Бўш иш ўринлари меҳнат ярмаркасида 12 нафар фуқаро доимий ишга жойлаштирилди

Амударё тумани Камбағалликни қисқартириш ва бандликка кўмаклашиш бўлими томонидан Ўзбекистон Республикаси Бош прокуратураси ҳузуридаги Мажбурий ижро бюроси Амударё тумани бўлими билан ҳамкорликда бўш иш ўринлари меҳнат ярмаркаси ташкил этилди. Ушбу ярмаркадан кўзланган асосий мақсад ишсиз алимент тўловчиларнинг бандлигини таъминлаш, уларнинг моддий жавобгарлигини кучайтириш орқали оилаларнинг ижтимоий барқарорлигини қўллаб-қувватлаш ва пробация ҳисобида турган фуқаролар, ногиронлиги бўлган шахслар каби ижтимоий ҳимояга муҳтож гуруҳларга доимий иш ўрни топишда ёрдам кўрсатишдир.

Ярмаркада Ўзбекистон Республикаси Бош прокуратураси ҳузуридаги Мажбурий ижро бюроси Амударё тумани бўлими бошлиғи Медетбай Исметуллаев, туман Камбағалликни қисқартириш ва бандликка кўмаклашиш бўлими бошлиғи Руслан Наримбетов, Ички ишлар бўлими ҳузуридаги Пробация бўлими бошлиғи Руслан Искандаров ҳамда бошқа ҳамкор ташкилотлар, тижорат банклари ва иш берувчилар вакиллари фаол иштирок этди.

Ярмаркада тумандаги 31 та корхона ва ташкилотлар турли соҳалар – саноат, қишлоқ хўжалиги, хизмат кўрсатиш, таълим ва бошқа йўналишлардаги жами 133 та бўш иш ўрни билан қатнашди.

Камбағалликни қисқартириш ва бандликка кўмаклашиш бўлими ходимлари томонидан ярмарка майдонида иштирокчилар учун қулай шароитлар яратилди. Уларга бўш иш ўринлари ва ишга жойлаштириш тартиби, ишсиз аҳолини касб-ҳунарга ўқитиш дастурлари, хорижий давлатларда мавсумий ёки доимий ишга жойлаштириш имкониятлари, меҳнат ҳуқуқлари, меҳнат муҳофазаси ва хавфсизлик қоидалари бўйича ҳуқуқий маслаҳатлар берилди. Бу маълумотлар видеороликлар, баннерлар, махсус брошюралар ва буклетлар орқали тақдим этилди, шунингдек, яккама якка суҳбатлар ва гуруҳ маслаҳатлари ҳам ўтказилди.

Ярмарка якунларига кўра доимий ишга жойлаштирилганлар сони 12 нафарга етди. Булар орасида 4 нафар алимент тўловчи ва 8 нафар ишсиз фуқаро бор. Алимент тўловчиларнинг ишга жойлашиши оилаларнинг моддий таъминотини яхшилаш, болалар ҳуқуқларини ҳимоя қилиш ва ижтимоий муаммоларнинг олдини олишда муҳим аҳамият касб этади.

Бундан ташқари, 9 нафар фуқарога меҳнат қонунчилиги ва мавжуд вакансиялар бўйича танловларда иштирок этиш учун ҳуқуқий маслаҳат ҳамда амалий ёрдам кўрсатилди. Ярмарка давомида бўлим ходимлари томонидан жами 38 нафар фуқарога турли йўналишлар бўйича маслаҳатлар берилди. Жумладан уларнинг 15 нафарига мавжуд иш ўринларига жойлашиш, 11 нафарига касб-ҳунар ва тадбиркорликка ўқитиш, 8 нафарига хорижий давлатларда ишга жойлаштириш, 4 нафарига эса меҳнат ҳуқуқлари ва муҳофазаси масалалари бўйича тавсиялар берилди.

Амударё тумани Камбағалликни қисқартириш ва бандликка кўмаклашиш бўлими томонидан бундай хайрли тадбирлар тизимли равишда ўтказиб келинмоқда. Келгусида ҳам шу каби ярмаркалар, индивидуал маслаҳатлар, касб ўқитиш курслари ва хорижий меҳнат бозорига чиқиш дастурлари орқали аҳоли бандлигини таъминлаш, камбағалликни қисқартириш ва ижтимоий адолатни мустаҳкамлаш йўлидаги саъй-ҳаракатлар изчил давом эттирилади. Бу тадбирлар нафақат иқтисодий ўсишга, балки жамиятдаги ижтимоий-маънавий барқарорлик ва фуқароларнинг давлатга бўлган ишончини оширишга ҳам хизмат қилади.