Кўчангизни асфальт қилиш, стадион, болалар майдончаси қуриш керакми? “Ташаббусли бюджет”га лойиҳа киритишга шошилинг!

Кейинги йилларда аҳолини бюджет жараёнига кенг жалб қилиш, фуқароларнинг ўзи яшаётган ҳудудидаги муаммоларнинг ҳал этилиши бўйича ўз ташаббуси билан таклифлар киритиши, шунингдек, бюджет маблағларининг бир қисмини жамоатчилик фикри асосида йўналтириш бўйича бир қанча ишлар амалга оширилмоқда. Бу борада “Ташаббусли бюджет” лойиҳаси яқиндан ёрдам бермоқда.

Хабарингиз бор, “Ташаббусли бюджет”нинг 2025 йилги 1-мавсуми 1 февралдан бошланиб, 20 мартга қадар давом этади. Эслатиб ўтамиз, бунда лойиҳа киритиш босқичи 1–20 февраль кунлари бўлиб ўтади. Саралаш босқичи эса 21 февраль – 7-март кунлари ўтказилади. Шунингдек, тарғибот босқичи 8–10 март, овоз бериш босқичи эса 11–20 март кунлари ўтказилади. Шу тариқа, 1-мавсум ғолиблари 21 март — Наврўз байрами куни эълон қилинади.

Лойиҳаларни молиялаштириш учун ушбу мавсумга 2 триллион 271 миллиард сўм ажратилган. Шунингдек, ҳар йили туман ва шаҳар бюджетидан 10 тадан кам бўлмаган, кўпи билан 30 та лойиҳа учун етарли маблағ ажратилиши белгиланган. Бунда 10 тадан ортиқ лойиҳа учун маблағлар туман ёки шаҳар аҳолисининг тегишли ҳудуддаги улушидан келиб чиқиб тақсимланади. Шу билан бирга, Президентнинг 2024 йил 25 декабрдаги қарорига асосан Ташаббусли бюджет жараёни учун туман (шаҳар)ларда ажратиладиган маблағлар миқдорини режалаштиришда ҳудуддаги аҳоли сонидан келиб чиқиб тақсимлаш назарда тутилган.

Ҳозирги кунда лойиҳаларнинг энг юқори чегаравий қиймати 1,5 миллиард сўмни ташкил этади. Шунга кўра, туман ва шаҳар бюджетидан ажратиладиган маблағларнинг энг кам миқдори 15 миллиард сўм, энг юқори миқдори эса 45 миллиард сўм этиб белгиланди.

Ён-атрофдаги камчиликларга кўз юммаслик, жамият ҳаётига, ислоҳотларга даҳлдорлик ҳисси, ўз ҳудудидаги муаммоларнинг ҳал бўлишида фаол иштирок этиш ҳар бир инсон учун муҳим вазифа. Шундай экан, сиз ҳам “Ташаббусли бюджет” жараёнларида ташаббус кўрсатинг, фаол бўлинг!

Манба: daryo.uz