ОАВ ВАКИЛЛАРИНИНГ САЙЁР ҚАБУЛИ БЎЛИБ ЎТДИ

Амударё тумани Оқ олтин овулида оммавий ахборот воситалари вакилларининг сайёр қабули бўлиб ўтди. Унда “Қорақалпоғистон” телеканали муҳаррирлари, бўлим бошлиқлари ҳамда аҳоли вакиллари иштирок этдилар. Мазкур тадбир аҳолининг долзарб муаммоларини жойида ўрганиш, фуқароларни қийнаётган масалаларни ижтимоий муҳокамага олиб чиқиш ва уларнинг ечимига кўмаклашиш, “Қорақалпоғистон” телерадиоканалини янада ривожлантиришда халқнинг фикрини ва таклифларини тинглаш мақсадида ташкил этилди.

Сайёр қабулда “Қорақалпоғистон” телеканали катта муҳаррири Алтингул Отениязова, телеканалнинг Архив бўлими бошлиғи Парахат Тўреев, телеканал муҳаррирлари Хурлиман Машарипова ҳамда Ислам Даулетназаровлар аҳоли билан очиқ мулоқот қилди.

Таъкидлаш керакки, Қорақалпоғистон Республикаси телерадиоканали минтақанинг ижтимоий, маданий ва сиёсий ҳаётини ёритувчи муҳим ахборот манбаларидан биридир. Сўнгги йилларда ушбу медиа тизимини модернизация қилиш, техник базасини мустаҳкамлаш ва профессионал кадрлар салоҳиятини ошириш бўйича қатор ишлар амалга оширилмоқда.

Давлатимиз раҳбарининг ахборот сиёсатини такомиллаштириш борасидаги ташаббуслари доирасида Қорақалпоғистон телерадиокомпаниясининг фаолиятини замон талаблари асосида ташкил этиш, контент сифатини ошириш ҳамда рақамли технологияларни жорий қилиш бўйича кенг кўламли ишлар бошлаб юборилди.

Аввало, телеканалнинг техник имкониятлари тубдан янгиланмоқда. Янги замонавий камералар, монтаж ускуналари, овоз ва видео узатиш технологиялари жорий этилиши орқали эфир сифати сезиларли даражада ошди. Бу эса нафақат томошабинлар учун қулайлик яратмоқда, балки журналистлар ва режиссёрлар учун ҳам ижодий имкониятларни кенгайтирмоқда.

Сайёр қабул давомида журналистлар телеканални янада ривожлантириш юзасидан аҳоли таклифларини тингладилар ҳамда раҳбариятга етказиш учун қайд этиб бордилар. Шунингдек, жараён мобайнида турли соҳаларга оид мурожаатларни тинглаб, уларни ёритиш ва мутасадди ташкилотлар билан ҳамкорликда ҳал этиш бўйича иш олиб бордилар. Қабулда асосан ижтимоий инфратузилма, уй-жой масалалари, коммунал хизматлар, бандлик, тиббиёт ва таълим соҳаларига оид мурожаатлар келиб тушди.

Тадбирда қатнашган ОАВ вакиллари аҳолининг фикрини эшитибгина қолмай, жойлардаги муаммоларни журналистик суриштирув орқали ёритиш, уларни кенг жамоатчиликка ҳавола этиш ва муаммоларга мутасаддилар эътиборини қаратиш борасида аниқ режаларни белгилаб олдилар.

Шунингдек, қабул доирасида фуқароларга оммавий ахборот воситаларига мурожаат қилиш тартиби, ахборот олиш ҳуқуқлари ва матбуот эркинлиги борасида тушунтиришлар берилди.

Бу каби сайёр қабуллар, бир томондан, халқ билан очиқ мулоқотни кучайтирса, бошқа томондан, журналистларнинг масъулиятини ошириб, жамиятдаги муаммоларни тезкор ёритиш ва ҳал этишга хизмат қилади.

Тадбир якунида ОАВ вакиллари келиб тушган мурожаатлар бўйича таҳлилий материаллар тайёрлаб, уларни тегишли расмий идораларга юбориш бўйича чора-тадбирлар белгилаб олинди.

Чарос Арслонова, туман ҳокимлигининг Ахборот хизмати раҳбари.