Қорақалпоқ тилига давлат тили мақоми берилганининг 35 йиллиги кенг нишонланди

1989 йил 1 декабрь куни қорақалпоқ тилига давлат тили мақоми берилган бўлиб, бу йил ушбу санага 35 йил тўлмоқда. Сана муносабати билан Республика бўйлаб кенг кўламли байрам тадбирлари, қорақалпоқ тили ва адабиёти кечалари ташкил этилиб, байрам кўтаринки руҳда нишонланди.

Амударё туманида ҳам ушбу сана муносабати билан катта байрам тадбири ташкил этилди. Туман Маданият бўлимида ўтказилган тадбир аввалида Ўзбекистон ва Қорақалпоғистон Республикаларининг давлат мадҳиялари янгради.

Тадбирда туман ҳокимининг биринчи ўринбосари – иқтисодий тараққиёт ва камбағалликни қисқартириш бўлими бошлиғи Фаҳриддин Юсупов сўзга чиқиб, ўз миллий тилимизнинг қудратини, унинг бой маданиятини ва асрлар давомида сақланиб келган қадриятларини улуғлаб, уларни асраб-авайлаш ҳар биримизнинг бурчимиз эканлигини таъкидлади ҳамда унинг ривожи йўлида амалга оширилаётган ишлар ҳақида тўхталиб, барчани байрам билан табриклади.

Фаҳриддин Юсупов ўз нутқида қорақалпоқ тили — бу нафақат она тилимиз, балки унда катта тарих, улуғ аждодларимиздан, ота-боболаримиздан бизга ўтган улкан мерос мужассамланганини, қорақалпоқ тили ўзининг қудрати билан миллатимизнинг маданияти, тарихий тажрибаси ва дунёқарашини акс эттиришини, у ҳар бир сўзи, ҳар бир ибораси орқали халқимизнинг руҳини, маънавий қадриятларини намоён қилишини таъкидлади.  Шунингдек, бугун туманимизда қорақалпоқ тилининг равнақи ва тараққиёти учун фидокорона ҳаракат қилаётган барча муаллимлар, тадқиқотчилар ва тилимизга ғамхўрлик кўрсатган ҳар бир инсонга чуқур миннатдорчилик билдирди.

Дарҳақиқат, ҳар биримиз ўз тилимизга бўлган муҳаббатимизни янада мустаҳкамлаш, унинг ёрдамида келажак авлодга соф, бой ва қудратли тилни мерос қолдириш учун ўз ҳиссамизни қўшишимиз лозим.

Байрам тадбири туман Маданият бўлими хонандалари ижросидаги бетакрор куй-қўшиқлар билан давом этди. Туманимизнинг умидли ижодкорлари ўзбек ва қорақлпоқ тилларида Ватан, тинчлик, дўстликни мадҳ этувчи куй-қўшиқлар ижро этдилар.

Қайд эриш жоизки, қорақалпоқ тили туркий тиллар оиласининг қипчоқ гуруҳига киради. У қозоқ ҳамда нўғой тилларига яқин. Тилда шимоли-шарқий ва жануби-ғарбий лаҳжалар бор. Бугунги кунда 500 минг кишидан кўпроқ аҳоли қорақалпоқ тилида мулоқот қилади. Қорақалпоқ ёзуви 1928 йилгача араб алифбоси асосида ёзилган бўлса, кейинчалик лотин алифбосига ўтилган. 1940 йилда кирилл ёзуви жорий қилинган бўлса, 1994 йилда лотин алифбоси асосидаги ёзув қоидалари ишлаб чиқилган.

Таъкилаш керакки, бугунги кунда қорақалпоқ тилини ривожлантириш, уни ҳар томонлама қўллаб-қувватлаш учун давлатимиз ва жамиятимиз томонидан кўплаб самарали ишларнинг амалга оширилаётганига барча жабҳаларда гувоҳ бўлиш мумкин. Келажакда ҳар биримиз қорақалпоқ тилини нафақат мамлакатимизда, балки дунёнинг бошқа мамлакатларида ҳам эътироф этилган, ўрганилган ва қадрланган тилга айлантиришга интилишимиз лозим.

Азиз юртдошлар, қорақалпоқ тилига давлат тили мақоми берилганининг 35 йиллик байрами барчангизга муборак бўлсин! Қорақалпоқ тилига бўлган муҳаббатимиз абадий бўлсин!

Чарос Арслонова, туман ҳокимлигининг Ахборот хизмати раҳбари.