Мустақиллик байрами арафасида фронторти меҳнат фахрийлари ҳолидан хабар олинди

Кекса авлод вакилларининг эҳтиёжларини ўрганиш, уларга моддий ва маънавий кўмак кўрсатиш бугунги кунда давлат ижтимоий сиёсатининг ажралмас қисми бўлиб, бу борада фахрийлар ташкилотлари, жамоат бирлашмалари ва маҳалла фаоллари ўртасидаги ҳамкорлик йилдан-йилга кучайиб бормоқда.

Инсон қадрини улуғлаш ғояси амалий ишларда ўз ифодасини топар экан, айниқса, Иккинчи жаҳон уруши йилларида фронт ортида матонат ва фидокорлик кўрсатган меҳнат фахрийларига эътибор қаратиш, уларнинг ҳаётини енгиллаштириш давлатимиз сиёсатининг устувор йўналишларидан бири ҳисобланади. Зеро, бу авлод вакилларининг ҳар бири ўз даврида элу юрт олдидаги бурчини сидқидилдан адо этган, оғир синовлар гирдобида ҳам умидини йўқотмаган инсонлардир.

Ўзбекистон Республикаси Мустақиллигининг 35 йиллиги арафасида «Нуроний» жамғармасининг Амударё тумани бўлими вакиллари туманда истиқомат қилувчи фронторти меҳнат фахрийлари, муҳтарама онахонлар ҳолидан хабар олишди.

Уруш йилларининг оғир ва машаққатли синовларини, ундан кейинги қайта тикланиш даври қийинчиликларини сабр-матонат билан енгиб, бугунги тинч ва фаровон кунларимиз пойдеворини қўйишда беқиёс ҳисса қўшган фахрий онахонларга алоҳида эҳтиром кўрсатилди, уларнинг ҳол-аҳволи ва эҳтиёжлари ўрганилди.

Ташриф давомида масъуллар Аёқчи маҳалласида истиқомат қилувчи 1929 йилда туғилган Тўхта момо Болтаева, Боғ маҳалласида яшовчи 1930 йилда таваллуд топган Ҳайитбика момо Қўчқорова ҳамда Жумуртов шаҳарчасида яшовчи, 1925 йилда дунёга келган Турсин момо Болтабоева хонадонларида бўлишди.

“Нуроний” жамғармасининг Амударё туман бўлими бошлиғи Бекман Алаберганов ва бошқа мутасаддилар Чойкўл овулида истиқомат қилувчи 1930 йилда туғилган Шукур момо Ҳайтакова, Ўзбекистон маҳалласида яшовчи, 1929 йилда таваллуд топган Хадича момо Ҳайтимбетова ва Жайхун овулида истиқомат қилаётган 97 ёшли онахон Ханифа момо Сабирова хонадонларида ҳам бўлдилар.

Бундан ташқари, Хизр эли маҳалласида истиқомат қилувчи 1915 йилда туғилган Парда момо Бекниязова ҳамда Дўстлик маҳалласида яшовчи 96 ёшни онахон Орзигул момо Мадаминовалар хонадонига ҳам ташриф уюштирилиб, уларнинг турмуш шароити билан яқиндан танишилди.

Самимиятга бой кечган суҳбатлар чоғида момолар ўз даврида чеккан заҳматлари, ёшлик йиллари ва суронли давр хотираларини ёдга олдилар. Уларнинг ҳикоялари бир авлоднинг эмас, балки бутун бир даврнинг ёзилмаган солномасидир. Ташриф буюрувчилар томонидан фахрий онахонларга байрам совғалари топширилиб, моддий ва маънавий ёрдам кўрсатилди.

Елкасида давр юкини кўтариб, бутун умрини ҳалол меҳнатга, фарзандлар тарбияси ва ватан равнақига бағишлаган момоларнинг юз-кўзидан шукроналик, тилидан эзгу дуолар аримайди. Улар ўз дуоларида юртимизга тинчлик-омонлик, элимизга фаровонлик ва мустақиллигимиз абадий бўлишини тилаб, меҳмонларга миннатдорлик изҳор қилдилар.

Кекса авлод вакилларини эъзозлаш, уларнинг бой ҳаёт ва меҳнат тажрибасини ёшлар ўртасида кенг тарғиб қилишга қаратилган бундай хайрли тадбирлар “Нуроний” жамғармаси томонидан туман бўйлаб изчил давом эттирилмоқда. Бундай ташрифлар фақат байрам кунлари билан чегараланиб қолмай, йил давомида мунтазам ташкил этилаётгани эса фахрийларга кўрсатилаётган ғамхўрлик тизимли тус олганидан далолат беради.

Бир умр ҳалол меҳнат билан яшаган инсоннинг қадрини билиш — жамият етуклигининг ўлчовидир. Фахрийлар хонадонига уюштирилган ҳар бир ташриф, уларга айтилган ҳар бир самимий сўз авлодлар ўртасидаги риштани мустаҳкамлайди ва ёшларга ибрат мактаби бўлиб хизмат қилади.