“ХАВФСИЗ МАҲАЛЛА” ТАМОЙИЛИ – АМАЛДА

Бугунги кунда “Инсон қадри учун” ғояси остида амалга оширилаётган ислоҳотларнинг туб моҳияти юртимизда тинчлик ва осойишталикни таъминлашга қаратилган. Қорақалпоғистон Республикаси Ички ишлар вазирлиги ҳузуридаги Қўриқлаш хизмати томонидан республика бўйлаб ўтказилаётган профилактик тадбирлар ҳам айнан “Хавфсиз ҳудуд” ва “Хавфсиз маҳалла” тамойилларини рўёбга чиқаришга хизмат қилмоқда.

“Сифат, ишонч ва хавфсизлик” шиори остида ташкил этилаётган навбатдаги амалий тадбирлар Хўжайли туманининг Маданият ва Муртазабий овуллари ҳудудида ўтказилди. Таҳлилларга кўра, ушбу ҳудудлар тумандаги криминоген вазияти нисбатан оғир бўлган нуқталардан саналиб, бу ерда жиноятчилик ва ҳуқуқбузарликларнинг олдини олиш бўйича кучайтирилган чоралар кўриш талаб этилаётган эди. Қўриқлаш хизмати ходимларининг асосий мақсади — мазкур маҳаллаларни жиноятчиликдан холи ҳудудга айлантириш ва аҳолининг тинч-осуда ҳаётини кафолатлашдан иборат.

Тадбир давомида соҳа мутахассислари томонидан фуқароларга, тадбиркорларга ва савдо марказлари эгаларига замонавий қўриқлаш воситаларининг афзалликлари тушунтирилди.  Хусусан, хонадонлар, кўп қаватли уйлар ва савдо дўконларига замонавий қўриқлаш сигнализация ускуналарини ўрнатиш — мол-мулкни ўғирликдан асрашнинг энг ишончли йўли эканлиги ҳаётий мисоллар билан тушинтириб берилди.

Бугунги кунда ушбу ҳудудлардаги кўплаб объектларга замонавий қўриқлаш сигнализация мосламаларининг ўрнатилиши натижасида содир этилиши мумкин бўлган бир қанча салбий ҳолатларнинг олди олинишига эришилгани таъкидланди.

Тадбирда алоҳида эътибор қаратилган яна бир жиҳат — жамоат жойлари хавфсизлиги бўлди. Қўриқлаш хизмати томонидан бозорлар, хиёбонлар ва фуқаролар гавжум тўпланадиган бошқа жойларда “Ташвиш тугмалари”ни ўрнатиш ишлари жадаллаштирилмоқда.

Бу тизим хавф туғилган заҳоти тегишли хизматларга сигнал бериш ва қисқа вақт ичида ёрдам олиш имконини беради. Ҳудудларда туну кун фаолият олиб бораётган Қўриқлаш хизматининг тезкор ҳаракатланувчи гуруҳлари сигнал келиб тушган манзилга зудлик билан етиб бориб, хавфсизликни таъминлаш имкониятига эга бўладилар.

Ушбу профилактик тадбирлар Ички ишлар вазирлигининг Қўриқлаш хизмати, Прокуратура органлари ва “Маҳалла еттилиги” билан ҳамкорликда амалга оширилмоқда. Жойларда ўтказилаётган тадбирларда тегишли ҳудуднинг маҳалла раиси, ҳоким ёрдамчиси, ёшлар етакчиси, хотин-қизлар фаоли, профилактика инспектори, солиқ ва ижтимоий хизмат ходими иштирок этиб, ўз маҳалласини хавфсиз ҳудудга айлантириш ишларига муносиб ҳисса қўшмоқдалар.

Бу каби тарғибот-ташвиқот ишлари республикамизнинг бошқа туман ва шаҳарларида ҳам давом эттирилиб, ҳар бир фуқаронинг уйида ва кўчада ўзини хавфсиз ҳис қилишига замин яратмоқда.