1-СОНЛИ МАКТАБДА “ОНА ТИЛИМ — СЕН ФАХРИМ, ҒУРУРИМ” МАВЗУСИДА БАЙРАМОНА ТАДБИР ЎТКАЗИЛДИ
Тил – давлат тимсоли, бебаҳо мулки, миллатнинг руҳи, маданий ва маънавий бойлиги, халқнинг маданияти, урф-одат ва анъаналари ҳамда турмуш тарзининг тарихидир. Шу боис, она тилимизга ҳурмат ва эҳтиром – энг аввало, миллатга, она Ватанга, тарихимизга нисбатан буюк эҳтиром ва эътибор рамзидир.
Шунинг учун ҳам мамлакатимизда 21 октябрь санаси Ўзбек тилига давлат тили мақоми берилган кун – Мустақиллик сари илк дадил қадам қўйилган қутлуғ сана сифатида қадрли. Чунки шу куни ватанимизда давлат тилининг ҳуқуқий асосларини белгилаш бўйича “Давлат тили тўғрисида”ги Қонун қабул қилиниб, унга кўра, ўзбек тилига давлат тили мақоми берилди. Ушбу санада халқимизнинг асрий орзуси ушалди, муқаддас қадриятларимиздан бири бўлган она тилимиз ўзининг қонуний мақоми ва ҳимоясига эга бўлди.
Мана 35 йилдирки, мамлакатимизда 21 октябрь санаси истиқлол сари, ўзликни англаш сари ташланган илк қутлуғ қадам – она тилимизга давлат тили мақоми берилган кун сифатида байрам қилинади. Шу куни таълим-тарбия муассасалари, давлат ва жамоат ташкилотлари она тилимизни шарафловчи шиорлар билан безатилиб, адабиёт ва шеърият байрамлари, китобхонлик кечалари, адабий-мусиқий тадбирлар ўтказилади.
Ушбу қутлуғ сана муносабати билан Амударё туман Мактабгача ва мактаб таълими бўлими тасарруфидаги 1-сонли умумтаълим мактабида ҳам “Она тилим – сен фахрим, ғурурим!” деб номланган маънавий-маърифий тадбир бўлиб ўтди.
Мактаб педагогика жамоаси ҳамда ўқувчи-ёшлар иштирок этган мазкур байрамона тадбирни мактаб директорининг ўқув ишлари бўйича ўринбосари Санобар Муродова очди ва барчани она тили байрами билан муборакбод этди. Шу билан бирга, Санобар Муродова она тилимизнинг йил сайин жаҳон ҳамжамиятида ўз мавқеига эга бўлиб, кўплаб ривожланган давлатларда ўзбек тилини ўрганишга бўлган қизиқиш тобора ортиб бораётгани хусусида тўхталди, муҳтарам Президентимиз энг нуфузли анжуманларда, хусусан, Бирлашган Миллатлар ташкилоти минбаридан туриб ўз она тилимизда нутқ сўзлаганлари ҳақида фахрланиб сўз юритди.
Тадбир давомида мактаб ўқувчилари томонидан она тилимизнинг қадр-қиммати, она тилига эътибор хусусидаги “Фикрлар бекати” мушоираси ташкил этилиб, унда ўқувчилар она тилига оид мақоллар, баҳри байтлар айтишди. Мушоира баҳсида эса ўқувчи-ёшлар она тилини шарафловчи шеърлар айтишиб, саҳна кўринишларини намойиш этдилар.
“Она тилим – сен фахрим, ғурурим” деб номланган мазкур маънавий-маърифий тадбир адабий-бадиий жиҳатдан юксак савияда ўтказилгани боис, ҳар бир қалбда она тилимиздан фахрланиш туйғусини уйғотгани билан муҳим аҳамият касб этди.
Муборак Халиллаева, 1-сонли мактабнинг она тили ва адабиёт фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
