миқёсида инсоният учун ҳал этилиши лозим бўлган энг асосий масалалардан бири коррупция муаммосидир. Шу сабабли коррупцияга қарши курашиш ҳамда унинг олдини олиш мақсадида идора ва ташкилотларда ҳуқуқшунослар иштирокида коррупцияга қарши курашиш ва унинг олдини олиш мавзусида давра суҳбатлари, очиқлик ва шаффофликка асосланган йиғилишлар ўтказилиб, бу борадаги муаммолар атрофлича муҳокама қилинмоқда.

Амударё тумани Мактабгача таълим бўлимида бўлиб ўтган тадбирда ҳам бу борада соҳада амалга оширилаётган ишлар, ечимини кутаётган муаммолар атрофлича муҳокама этилди.

Тадбирда Қорақалпоғистон Республикаси Мактабгача таълим вазирлигининг Коррупцияга қарши курашиш комплаэнс назоратни ошириш бўйича бош мутахассиси, Амударё тумани прокуратураси, туман Юридик хизмат кўрсатиш маркази, шунингдек, туман Мактабгача таълим бўлимининг масъул ходимлари ҳамда тумандаги мактабгача таъли ташкилотлари раҳбарлари иштирок этдилар.

Тадбирни Амударё туман Мактабгача таълим бўлими мудири Саида Содиқова очди ва мамлакатимизда тобора долзарб масалага айланиб бораётган коррупцияга қарши курашиш ва коррупциясиз жамият қуриш мақсадида Республикамизда олиб борилаётган ишларга тўхталди.

Тадбирда Мактабгача таълим вазирлиги томонидан коррупцияга қарши курашиш борасида Ўзбекистон Республикаси Қонунчилик базаси ва амалга оширилаётган ишлар юзасидан масъуллар томонидан кенг тушунтиришлар берилди. Бу борада қабул қилинган қонунларнинг мазмун-моҳияти юзасидан Амударё тумани Адлия бўлими бош маслаҳатчиси Жамшид Бекимбетов батафсил сўз юритди.

Йиғилишда Қорақалпоғистон Республикаси Мактабгача таълим вазирлиги, Амударё тумани прокуратураси масъуллари сўзга чиқиб, Коррупцияга қарши курашиш бўйича сўнгги икки йил ичида қабул қилинган Президент Фармон ва Қарорларининг мазмун-моҳияти ҳамда ижросини таъминлаш юзасидан олиб борилаётган ишлар тўғрисида маълумотлар берди.

Жумладан, Президент Фармонлари ва Қарорлари асосида амалга оширилган назорат тадбирлари жараёнида Қорақалпоғистон Республикасида 2020 йилда 90 та коррупцион жиноятлар содир этилган бўлса, 2021 йил давомида 229 та шу турдаги жиноятлар аниқланган. Бу кўрсаткич анча кўпайганининг асосий сабаби қурилиш соҳасидаги талон-тарожлик ва қатор ҳуқуқбузарлик жиноятларининг ўсиши билан боғлиқлиги таъкидланди.

Фақат жорий йилнинг ўзида содир қилинган коррупцион жиноятларнинг 69 таси қурилиш соҳасига тааллуқли бўлиб, 2020 йилда Республикадаги турли даражадаги лавозимли шахсларнинг 54 нафари, турли соҳа ходимларининг 17 нафари, фуқароларнинг 31 нафари ва 2021 йил давомида лавозимли шахсларнинг 202 нафари, турли соҳа хизматчиларининг 94 нафари, фуқароларнинг 54 нафари коррупция билан боғлиқ турли жиноятларни содир қилганлиги учун жиноий жавобгарликка тортилган.

Шунингдек, масъуллар коррупция билан боғлиқ жиноятларнинг 21 таси Ҳалқ таълими вазирлиги соҳасида, 22 таси Мактабгача таълим соҳасида, 5 таси Олий ва ўрта махсус таълим вазирлиги соҳасида, 54 таси ишсиз фуқаролар томонидан содир этилганини қайд этишди.

Тадбирда Мактабгача таълим соҳасида аниқланган коррупцион ҳолатга ҳам тўхталиб ўтилди, бу соҳада жиноий жавобгарликка тортилган 15 нафар шахслардан 3 нафари мактабгача таълим соҳасига ишга киритиш учун пора талаб қилиш, 12 нафари бюджет харажатларини талон-тарож қилиш билан боғлиқ жиноятларини содир этишган.

Тадбир иштирокчилари томонидан Республикада амалга оширилган ишлар билан бир қаторда, коррупцияга қарши курашиш, ўз ечимини кутиб турган масалалар ва тўлиқ фойдаланилмаган имкониятлар бор эканлиги ва келажакда ҳуқуқни муҳофаза қилиш органлари билан биргаликда Қорақалпоғистон Республикаси ҳудудида коррупциянинг ҳар қандай кўринишига қатъий барҳам бериш бўйича фикрлар билдирилди.

Бу каби тадбирларни ўтказишдан мақсад соҳа вакилларининг ҳуқуқий саводхонлигини ўстириш, ва шу орқали коррупция каби жамият кушандасига қарши оммавий курашишни янада кучайтиришдан иборатдир.

Робия ЙЎЛДОШЕВА.