Маст ҳайдовчилар суд ҳукми билан автотранспорт воситаларини бошқариш ҳуқуқидан маҳрум қилиниб, жаримага тортилди

Йўлларда ҳаракат хавфсизлигини таъминлаш, фуқароларнинг ҳаёти ва соғлиғини турли кўнгилсиз ҳодисалардан асраш масаласи давлат сиёсати даражасидаги энг долзарб вазифалардан бирига айланган. Минг афсуски, яратилаётган кенг имкониятлар, йўл инфратузилмасининг яхшиланиши ва замонавий назорат воситаларининг жорий этилишига қарамай, ҳамон орамизда қоидаларни қўпол равишда бузувчи, нафақат ўзининг, балки ўзгаларнинг ҳам тақдирига бефарқ қаровчи ҳайдовчилар учраб турибди.

Айниқса, спиртли ичимлик истеъмол қилган ҳолда руль бошқарувига ўтириш – бу шунчаки қоидабузарлик эмас, балки оқибати аянчли фожиаларга олиб келувчи жиноят билан тенг ҳаракатдир. Ушбу нохуш ҳолатларнинг олдини олиш мақсадида Нукус шаҳри ҳудудида йўл-транспорт ҳодисаларининг олдини олиш ва ҳаракат хавфсизлигини ишончли таъминлаш мақсадида ҳуқуқни муҳофаза қилувчи органлар томонидан кенг қамровли махсус назорат-рейд тадбирлари ўтказилмоқда.

Ўтказилган рейдлар давомида йўл патруль хизмати инспекторларининг сергаклиги натижасида транспорт воситасини спиртли ичимлик истеъмол қилган, яъни маст ҳолатда бошқариб келаётганлиги ҳайдовчилар ҳам аниқланди.

Қонунбузар ҳайдовчиларга нисбатан қонунчиликда белгиланган тартибда тегишли ҳужжатлар, жумладан, тиббий текширув хулосалари ва маъмурий баённомалар расмийлаштирилди. Тўпланган иш ҳужжатлари қонуний баҳо бериш ва айбдорларга нисбатан тегишли жазо чораларини қўллаш учун жиноят ишлари бўйича Нукус шаҳар судига юборилди.

Суд жараёнида ҳар бир ҳолат атрофлича ва холисона кўриб чиқилди. Суд мажлисларида тақдим этилган далиллар, тиббий экспертиза хулосалари ва гувоҳларнинг кўрсатмалари асосида ҳайдовчиларнинг спиртли ичимлик истеъмол қилган ҳолда автомобиль бошқарганлиги тўлиқ ўз тасдиғини топди.

Суд, инсон ҳаётини хавф остига қўйишга ҳеч кимнинг ҳаққи йўқлигини, қонун устуворлиги ва жазонинг муқаррарлиги таъминланиши шартлигини инобатга олиб, қатъий қарорлар қабул қилди. Унга кўра, маст ҳолатда рулга ўтирган ҳайдовчиларнинг ҳар бирига нисбатан жиддий жазо чоралари тайинланди. Хусусан, суд ҳукми билан ушбу қоидабузарларнинг ҳар бири 3 йил муддатга барча турдаги автотранспорт воситаларини бошқариш ҳуқуқидан маҳрум қилинди ва уларга нисбатан иқтисодий таъсир чораси сифатида базавий ҳисоблаш миқдорининг 40 баравари миқдорида жарима жазоси қўлланилди.

Келгуси 3 йил давомида қонунбузарлар ўз қилмишининг оқибатларини чуқур англаб етиши ва энг муҳими, келажакда бундай хатога йўл қўймаслик учун тўғри хулоса чиқаришлари лозим. Сабаби, спиртли ичимлик таъсиридаги ҳайдовчининг диққати сусаяди, воқеликни реал баҳолаш қобилияти йўқолади ва хавфли вазиятларда тезкор қарор қабул қилиш имконияти чекланади. Бу эса гавжум шаҳар кўчаларида, пиёдалар ва бошқа транспорт воситалари учун жиддий хавф манбаи ҳисобланади.

Нукус шаҳар суди томонидан чиқарилган ушбу қатъий ҳукмлар бошқа ҳайдовчилар учун ҳам жиддий огоҳлантириш бўлиши лозим. Зеро, йўл – синов майдони эмас, унда қилинган ҳар бир хато, ичилган бир қултум спиртли ичимлик инсоннинг нафақат ҳайдовчилик гувоҳномасидан, балки эркидан, энг ёмони, ҳаётидан маҳрум бўлишига олиб келиши мумкин.

Шундай экан, йўлларда ҳаракатланаётган ҳар бир ҳайдовчи масъулиятни ҳис қилган ҳолда, “Йўл қоидаси – умр фойдаси” тамойилига қатъий амал қилиши, ўзи ва ўзгалар ҳаётига бефарқ бўлмаслиги лозим. Зеро, спиртли ичимлик ичиш – бу бахтсизликка очилган дарвозадир, уни ёпиш эса ҳар бир инсоннинг ўз қўлида.