МЕҲНАТГА МУНОСИБ ЭЪТИРОФ

Жамиятимизда маҳалла тизими ривожига муносиб ҳисса қўшиб келаётган фидойиларни рағбатлантириш мақсадида таъсис этилган “Маҳалла ифтихори” кўкрак нишони бугунги кунда ўз эгаларига топширилмоқда.

Ҳамиша элим, юртим деб, халқ дардини ўз дардидек кўриб, ҳаётини жамият ривожига ҳисса қўшишга бахшида этиб келаётган юртдошларимиздан бири Хонимжон Ражабова ҳам мана шу мукофотга, юксак эътирофга сазовор бўлди. Ушбу мукофот айни пайтда тумандаги “Баркамол авлод” болалар мактаби директори, шунингдек, Маҳалла ва оилани қўллаб-қувватлаш бўлимида “Бувижонлар мактаби”га раислик қилиб келаётган эл фидойисига Маҳалла тизими ходимлари кунига бағишлаб, Нукус шаҳрида ўтказилган катта тадбирда тантанали равишда топширилди.

Асли мутахассислиги журналист бўлган Хонимжон Ражабова узоқ йиллар туман матбуотида фаолият кўрсатди. Тошкент Давлат Университетини 1979 йилда тугатиб, туман газетаси таҳририятига келганида уни дарҳол махсус мухбир вазифасига ишга қабул қилишди. Ишга чанқоқ, сермаҳсул ва қалами ўткир ижодкор сифатида элга танила бошлаган ёш журналистни оз фурсат ичида таҳририятнинг қишлоқ хўжалик бўлимига мудир қилиб тайинлашди. Маҳоратли журналист таҳририятда маданият бўлими мудири, масъул котибликдан тортиб, муҳаррирликкача бўлган вазифаларда жонбозлик кўрсатиб, самарали меҳнат қилди. Турли мавзуларда қалам тебратиб, халқ дардини, жамиятдаги муаммоларни ёритишга, шу орқали уларга ечим топишга ҳаракат қилди. Сермаҳсул ижоди, ташкилотчилиги, ташаббускорлиги билан нафақат туманда, Қорақалпоғистон, Ўзбекистон миқёсида ҳам малакали журналист, жамият ва юрт фидойиси сифатида элга танилди.

Матбуот соҳасида хизмат қилиб, маънавиятни тарғиб қилишга муносиб ҳисса қўшгани учун уни 1995 йилда Қорақалпоғистон Республикасида хизмат кўрсатган маданият ходими унвони билан тақдирлашди. Жамият ва халқ эътирофи бўлган ушбу унвон Хонимжон Ражабовани янада кўпроқ меҳнат қилишга ундади.

1995 йилда янгидан жорий этилган Амударё туман хотин-қизлар қўмитаси раиси лавозимига муносиб кўрилгани унга янада катта масъулият юклагани боисдан хотин-қизларнинг жамиятдаги нуфузини оширишга доир ишларни ҳал этишга, улар ўртасида ечимини кутаётган кўплаб муаммоларга ечим топишга бор имкониятини сафарбар этди. Ҳар бир оилага, хонадонга кириб бориб, аёл-қизларнинг дардини тинглаган, йиллар давомида ҳар бирининг ташвишига елка тутган, йўл кўрсатиб, турмушига файз олиб кирган Хонимжон Ражабова катта-ю кичикнинг ҳурматига сазовор бўлди. Ушбу лавозимда 17 йил, матбуот соҳасида эса 16 йил меҳнат қилиб, жонкуярлиги, халқпарварлиги, ташаббускорлигини кўрсатди, кўплаб эзгу ишларни амалга ошириб, элда обрў қозонди.

Тиниб-тинчимас Хонимжон опани меҳнат нафақасига чиққанидан кейин 2013 йилда тумандаги “Баркамол авлод” болалар марказига директор қилиб тайинлашди. Ташкил қилинганига ҳали унча кўп бўлмаган, йўлга қўйилиши қийин бўлаётган мазкур соҳада ҳам Хонимжон Ражабова кўп тер тўкишига тўғри келди. Дастлаб ишни марказ учун ажратилган бино ва унинг атрофини обододлаштиришдан бошлади. Машғулотлар ўтказиладиган хоналарни, улардаги мавжуд инвентарларни тартибга келтирди. Ташаббус кўрсатиб, янгидан таъмирлатишга, керакли, зарур жиҳозларни келтиришга, шароитни яхшилашга ҳаракат қилди.

Шундан сўнг, кадрлар салоҳиятини, малакасини оширишга, ёш авлод таълим-тарбияси борасида сифат даражасини, кўрсаткичларни юқори кўтаришга алоҳида эътибор қаратди. Марказда тўгарак турларини кўпайтиришга, уларга кўплаб болажонларни жалб этишга эришилди. Тўгаракларда моҳир устозлардан таълим олиб, ҳунар ўрганган ёшлар туман, Қорақалпоғистон, Ўзбекистон миқёсидаги турли кўрик-танловларда иштирок этиб, ўз иқтидорларини намойиш этдилар ва фахрли ўринлар ғолиблари бўлдилар.

Марказ 2017 йилда Қорақалпоғистонда энг намунали  “Баркамол авлод” болалар маркази деб топилди. Ёш авлод таълим-тарбияси йўлидаги фидойилиги учун марказ директори Хонимжон Ражабова 2019 йилда Қорақалпоғистон халқ  таълими аълочиси унвони билан ҳам тақдирланди.

2020 йилдан “Баркамол авлод” болалар мактаби сифатида фаолият кўрсата бошлаган, айни пайтда обод ва файзли масканга айланган ушбу муассасада эстрада-вокал, либослар дизайни, ментал арифметика, комьпютер саводхонлиги, авиамодел ва автомодель каби 43 та тўгаракларда 1 180 нафар болаларга турли ҳунарлар ўргатилмоқда.

Намунали оила соҳибаси умр йўлдоши Сафарбой Ўрозалиев билан 6 нафар фарзандни жамият корига ярайдиган инсонлар қилиб вояга етказишди. Айни дамда у нафақат 15 нафарга етган ўз невараларининг, балки бутун амударёлик болажонларнинг севимли бувижонига айланди. Туман Маҳалла ва оилани қўллаб-қувватлаш бўлимининг жамоатчилик асосидаги “Бувижонлар мактаби”да ҳам раислик қилиб, ёш авлод тарбиясига ҳисса қўшаётган Хонимжон Ражабованинг барча меҳнатлари давлатимиз томонидан яна бир бор эътироф этилиб, “Маҳалла ифтихори” кўкрак нишонига муносиб деб топилди.

Ўзини, ҳаётини, бутун салоҳиятини халқ хизматига бағишлаган, нафақат маҳалла, балки бутун Амударё ифтихорига айланган фидойи аёл Хонимжон Ражабовани ушбу юксак мукофот янада кўпроқ эзгуликлар қилишга ундайди. Эл-юрт равнақига, жамият ривожига ҳисса қўшишдан асло чарчамайди.

Озода Худойберганова.