ТУМАН ПРОКУРАТУРАСИ ЙИРИК ЛОЙИҲАЛАР ИЖРОСИНИ ЎРГАНДИ

Бугунги кунда Янги Ўзбекистон бўйлаб амалга оширилаётган кенг кўламли бунёдкорлик ишлари нафақат шаҳар ва туманларимиз қиёфасини ўзгартирмоқда, балки аҳолининг турмуш даражасини юксалтиришга хизмат қилмоқда. Давлат дастурлари доирасида барпо этилаётган ҳар бир иншоот — хоҳ у турар-жой мажмуаси бўлсин, хоҳ ижтимоий соҳа объекти бўлсин — сифатли ва хавфсиз тарзда, белгиланган муддатларда фойдаланишга топширилишига асосий масала сифатида қаралади. Шу мақсадда Амударё тумани прокуратураси томонидан ҳудуддаги стратегик қурилиш объектларида назорат тадбирлари ва ўрганишлар олиб борилди.

Маълумки, аҳолини арзон ва сифатли уй-жой билан таъминлаш давлат сиёсатининг устувор йўналишларидан биридир. Ўзбекистон Республикаси Президентининг 2021 йил 9 декабрдаги “Янги Ўзбекистон” массивларини қуриш ва ҳудудларнинг ижтимоий-иқтисодий ривожланишини таъминлаш чора-тадбирлари тўғрисида”ги Фармони ижроси доирасида Амударё туманининг Дўстлик маҳалласи ҳудудида қад ростлаётган “Янги Ўзбекистон” массиви ана шундай йирик лойиҳалардан биридир.

Туман прокуратураси масъул ходимлари мазкур массивда бўлиб, қурилиш ишларининг бориши билан яқиндан танишдилар. Ўрганиш жараёнида асосий эътибор биноларнинг сифати, қурилиш материалларининг стандартларга мослиги ва энг муҳими — ишчи-ходимлар учун яратилган меҳнат шароитларига қаратилди.

Қурилиш майдони — бу юқори хавф манбаи санлади. Шу боис, прокуратура ходимлари томонидан техника хавфсизлиги қоидаларига риоя этилиши, ишчиларнинг махсус кийим-бош ва ҳимоя воситалари билан таъминланганлик даражаси қатъий назорат қилинди. Зеро, ҳар бир бино пойдеворида нафақат бетон ва ғишт, балки инсон меҳнати ва хавфсизлиги ётади.

Прокуратура ходимларининг навбатдаги назорат манзили туманнинг Оқ олтин овули бўлди. Бу ерда келажагимиз эгалари бўлган жажжи болажонлар учун мўлжалланган 90 ўринли мактабгача таълим ташкилоти биносининг қурилиш-таъмирлаш ишлари кўздан кечирилди. Мазкур ижтимоий объект Ўзбекистон Республикаси Президентининг 2024 йил 24 декабрдаги “2025 — 2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги 454-сонли Қарори асосида барпо этилмоқда.

Ижтимоий объектлар, айниқса, боғча ва мактаблар қурилишида масъулият икки ҳисса ортади. Чунки бу биноларда эртага фарзандларимиз таълим-тарбия олади. Шу боис, прокуратура вакиллари бинонинг лойиҳа-смета ҳужжатларига мослигини, иссиқлик тизими, санитария-гигиена талаблари ва пардозлаш ишларининг сифатини чуқур таҳлил қилдилар.

Айтиш керакки, ижтимоий соҳа объектларини қуришда қурилиш қоидалари ва нормаларига қатъий амал қилиш жамият ҳаётида беқиёс аҳамиятга эга. Мактаблар, боғчалар, шифохоналар, маданият уйлари, спорт иншоотлари каби объектлар аввало инсон саломатлиги, хавфсизлиги ва қулайлиги учун хизмат қилади. Шу боис уларни барпо этиш жараёнида белгиланган меъёрий талабларга риоя этиш асосий шарт ҳисобланади.

Қурилиш қоидалари ва нормалари биноларнинг мустаҳкамлиги, сейсмик барқарорлиги, ёнғин хавфсизлиги ҳамда санитария-гигиена талабларига жавоб беришини таъминлайди. Айниқса, юртимиз сейсмик фаол ҳудудда жойлашганини инобатга олсак, лойиҳалаш ва қурилиш ишларида ушбу меъёрларга амал қилиш инсон ҳаётини сақлаб қолишда ҳал қилувчи омилдир. Қоидаларга риоя қилинмаган ҳолларда эса турли авариялар, қурилиш нуқсонлари ва инсон саломатлигига таҳдид солувчи ҳолатлар юзага келиши мумкин.

Шунингдек, меъёрларга мувофиқ қурилган ижтимоий объектлар узоқ йиллар давомида самарали хизмат қилади, таъмирлаш харажатлари камаяди ва давлат маблағларидан оқилона фойдаланиш таъминланади. Бундай иншоотлар фуқароларда ишонч уйғотади, ижтимоий инфратузилманинг барқарор ривожланишига хизмат қилади.

Ўрганишлар давомида фақат текширув билан чекланиб қолинмади. Жойининг ўзида пудратчи ташкилот раҳбарлари, муҳандислар ва қурувчилар билан очиқ мулоқот ташкил этилди. Суҳбат чоғида қурувчиларни қийнаётган муаммолар, қурилиш материаллари таъминотидаги эҳтимолий узилишлар ва молиялаштириш масалалари ўрганилди.

Пудратчи ташкилотларга қурилиш ишларини белгиланган жадвал асосида, сифат кўрсаткичларини туширмаган ҳолда, ўз вақтида якунлаш бўйича қатъий кўрсатмалар берилди. Шунингдек, бюджет маблағларининг мақсадли сарфланиши, талон-торожликка йўл қўймаслик ва коррупцион ҳолатларнинг олдини олиш юзасидан тушунтириш ишлари олиб борилди.

Хулоса ўрнида айтганда, Амударё тумани прокуратураси томонидан олиб борилаётган бу каби назорат тадбирлари қоғоздаги рақамларнинг ҳаётда ўз ифодасини топишига, халқимиз учун қурилаётган уй-жойлар ва боғчаларнинг узоқ йиллар беминнат хизмат қилишига кафолат бўлади. Зеро, қонун устуворлиги таъминланган жойда сифат ва тараққиёт бўлади.