ЮРТ ТИНЧЛИГИ ВА ЖАМИЯТ ОСОЙИШТАЛИГИНИ АСРАШ – ШАРАФЛИ БУРЧИМИЗ
Жамият ҳаётининг барча жабҳаларида тинчлик ва осойишталикни таъминлаш, барқарор турмуш тарзини қарор топтириш, фуқароларнинг ҳуқуқ ва эркинликларини ишончли ҳимоя қилиш, аҳоли фаровонлигини юксалтириш ва ҳуқуқий демократик давлатни барпо этишда Ички ишлар органларининг самарали фаолияти устувор аҳамиятга эга.
Шу боис, мамлакатимизда барча соҳалар сингари Ички ишлар тизимида ҳам кенг кўламли ислоҳотлар амалга оширилмоқда. Айниқса, жамиятда қонун устуворлигини таъминлаш, Ички ишлар органларини эл-юрт манфаатига хизмат қиладиган чинакам халқчил тизимга айлантириш йўлида самарали ишлар олиб борилмоқда. Шу баробарида “Ўзбекистон Республикасида Ички ишлар органлари ходимлари кунини белгилаш тўғрисида”ги Қонун билан соҳа ходимлари фаолиятига алоҳида эътибор қаратилиб, 2006 йилдан буён 25 октябрь санаси Ўзбекистон Республикаси Ички ишлар органлари ходимларининг касб байрами сифатида кенг нишонланиб келинади. Биз ҳам байрам арафасида ушбу масъулиятли ва шарафли касб эгаларининг фаолияти билан танишиш мақсадида Амударё тумани Ички ишлар бўлимида бўлдик.
Бўлим ходимлари томонидан жамоат тартиби ва тинчлик-осойишталикни сақлаш, фуқароларнинг ҳуқуқ ва эркинликларини ҳимоя қилиш борасида самарали ишлар амалга оширилмоқда. Хусусан, жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашиш борасида олиб борилаётган профилактик чора-тадбирлар натижасида туман ҳудудида умумий жиноятлар сони жорий йилнинг 9 ойида ўтган йилнинг шу даврига нисбатан 32,9 фоизга, яъни 146 тадан 98 тага камайишига эришилди.
Соҳалар кесимида таҳлил қиладиган бўлсак, бу кўрсаткич жиноят қидирув йўналишида 92 тадан 54 тага, иқтисодий соҳада — 19 тадан 15 тага, бошқа соҳаларда эса 35 тадан 29 тага камайган.
Таъкидлаш жоизки, бўлимда Ички ишлар органлари ходимларининг самарали фаолият олиб боришлари учун барча қулайликлар, зарур шарт-шароитлар яратилган. Ходимларнинг замонавий спорт жиҳозлари ўрнатилган спорт залларида жисмоний чиниқиш амалиётларини бажаришлари, замонавий ахборот технологиялари билан ишлаш бўйича билим ва малакаларини мустаҳкамлашлари учун зарур шароит ва имкониятлар мавжудлиги уларнинг ўз фаолиятларини муваффақиятли тарзда амалга оширишларига замин яратмоқда.
Шу сабабли содир этилган жиноятлар таснифи бўйича ҳам натижаларлар сезиларли даражада яхшиланган. Жумладан, оғир турдаги жиноятлар — 15 тадан 8 тага, ўлим билан боғлиқ бўлмаган йўл-транспорт ҳодисалари 28,6 фоизга, қасддан баданга оғир тан жароҳати етказиш ҳолатлари 100 фоизга, ўртача оғир тан жароҳати етказиш ҳолатлари эса 66,7 фоизга камайишига эришилган. Қотиллик жинояти эса 2025 йилнинг ўтган даври мобайнида қайд этилмаган.
Ўзбекистон Республикаси Вазирлар Маҳкамасининг 2024 йил 30 ноябрдаги “Обод ва хавфсиз маҳалла” тамойили асосида маҳаллаларда ижтимоий профилактика тизими самарадорлигини ошириш чора-тадбирлари тўғрисида”ги қарори асосида ҳуқуқбузарликлар содир этилиши ёки ундан жабрланиш эҳтимоли бўлган шахслар билан ишлашиш бўйича “Ижтимоий профилактика тизими” йўлга қўйилгани ўзининг ижобий самарасини бермоқда. Натижада тумандаги 49 та фуқаролар йиғинларидан 2 таси “қизил”, 6 таси “сариқ”, 41 таси “яшил” тоифаларга киритилиб, умумий жиноятлар сони ўтган йилнинг мос даврига нисбатан кескин камайишига эришилди.
ИИБнинг тегишли бўлинмалари ходимларининг ўз вазифаларига масъулият билан ёндашаётганлари, туманнинг энг чекка ҳудудлари аҳолиси орасида амалга оширилаётган профилактик чора-тадбирлар, сайёр қабуллар, ҳуқуқий саводхонлик бўйича учрашувлар ҳамда очиқ ва ошкора мулоқот тарзидаги тарғибот-ташвиқот тадбирлари ушбу йўналишлардаги ишлар муваффақиятини таъминлаш имконини бермоқда.
Таъкидлаш жоизки, бугунги кунда дунё миқёсида рўй бераётган хавф-хатар ва таҳдидлар — халқаро терроризм, диний экстремизм, ноқонуний миграция, одам савдоси каби иллатларга қарши курашиш Ички ишлар органлари ходимлари олдига янги вазифаларни қўймоқда.
Ушбу вазифаларни шараф билан адо этишни, элимиз тинчлиги, жамият осойишталигини сақлашни ўз бурчи деб билган машаққатли ва шарафли касб эгалари — Ички ишлар органлари ходимларини 25 октябрь — касб байрамлари билан чин дилдан муборакбод этамиз. Ўз хизмат постларида ҳамиша собит туриб, бурчига содиқлик билан халқимиз осойишталиги йўлида ҳалол хизмат қилаётган Ички ишлар органлари ходимлари ва соҳа фахрийларига куч-ғайрат, мустаҳкам соғлик, эл-юрт тинчлиги ва осойишталиги йўлида қилаётган эзгу хизматларида зафарлар тилаймиз.
Тимур Дошумбаев, туман ИИБ бошлиғи, полковник
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
