Меҳнат ярмаркасида 16 нафар фуқаро доимий ишга жойлашди

Амударё туманида аҳоли бандлигини таъминлаш, айниқса ишсиз алимент тўловчиларни ишга жойлаштириш орқали уларнинг ижтимоий масъулиятини оширишга қаратилган навбатдаги амалий тадбир — бўш иш ўринлари меҳнат ярмаркаси ташкил этилди. Туман Камағаллликни қисқартириш ва бандликка кўмаклашиш бўлими, Бош прокуратура ҳузуридаги Мажбурий ижро бюросининг Амударё тумани бўлими билан ҳамкорликда ўтказган мазкур ярмарка ишсиз фуқароларни муносиб иш ўринлари билан таъминлаш, уларга ҳуқуқий маслаҳат бериш ҳамда касбга йўналтириш каби вазифаларни ўзида жамлади.

Тадбирда ҳамкор ташкилотлар ва тижорат банклари вакиллари фаол иштирок этди. Хусусан, Ўзбекистон маҳаллалар уюшмаси Амударё тумани бўлими бошлиғи Алишер Юлдашев, Мажбурий ижро бюроси Амударё тумани бўлими бошлиғи, И-даражали юрист Медетбай Исметуллаев, шунингдек, туман Ички ишлар бўлими ҳузуридаги Пробатсия бўлими бошлиғи Руслан Искандаровлар ярмарка жараёнида иштирокчилар билан мулоқот қилиб, бандлик масалаларидаги мавжуд имкониятлар ва ҳамкорлик йўналишларига тўхталди.

Меҳнат ярмаркасида тумандаги 37 та корхона ва ташкилот 127 та бўш иш ўрни билан қатнашди. Бу эса иш қидираётганлар учун танлов имкониятини кенгайтириб, турли соҳа ва йўналишларда ишга жойлашишга йўл очди. Ярмаркада жами 52 нафар фуқаро иштирок этди. Улар орасида ишсизлар, пробатсия ҳисобида турган шахслар, алимент тўловчилар ҳамда ногиронлиги бўлган шахслар борлиги тадбирнинг ижтимоий аҳамиятини янада оширди.

Ярмарка давомида туман Камағаллликни қисқартириш ва бандликка кўмаклашиш бўлими ходимлари иштирокчиларга ҳар томонлама амалий ёрдам кўрсатди. Жумладан, бўш иш ўринлари ва уларга ишга жойлашиш тартиблари тушунтирилди, ишсиз аҳолини касб-ҳунарга ўқитиш имкониятлари бўйича маълумотлар берилди, фуқароларни хорижий давлатларга қонуний асосда ишга жойлаштириш масалалари юзасидан маслаҳатлар тақдим этилди. Шунингдек, меҳнат ҳуқуқлари ва меҳнат муҳофазасига оид ҳуқуқий кўмакни кучайтириш мақсадида видеороликлар, баннерлар, брошюра ва буклетлар орқали кенг тарғибот ишлари ҳам ташкил этилди.

Тадбирнинг амалий натижаси сифатида 16 нафар фуқаро доимий ишга жойлаштирилди. Улардан 10 нафари алимент тўловчилар бўлиб, 6 нафари эса ишсиз фуқаролардир.

Бундан ташқари, 17 нафар фуқарога меҳнат қонунчилигига оид масалалар ҳамда мавжуд бўш иш ўринларига ўтказиладиган танловлар бўйича ҳуқуқий маслаҳат ва амалий ёрдам кўрсатилди. Ярмарка жараёнида алоҳида йўналишлар кесимида ҳам тушунтириш ишлари олиб борилди: 12 нафар фуқарога бўш иш ўринлари ва ишга жойлашиш тартиблари бўйича, 8 нафар фуқарога касб-ҳунар ва тадбиркорликка ўқитиш бўйича, 12 нафар фуқарога хорижда ишлаш имкониятлари бўйича, 8 нафар фуқарога меҳнат ҳуқуқлари ва меҳнат муҳофазаси масалалари юзасидан ҳуқуқий маслаҳатлар, зарур маълумот ва тавсиялар берилди.

Амударё тумани Камағаллликни қисқартириш ва бандликка кўмаклашиш бўлими томонидан бундай тадбирларни тизимли равишда давом эттириш режалаштирилган.