2-сонли касб-ҳунар мактабида “Очиқ эшиклар куни” бўлиб ўтди

Ўзбекистон Республикаси Президентининг 2019 йил 6 сентябрдаги “Профессионал таълим тизимини янада такомиллаштиришга доир қўшимча чора-тадбирлар тўғрисида”ги Фармонига асосан Амударё хизмат кўрсатиш ва сервис касб-ҳунар коллежи негизида Амударё тумани 2-сонли касб-ҳунар мактаби қайта ташкил қилинган эди.

Мазкур ўқув юртида жисмонан соғлом, руҳан ва ақлан ривожланган, мустақил фикрлайдиган, Ватанга содиқ, қатъий ҳаётий нуқтаи назарга эга ёшларни тарбиялаш, уларнинг ижодий ва интеллектуал салоҳиятини қўллаб-қувватлаш ва рўёбга чиқариш, ҳамда битирувчиларни хусусий тадбиркорлик соҳасига жалб этиш мақсад қилинган бўлиб, бу борадаги ишлар изчиллик билан амалга оширилмоқда.

Касб-ҳунар мактабида 24 нафар ўқитувчи ва 13 нафар ишлаб чиқариш таълим усталари ўқувчиларга таълим ва тарбия бериб келмоқдалар.

20 май куни 2-сонли касб-ҳунар мактабида “Очиқ эшиклар куни” бўлиб ўтди. “Очиқ эшиклар куни”га Амударё тумани ҳудудидаги барча умумтаълим мактаблардан 9-синфни тугатаётган ўқувчилар ҳамда уларнинг ота-оналари ташриф буюришди.

Тадбир меҳмонларига касб-ҳунар мактабида таълим олаётган ўқувчи ёшларнинг амалиёт даврида тайёрлаган асбоб-ускуналари, уй-рўзғор буюмлари, панжара эшиклари, майиший техника воситалари, пишириқ ва қандолот, тикувчилик маҳсулотлари кўргазмага қўйилди.

Шунингдек, кўргазмада “Беш муҳим ташаббус” ижроси асосида ташкил қилинган тўгараклар фаолиятидан лавҳалар намойиш қилинди.

Ўқувчилар томонидан намойиш қилинган спорт чиқишлари, тасвирий санъат ҳамда китобхонлик кўргазмалари, бадиий чиқишлар тадбир иштирокчиларида катта тассурот қолдирди.

Маълумот учун айтиш керакки, касб-ҳунар мактабида автомобилларни таъмирлаш чилангари, автомобиль юриш қисмларига техник хизмат кўрсатиш ва таъмирлаш чилангари, тикувчи, пайвандловчи, газ ва сув истеъмол назоратчи оператори, ошпаз, қандолатчи, ҳамда ахборот воситалари машиналари ва компютер тармоқлари оператори йўналишлари бўйича ўқувчилар таълим олишмоқда.

Касб-ҳунар мактабига 2022-2023 ўқув йили учун 7 та йўналишга автомобиль двигателларини ташхислаш ва таъмирлаш, автомобиль электр ва электрон жиҳозларига хизмат кўрсатиш, тикувчилик, пайвандловчи, газ ва сув истеъмол назоратчи оператори, ошпаз-қандолатчи, ахборот воситалари машиналари ва компьютер тармоқлари оператори йўналишлари бўйича 210 нафар ўқувчини қабул қилиш режалаштирмоқда.

“Очиқ эшиклар” кунида малакали устозлар томонидан 9-синф битирувчилари ва уларнинг ота-оналарига ушбу йўналишларда олиб бориладиган таълим дастурлари юзасидан батафсил маълумот берилди.

Шу ўринда айтиш керакки, Республикамизнинг бўйлаб фаолият юритаётган 339 та касб-ҳунар мактабларининг барчасида келгусида ишлаш ва олий таълим муассасаларига ҳужжат топшириш ҳуқуқини берадиган давлат намунасидаги диплом берилади.

Билим олиш билан биргаликда касб-ҳунар эгаллаб, ўзининг тадбиркорлик фаолиятини йўлга қўйишни истовчи ўғил-қизларни 2-сонли касб-ҳунар мактаби ўз бағрига чорлайди.

Ф.Эшимбетова.