76-сонли мактабда “Беш муҳим ташаббус” доирасидаги тадбирлар юқори савияда ўтказилмоқда

Бугунги кунда мамлакатимиз аҳолисининг 30 фоизини 14 дан 30 ёшгача бўлган ёшлар ташкил этади. Келажагимиз эгалари ҳар томонлама соғлом, билимли, етук, бир сўз билан айтганда, тараққиётимизга хизмат қиладиган авлод бўлиши, замонавий билим, касб-ҳунарларни, ахборот технологияларини пухта эгаллаши учун замонавий шароит ва имкониятлар яратилган. Шу билан бирга, ёшларнинг бўш вақтини мазмунли ўтказишни ташкил этиш долзарб масала ҳисобланади.

Ҳар бир оилада ота-оналар фарзандини тарбиялаб вояга етказиш жараёнида бадантарбия билан шуғулланишга, расм чизишга, санъатга ошно этишга, уй юмушларига қўл солишга ўргатади.

Оиладаги бу тарбияни мактабда изчил давом эттириш болаларнинг қобилиятларини ривожлантириш учун Муҳтарам Президентимиз томонидан илгари сурилган “Беш муҳим ташаббус” доирасидаги тадбирларни мунтазам равишда ўтказиш талаб қилинади.

Амударё туманидаги 76-сонли умумтаълим мактабида ҳам “Беш муҳим ташаббус” доирасидаги тадбирлар юқори савияда ўтказилиб келинмоқда.

Биринчи ташаббус − ёшларнинг мусиқа, рассомлик, адабиёт, театр ва санъатнинг бошқа турларига қизиқишларини оширишга, истеъдодини юзага чиқаришга, фарзандларимизни санъатга ошно қилиб, юксак дид соҳиби этиб тарбиялашга хизмат қилади. Мактаб ўқувчилари турли танловларда қатнашиб мазкур йўналишда ўз иқтидорларини намоён қилиб келмоқдалар.

Иккинчи ташаббус − ёшларни жисмонан чиниқтириш ҳамда спортдаги қобилиятларини рўёбга чиқариш мақсадида мактаб ўқувчилари ўртасида спортнинг турли йўналишлари бўйича мусобақалар ўтказилиб, спортчи ёшлар аниқланмоқда.

 Мактаб маъмурияти томонидан улар муносиб равишда рағбатлантирилиб, туман ва Республика босқичларига йўлланмани қўлга киритишмоқда.

 Учинчи ташаббус − компьютер технологиялари ва интернетдан самарали фойдаланиш йўналишида “Кашфиётчи болалар” тўгараги йўлга қўйилган бўлиб, тўгарак самарали фаолият олиб бормоқда. Тўгаракда ўқувчилар ўзларининг яратувчанлик қобилиятларини янада ривожлантирадилар.

Ёшлар манавиятини юксалтириш, улар ўртасида китобхонликни кенг тарғиб этиш бўйича мактаб ўқувчилари ўртасида “Ёш китобхон” танлови ҳам мунтазам равишда ўтказилиб келинади.

“Беш муҳим ташаббус” доирасида ўтказилаётган ҳар бир тадбир юқори савияда ташкил этилиб, ўқувчилар мактаб маъмурияти томонидан муносиб рағбатлантирилиб борилади.

Ўқувчилар қалбида спортга, санъатга, тил ўрганишга ва китоб ўқишга бўлган қизиқишларини уйғотиш борасида олиб борилаётган турли тадбир ва беллашувлар ўз самарасини бермоқда.

Ижтимоий, маънавий-маърифий соҳалардаги ишларни янги тизим асосида йўлга қўйиш бўйича илгари сурилаётган “Беш муҳим ташаббус” доирасида ўтказилаётган тадбирлар негизида ҳам баркамол авлодни тарбиялашдек эзгу мақсадлар мужассам.

Ф.Эшимбетова