ЎҚИТУВЧИЛАР ОЛИМПИАДАСИНИНГ ТУМАН БОСҚИЧИ ЎТКАЗИЛДИ

Умумий ўрта таълим ташкилотларининг математика, информатика ва ахборот технологиялари, биология фанлари ўқитувчилари базасини шакллантириш мақсадида Ўзбекистон Республикаси Мактабгача ва мактаб таълими вазирлигининг 2025 йил 2 июлдаги буйруғига асосан Вазирлик тизимидаги барча умумтаълим мактабларининг ушбу фанлар ўқитувчилари ўртасида Республика олимпиадасининг туман босқичи ташкиллаштирилиб, муваффақиятли тарзда ўтказилмоқда.

Жорий йилнинг 22-23 август кунлари Амударё тумани Мактабгача ва мактаб таълими бўлими тасарруфидаги 1-сонли мактаб биносида ҳам мазкур олимпиаданинг туман босқичи бўлиб ўтди.

Ўқитувчилар олимпиадасида тумандаги 86 та умумий ўрта таълим мактаби ва ихтисослаштирилган мактабдан жами 143 нафар, жумладан, математика фани бўйича 72 нафар, информатика ва ахборот технологиялари фани бўйича 35 нафар, биология фани бўйича 36 нафар ўқитувчилар қатнашди.

Очилиш маросимида Қорақалпоғистон Республикаси Мактабгача ва мактаб таълими вазирлигининг Фан олимпиадаси бўйича Иқтидорли болалар билан ишлаш сектор методисти Фазилат Зарифова, Амударё тумани Ихтисослаштирилган мактаб директори Отабек Йўлдошев, туман Мактабгача ва мактаб таълими бўлими бошлиғи Ялғашбой Шамуратов, Мактаблар фаолиятини мувофиқлаштириш шуъбаси методистлари Райҳон Якубова, Ҳабибулла Давлетяров, олимпиада аудитория раҳбарлари, кузатувчилар иштирок этдилар.

Айтиш жоизки, назорат материаллари Агентлик ҳузуридаги Фан олимпиадалари маркази томонидан тузилган бўлиб, олимпиаданинг ҳудудий ташкилий қўмитаси томонидан чоп этилган ва махфийлиги таъминланган ҳолда жойларга етказилган.

Туман Мактабгача ва мактаб таълими бўлимининг мактаблар фаолиятини мувофиқлаштириш шуъбаси методистлари олимпиада иштирокчиларига жавоблар варақасини тўлдириш қоидалари, тест синовларини ўтказиш тартиби ҳақида батафсил тушунчалар бердилар.

Икки кун давом этган олимпиаданинг туман босқичи юқори ишчанлик ва шаффофлик асосида ўтказилди.

Мазкур ўқитувчилар олимпиадасини ўтказишдан мақсад мамлакатимизда математика, информатика ва ахборот технологиялари, биология соҳаларида илм-фанни ривожлантириш, таълим муассасаларида фаолият юритаётган ўқитувчилар билимини янги сифат босқичига олиб чиқиш, жамиятда ўқитувчи мақоми ва нуфузини ошириш, педагоглар учун қулай ижтимоий шароитлар яратиш ва уларнинг меҳнатини муносиб рағбатлантириш ҳамда ўқитувчиларнинг ёшларга таълим ва тарбия беришдаги масъулиятини, доимий касбий ривожланишдаги талабчанлигини оширишдан иборатдир.

Олимпиаданинг туман босқичида ғолиб бўлган ўқитувчилар ҳудудий босқичда иштирок этадилар ва Қорақалпоғистон Республикаси босқичига йўлланма оладилар. Ҳудудий босқич яқин кунларда ўтказилиши режалаштирилган.

Райҳон Якубова, Амударё тумани Мактабгача ва мактаб таълими бўлими Мактаблар фаолиятини мувофиқлаштириш шуъбаси методисти.