Меҳнат ярмаркалари ва сайёр қабул ўтказилди

15 апрель куни Амударе тумани Қиличбой маданият маркази ҳовлисида алимент тўловларидан қарздорлиги бўлган ишсиз фуқаролар учун бўш иш ўринлари ярмаркаси ўтказилди. Ярмаркада 64 та корхона ва ташкилотлар 257 та бўш иш ўринлари билан қатнашдилар. Мазкур меҳнат ярмаркасида 22 нафар бандлиги таъминламаган фуқароларга ҳамда алимент тўловидан қарздорлиги бўлган 1 нафар фуқарога доимий ишга жойлашишлари учун йулланмалар берилди.

Шунингдек, мазкур меҳнат ярмаркаси иштирокчиларига туман Аҳоли бандлигига кўмаклашиш маркази мутахассислари томонидан меҳнатга оид масалаллар юзасидан маслаҳат ва тушунтиришлар берилиб, ҳуқуқий ёрдамлар кўрсатилди.

Бундан ташқари, ярмаркада тумандаги турли ишлаб чиқариш субъектлари томонидан тайёрланган маҳсулотлар кўргазмаси ҳам намойиш этилди.

Ярмаркадан сўнг меҳнат миграциясидан қайтиб келган фуқароларнинг бандлигини таъминлаш, уларнинг оила аъзолари ҳолидан хабар олиш, муаммолари ва эҳтиёжларини ўрганиш хамда ҳал этилишига кўмаклашиш, шунингдек, уларнинг моддий, ижтимоий аҳволини яхшилаш мақсадида сайёр қабул бўлиб ўтди.

Унда Қорақалпоғистон Республикаси Бандлик ва меҳнат муносабатлари вазири ўринбосари Ўсербай Казаков, секторлар, тегишли корхона ва ташкилотлар раҳбарлари, шунингдек овул ҳудудида истиқомат қилувчи аҳоли вакиллари иштирок этишди.

 Қабул давомида Ўсербай Казаков Россия ва Европа мамлакатларига ишлаш учун кетаётган меҳнат мигрантларига оид қонун-қоидалар ва уларнинг ҳуқуқлари ҳақида кенг турда тушунчалар берди.

Мазкур сайёр қабулда аҳолидан 13 та мурожаат келиб тушган бўлса, шундан 5 та мурожаат эгасига ҳуқуқий маслаҳатлар берилди. 7 та мурожаат вақт талаб қилганлиги сабабли вазирлик назоратига олинди.

Шу каби меҳнат ярмаркаси 16 апрель куни туманимизнинг Дўстлик маҳалласи ҳудудида жойлашган “Amudaryotex” хорижий корхонаси биноси олдида ҳам бўлиб ўтди. Ярмаркада алимент тўловларидан қарздорлиги бўлган ишсиз фуқаролардан ташқари, бандлиги таъминланмаган аёл-қизлар ва ёшлар ҳам иштирок этишди.

Ўтказилган ярмарка доирасида 72 та корхона 280 та иш ўрни билан қатнашиб, фуқароларга мавжуд бўш иш ўринлари, номзодларга қўйилган малакавий талаблар ҳақида маълумот бериб, ишга таклиф қилдилар.

Ярмаркада ишсиз фуқароларнинг бандлигини таъминлаш, ижтимоий муҳофазага муҳтож шахсларни турли касбларга тайёрлаш мақсадида Ўзбекистон Республикаси Бандлик ва меҳнат муносабатлари вазирлиги ҳузурида ташкил этилган касб-ҳунарга ўқитиш марказларига ўқишга юбориш ва тумандаги ободонлаштириш корхонаси ва маҳаллаларда ташкил этилган ҳақ тўланадиган жамоат ишларига жалб қилиш тартиби ҳақида ҳам тушунчалар берилди. 

Ярмарка давомида малакали мутахассислар томонидан бандлик соҳасида фуқароларни қизиқтирган масалалар бўйича ҳам маслаҳатлар берилиб, ҳуқуқий ва амалий ёрдамлар кўрсатилди.

Шу ўринда айтиш керакки, ҳаётда тўғри касб танлаш муваффақиятли келажакнинг гаровидир. Чунки инсоннинг аксарият вақти иш жараёнларида ўтади. Шу сабабдан ҳам киши ўзи учун севимли ҳунарни ўрганиши, ўзига ёққан касб билан шуғулланиши керак.

Бу каби ярмаркаларнинг давомли ташкил этилиши, ишсиз фуқароларимиз учун ўзларига муносиб иш ўрни топишларида ҳамда жамиятда ўз ўринларига эга бўлишларида муҳим аҳамият касб этади.

Туман ҳокимлигининг Ахборот хизмати