Овқатдан заҳарланиш – ботулизм касаллиги бўйича махсус амалий-тактик ўқув машғулоти ўтказилди

Қорақалпоғистон Республикаси Вазирлар Кенгашининг Раиси – Фуқаро муҳофазаси бошлиғининг 2024 йил 24 январь кунги “Республика аҳолисини ва ҳудудларни фавқулодда вазиятлардан муҳофаза қилиш бўйича 2024 йилда бажарилган тадбирлар якуни ва 2025 йилдаги вазифалар тўғрисида”ги тегишли буйруғига асосан Амударё туманида амалий-тактик ўқув машқи ўтказилди.

19 ноябрь куни “Озиқ-овқат маҳсулотларидан оммавий заҳарланишлар билан боғлиқ касалликларнинг олдини олишда фавқулодда вазиятлар давлат қуйи тузилмаси хизматларининг ҳамкорликдаги ҳаракатлари” мавзусида ташкил этилган мазкур тадбир аввалида тумандаги 38-сонли мактабнинг мажлислар залида семинар ташкил этилди.

Семинарни Амударё туман Фавқулодда вазиятлар бўлими тезкор бўлинмаси бошлиғи, капитан Ахан Утебаев очди ва кун тартибидаги масала юзасидан батафсил маълумотлар берди.

Семинар давомида туман Санитария-эпидемиологик осойишталик ва жамоат саломатлиги бўлими санитария врачи Дармонжон Болтабоева ва бўлим мудири Гулшод Тажибоевалар ботулизм касаллигининг келиб чиқиш сабаблари ҳамда белгилари, уни даволаш усуллари тўғрисида семинар иштирокчиларига зарур тушунчалар бердилар.

Шунингдек, йил давомида овқатдан заҳарланиш ҳолатидан шикоят қилган беморлар орасида вояга етмаган ёш ўсмирлар кўпчиликни ташкил қилиши, бозорлардаги консерва маҳсулотларини харид қилишда сақланиш муддати ўтган-ўтмаганлигини текшириш, уйда қўлбола усулда помидор ва бодринглардан банка ёпишда санитария қоидалари ва озодаликка риоя қилиш, уларни истеъмол қилишдан олдин суви, таъми ва ҳиди ўзгармаганлигига асосий эътиборни қаратиш, ўзгарган маҳсулотларни истеъмол қилмаслик тўғрисида ҳаётий мисоллар орқали маълумотлар тақдим этилиб, ўқув машқи иштирокчиларига мавзуга оид эслатмалар тарқатилди.

Ўқув машқининг амалий қисмида туман Тез тиббий ёрдам бўлимига Бўстон маҳалласининг Гулзор кўчасида жойлашган уйлардан биридан шартли чақирув келиб тушди. Шифокорлар ўз уйида қўлбола усулда тайёрланган тузланган маҳсулотларни истеъмол қилган оила аъзоларидан бирининг соғлиги ёмонлашгани сабабли шартли беморни ботулизм касаллигига чалинган деб гумон қилиб, туман Тиббиёт бирлашмасига олиб кетишди. Сўнгра ўқув машқи иштирокчилари шартли беморга тиббий муолажа қилиш жараёни билан яқиндан танишиб, амалий кўрсатмалар олдилар.

Ўқув машқи давомида туман Санитария-эпидемиологик осойишталик ва жамоат саломатлиги бўлими ходимлари воқеа жойини ўрганишди ва қўлбола усулда тайёрланган консерва маҳсулотларидан намуналар олиб, лабораторияда текширишди. Шундан сўнг Бўстон маҳалласи ҳудудидаги хонадонларда яшовчи аҳоли иштирокида профилактик суҳбатлар ўтказилиб, ботулизм касаллигидан сақланиш юзасидан эслатмалар тарқатилди.

Ўқув машқига жами 60 нафарга яқин аҳоли, 4 та махсус техникалар жалб қилинди. Ўтказилган тадбир натижаларига кўра, фуқаро муҳофазаси гуруҳларининг ҳолати фавқулодда вазиятларга “чекланган тайёр”, деб баҳоланди.

Амударё туман Фавқулодда вазиятлар бўлими