Мустақиллик байрами ҳамда пахта йиғим-терими мавсуми олдидан нуронийлар учун дастурхон ёзилди

Жорий йилнинг 31 август санасида Амударё туманида Ватанимиз мустақиллигининг 34 йиллиги муносабати билан, шунингдек, пахта йиғим-терими мавсуми бошланиши арафасида нуроний отахон ва онахонлар учун байрам дастурхони ёзилди. Ушбу эзгу тадбир “Diamond” ресторанида ўтказилиб, у самимият, меҳр-оқибат ва дуолар билан иштирокчиларнинг ёдида қолди.

Тадбирда туман ҳокими Собир Хўжаметов иштирок этиб, йиғилганларни энг улуғ, энг азиз байрам — Мустақиллик куни билан табриклади. Ҳоким ўз табрик сўзида истиқлол йилларида юртимиз ҳаётида эришилган улкан ўзгаришлар, халқимизнинг орзу-умидларини рўёбга чиқараётган ислоҳотлар ҳақида сўз юритиб, нуронийларга сиҳат-саломатлик, бардавом умр ва эзгу тилакларини изҳор этди.

Турли ноз-неъматлар билан безатилган дастурхон атрофида йиғилган нуронийлар истиқлолнинг энг буюк неъмат эканини, мустақиллик туфайли халқимиз ҳаёти тубдан янгиланганини, юртимиз тараққиёт сари юксалаётганини таъкидлаб, бугунги дориломон кунларга шукроналар келтирдилар.

Дарҳақиқат, бугун халқимиз истиқлол туфайли ўз тақдирини ўзи белгилаётган, эркин ва озод ҳаёт кечираётган миллатга айланди. Мустақиллик бизга энг аввало миллий қадриятларимизни тиклаш, тарихий хотирамизни қайта жонлантириш, эзгу орзу-интилишларимизни амалга ошириш имконини берди. Истиқлол туфайли юртимизда тинчлик ва осойишталик қарор топди, фаровон ҳаёт сари йўл очилди. Муҳтарам Президентимиз раҳнамолигида амалга оширилаётган кенг қамровли ислоҳотлар, таълим-тарбия, соғлиқни сақлаш, иқтисодиёт, қишлоқ хўжалиги ва бошқа соҳаларда эришилаётган ютуқлар – буларнинг барчаси мустақиллик туфайли қўлга киритилмоқда.

Юртимизда ҳукм сураётган ҳамжиҳатлик ва тотувлик нуронийларимизнинг дастурхон бошида қилаётган дуоларининг ижобати, десак асло муболаға бўлмайди. Тадбирга йиғилган нуронийлар ҳам аввало истиқлолимизга абадийлик, юртимизга тинчлик ва осойишталик, дастурхонларимизга тўкин-сочинлик, халқимизга тинчлик-омонлик ва давлатимизга юксак тараққиёт тилаб, дуолар қилдилар. Қолаверса, “оқ олтин” халқимизнинг бойлиги, мамлакатимизнинг иқтисодий барқарорлигида муҳим ўрин тутувчи хом ашё эканини таъкидлаб, уни нест-нобуд қилмай йиғиб-териб олишда ҳамжиҳатлик билан ҳаракат қилиш зарурлигини қайд қилган ҳолда, пахтакор деҳқон ва фермерларимизга куч-ғайрат, шижоат, ишларига самара тилаб, дуога қўл очдилар.

Тадбирда фахрий нуронийлар ҳам сўз олиб, самимий табрик ва тилакларини билдирдилар. Уларнинг ҳар бир сўзи ҳаётий тажриба, оқибат ва дуога бой бўлиб, барча йиғилганларда юқори таассурот қолдирди.  

Тадбир мобайнида туман Маданият бўлими хонанда ва ижодкорлари томонидан куйланган қўшиқ ва наволар йиғилганларга ҳақиқий байрамона кайфият улашди. Миллий руҳ ва замонавий оҳанг уйғунлигида жаранглаган куй-қўшиқлар нуронийларнинг қалбига қувонч бағишлади. Ижодкорларнинг самимий чиқишлари, дилбар оҳанглари ва дилрабо куй-қўшиқлари тадбирнинг тантанавор руҳини янада юксалтирди.

Байрамлар арафасида ўтказилган бундай хайрли тадбирларнинг аҳамияти беқиёсдир. Зеро, нуронийларга кўрсатилаётган эътибор ва эҳтиром, уларга яратилаётган шароит ва ғамхўрлик — бу, аввало, ёш авлод учун ибрат намунасидир. Меҳр-оқибат, дуо-ю тилаклар ва жамиятдаги бирдамлик кайфияти ана шундай учрашувларда янада мустаҳкамланади. Бу эса эл-юртни эзгу мақсадлар йўлида бирлаштиради, ҳамжиҳатлик ва барқарорликни таъминлайди.

Шу боис, Мустақиллик байрами ва пахта йиғим-терими мавсуми арафасида ўтказилган мазкур учрашув нафақат нуронийлар учун эътибор рамзи, балки бутун туман ҳаётида бирлик, тотувлик ва эзгу ниятларнинг тимсоли сифатида ёдда қолади.

Чарос Арслонова, туман ҳокимлигининг Ахборот хизмати раҳбари.