АМУДАРЁ ТУМАНИДА ЖОРИЙ ЙИЛДА 20 ГЕКТАР МАЙДОНДАГИ БОҒЛАР ОРАСИГА ТЎҚСОНБОСТИ ЭКИНЛАР ЭКИШ РЕЖАЛАШТИРИЛГАН

Мамлакатимизда аҳолининг кундалик сабзавот маҳсулотларига бўлган талабини тўлиқ қондириш, шунингдек, озиқ-овқат хавфсизлигини таъминлаш мақсадида ҳосилдан бўшаган майдонларга, боғ қатор ораларига совуққа чидамли сабзи, пиёз, саримсоқпиёз, ош лавлаги, кашнич, петрушка, сельдерей, салатбарг каби кўкатларни тўқсонбости усулида экишга катта эътибор қаратилмоқда.

Куз ойларининг қуёшли кунларидан унумли фойдаланиб, тўқсонбости усулида ерга уруғ қадаган деҳқон ҳеч қачон ютқазмайди. Чунки айнан ана шу усулда экилган экинлар жуда эрта, қиш нисбатан илиқ келган йилларда ҳатто февраль ойи охирлариданоқ униб чиқишни бошлайди ва деҳқон учун ҳақиқий даромад манбаига айланади.

Амударё туманида ҳам фермер хўжаликларининг ҳосилдан бўшаган далаларида, аҳоли томорқа ерларида, боғ қатор ораларига совуққа чидамли, иқлим шароитига мос сабзавотлар уруғлари танланиб, тўқсонбости усулида экинлар экишга алоҳида эътибор қаратилади. Тумандаги боғдорчилик йўналишидаги фермер хўжаликлари ихтиёрида жами 1096 гектар мевазор боғлар мавжуд бўлиб, шундан 2026 йил эртаги ҳосили учун 20 гектар ерга тўқсонбости усулида экин экиш режалаштирилган.

Яқинда тумандаги “Улуғбек Ҳосилбек” масъулияти чекланган жамияти тасарруфидаги далада ҳосилдан бўшаган боғ қатор ораларига тўқсонбости усулида экинлар экиш ва парваришлаш бўйича кўргазмали семинар бўлиб ўтди.

Кўргазмали семинарда Агросаноатни ривожлантириш агентлиги Амударё тумани лойиҳа офиси, туман Ўсимликлар карантини ва ҳимояси агентлиги мутахассислари, боғдорчилик йўналишидаги фермер хўжаликлари раҳбарлари ва тажрибали боғбонлар иштирок этдилар.

Семинарда соҳа мутахассислари тўқсонбости усулида экин экиш учун уруғликларни танлаш ва саралаш, уруғ қадалгандан кейин далага ишлов бериш, экин экилган боғларни иҳоталаш, суғориш ва озиқлантиришнинг муддатлари, ернинг юза қисми музлаб қолмаслиги учун маҳаллий ўғит сепиш каби зарур агротехник тадбирлар батафсил маълумотлар тақдим этдилар.

Таъкидланганидек, ерга уруғ қадалгани тўқсонбости экинларидан эрта баҳорда мўл ҳосил олинади, дегани эмас, балки уруғнинг бир текис униб чиқишини таъминлаш мақсадида амалга ошириладиган агротехник тадбирлар сифатли ва самарали бўлганидагина кўзланган мақсадга эришиш мумкин.

Хусусан, Ўсимликлар карантини ва ҳимояси агентлигининг Амударё туман бўлими мутахассислари тўқсонбости экинлари учун серҳосил, сара уруғларни танлаш, шунингдек, кузнинг илиқ кунларида экилган уруғларга зарар етказиши мумкин бўлган ҳашаротларга, ҳатто қаттиқ қиш совуқларига ҳам чидамли зараркунандаларга қарши кураш чоралари бўйича маслаҳатлар бердилар.

Кўргазмали семинар давомида иштирокчилар ўзларини қизиқтирган саволлар билан мутахассисларга мурожаат қилдилар ва уларнинг барча саволларига соҳа мутахассислари назарий ва амалий, кўргазмали воситалар орқали жавоблар бердилар.

Мазкур семинар мамлакатимиз озиқ-овқат хавфсизлигини таъминлаш, ердан унумли ва самарали фойдаланиш орқали аҳоли даромадларини, шу билан бирга экологик тоза сабзавот маҳсулотларига бўлган эҳтиёжини қондиришга қаратилгани билан муҳим аҳамият касб этди.

Робия ЙЎЛДОШЕВА.