СУВНИ БЕҲУДА ИСРОФ ҚИЛМАЙЛИК!

Ҳар қатра сув – ҳаёт каби азиз ва қадрлидир. Сувсиз ҳаёт кечиришнинг асло имкони йўқ.

Сайёрамизда экологик мувозанатни сақловчи сувнинг ҳаётий зарурат эканлиги барчамизга маълумдир. Сув борасидаги исроф ҳаддан ошганлиги оқибатида юз бераётган муаммоларни бугун барчамиз кўриб-билиб, ҳис этиб турибмиз. Оби ҳаёт муаммоси Бирлашган Миллатлар Ташкилоти даражасида 1972 йилдан буён муҳокама қилиниб келинади.

“Қорақалпоқ сув таъминоти” МЧЖ туман филиалида 67 нафардан ортиқ ишчи ходимлар тун-у кун ўз хизмат вазифаларини фидокорона бажариб, аҳолига ичимлик сувини етказиб бермоқдалар. Ёзнинг айни иссиқ, жазирама кунларида ичимлик суви истеъмоли сезиларли даражада ошиб кетмоқда. Аҳоли томонидан ичимлик сувидан экинларни суғориш ҳоллари кўп кузатилмоқда. Бу эса бошқа ҳудудларда ичимлик суви  етказиб беришнинг самарали ташкил этилишига ўзининг салбий таъсирини ўтказмоқда.

Ичимлик сувидан экинларни суғориш ҳамда бошқа маиший мақсадларда фойдаланиш туфайли туман ҳудудида жойлашган кўп қаватли  уй-жойларнинг юқори қаватларига ва марказий тармоқдан сув олувчи чекка ҳудудлардаги аҳолига сув етиб бормаслиги қатор ижтимоий муаммоларга, сувнинг тақсимланиши ва таъминотининг сезиларли даражада издан чиқишига сабаб бўлмоқда.

Шу сабабли ноқонуний фойдаланувчи, исрофгарчиликка йўл қўйиб келаётган истеъмолчиларга нисбатан тегишли тартибда чоралар кўрилмоқда.

Жорий 2021 йилнинг ўтган 5 ойи давомида 20 дан ортиқ улгуржи корхоналар ва аҳоли орасида ичимлик сувидан ноқонуний фойдаланиш ҳолатлари аниқланди. Биргина ўтган даврни, хусусан, қиш, баҳор ва ёз мавсумларини таҳлил қилганимизда қиш мавсумига ўртача бир ойга 70 минг м3  ичимлик суви ишлатилган бўлса, баҳорга келиб, 120 минг.м3 атрофида, ёзнинг иссиқ кунларида 200 минг м3 атрофида ичимлик сув сарфланган. Бу асосан баҳор ва ёз ойларида сувдан ноқонуний фойдаланиш ҳолатлари кўпайганидан далолатдир.

Халқимиз учун қулайлик яратиш мақсадида 2021 йилда 18,9 км. узунликдаги  ичимлик суви тармоғи янгидан ётқизилиб, 6 та сув иншооти янгидан қурилмоқда. Лекин шу ўринда яна бир нарсани айтиш лозимки, ичимлик сувидан, мавжуд жиҳозлардан оқилона фойдаланиш, халқ, жамият мулкини асраб-авайлаш ўрнига айрим фуқаролар томонидан сув қудуқлари қопқоқларини ўғирлаш, синдириб ташлаш, катта-катта юк машиналарининг бу жиҳозларга талофат етказиш ҳолатлари жуда кўп учрамоқда.

Қанчадан-қанча, миллиардлаб сўм маблағ сарфланиб, не-не машаққатлар орқали етказиб берилаётган ичимлик сувини асраб-авайлаш барчамизнинг инсоний бурчимиздир. Истеъмол қилинган сув тўловларини ўз вақтида амалга оширсак, ҳар бир томчисидан оқилона фойдаланиш орқали тежамкорликка ҳисса қўшсак, айни муддао бўлар эди.

А.РАЖАПОВ,

“Қорақалпоқ сув таъминоти” МЧЖ Амударё тумани филиали бошлиғи.