Туман Прокуратураси томонидан коррупцияга қарши курашиш бўйича тарғибот-ташвиқот ишлари кучайтирилмоқда
Жорий йилнинг 5 май куни Ўзбекистон Республикаси Президенти иштирокида Коррупцияга қарши курашиш миллий кенгашининг йиғилиши ўтказилиб, унда мамлакатимизни коррупциядан холи ҳудудга айлантириш, ҳар қандай кўринишдаги бюрократик тўсиқларга барҳам бериш бўйича ҳуқуқни муҳофаза қилиш органлари, шу жумладан, барча бўғинлардаги раҳбарлар олдига кечиктириб бўлмайдиган долзарб вазифалар юкланган эди. Унга кўра, белгиланган вазифалар ва топшириқлар ижросини таъминлаш мақсадида барча соҳаларда коррупцияга қарши курашиш фаолиятининг мезонларини ўзида мужассам этган “Йўл харитаси” ишлаб чиқилиб, амалиётга жорий этилди. Ушбу “Йўл харитаси” асосида прокуратура органлари томонидан соҳага оид фаолият мувофиқлаштирилиб, кенг кўламда назорат тадбирлари ва тарғибот-ташвиқот ишлари самарали тарзда олиб борилмоқда.
Амударё тумани прокуратураси томонидан ҳам “Йўл харитаси”да белгиланган вазифалар ижросини таъминлашга қаратилган назорат тадбирлари ҳамда коррупцияга қарши курашиш бўйича тарғибот-ташвиқот ишлари ўтказилиб, фуқароларнинг ҳуқуқий саводхонлигини оширишга йўналтирилган кўргазмали-амалий тадбирлар ташкиллаштириш, бу тадбирларга кенг аҳоли вакиллари жалб этилмоқда.
Хусусан, туман прокуратураси томонидан очиқлик ва шаффофлик асосида ўтказилаётган назорат тадбирларида аниқланган коррупциявий ҳолатларга нисбатан жазонинг муқаррарлигини таъминлаш, порахўрлик, фирибгарлик, товламачилик ва одам савдоси билан боғлиқ жиноятларнинг олдини олиш мақсадида туманнинг энг чекка ҳудудларидаги кенг аҳоли қатламлари ўртасида мунтазам равишда тушунтириш ва тарғибот ишлари амалга оширилмоқда.
20 август куни Амударё тумани прокурори Баҳром Машарипов раҳбарлигида туман электр ва газ таъминоти корхоналари масъуллари ва ишчи-ходимлари иштирокида коррупциянинг олдини олиш бўйича ташкиллаштирилган тарғибот-ташвиқот тадбири ҳам мазкур “Йўл харитаси”да белгиланган вазифалар ижроси доирасида ташкил этилди.
Тадбирда туман прокурори Баҳром Машарипов иштирокчиларга Ўзбекистон Республикаси Президенти ҳузуридаги Коррупцияга қарши курашиш агентлиги томонидан давлат органлари ва ташкилотларида манфаатлар тўқнашуви бўйича қонун талабларига амал қилиниши ҳолати юзасидан олиб борилган текширувлар жараёнида кўплаб қонунбузилиш ҳолатлари учраётгани, бу каби салбий ҳолатларга қарши курашиш ҳар бир виждонли кишининг бурчи эканлигини таъкидлади.
Маълумот ўрнида айтиш керакки, жорий йилнинг ўтган даври мобайнида мамлакатимизда манфаатлар тўқнашуви билан боғлиқ 344 та ҳолат аниқланиб, улардан 224 тасига жарима жазолари қўлланилган. Манфаатлар тўқнашувига йўл қўйилган ҳолатларнинг асосий қисми маҳаллий ҳокимликлар, қишлоқ хўжалиги, ёшлар сиёсати, мактабгача ва мактаб таълими, молия ва тиббиёт муассасалари ходимлари ҳисобига тўғри келади. Бу каби ҳуқуқбузарликлар, афсуски, бизнинг туманимизда ҳам йўқ эмас.
Туман прокурори Баҳром Машарипов тадбир иштирокчиларини жамият учун жиддий хавф туғдирувчи коррупция иллатига қарши якдиллик билан курашишга даъват этди.
Шундан сўнг тадбир иштирокчилари учун коррупциянинг салбий оқибатлари ҳақидаги ҳужжатли видеоролик намойиш этилди. Тадбир давомида давлат органлари ва ташкилотларида очиқлик ва шаффофликни таъминлаш, хизмат интизоми ва масъулиятни кучайтириш, жамоатчилик билан ҳамкорликда профилактик ишлар олиб бориш, коррупция ҳолатларининг олдини олиш бўйича аниқ вазифалар белгилаб олинди ҳамда электр ва газ таъминоти корхоналари раҳбарлари ҳамда ишчи-ходимларига зарур тушунча ва тавсиялар берилди.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
