"Чойкўл" сувни чучуклаштириш станциясининг фаолияти ўрганилди
Аҳолини тоза ва сифатли ичимлик суви билан таъминлаш – ижтимоий фаровонликнинг асосий мезони ҳамда халқ саломатлигини сақлашнинг энг муҳим омилидир. Статистик маълумотларга кўра, 2025 йилнинг 1 январь ҳолатига Қорақалпоғистон Республикасида жами 2 миллион 29 мингдан ортиқ аҳоли истиқомат қилади. Шундан 1 миллион 505 мингдан ортиғи, яъни аҳолининг 74,2 фоизи марказлашган ичимлик суви тармоқлари орқали тоза сув билан таъминланган. Шунингдек, ҳудудда оқова сув хизмати билан қамраб олиш даражаси 5,4 фоизни ташкил этади. Бугунги кунда республика бўйича ичимлик сув тармоқларининг умумий узунлиги 7 961 километрни, оқова сув тармоқларининг узунлиги эса 223,2 километрни ташкил қилиб, бу улкан инфратузилма туну кун аҳоли хизматида.
Қорақалпоғистон аҳолисини марказлашган ичимлик суви билан таъминлаш тизими асосан учта йирик сув тозалаш иншооти ҳамда маҳаллий сув манбаларига асосланган. Биринчи ва энг йирик манба – бу суткасига 140 минг куб метр сув тозалаш қувватига эга бўлган "Туямўйин" сув тозалаш иншоотидир. Ушбу стратегик объект Амударёнинг ўнг қирғоғида жойлашган туманларга ҳамда Нукус шаҳрига умумий узунлиги 356 километр бўлган магистрал сув қувурлари орқали ичимлик суви етказиб беради.
Иккинчи йирик манба эса "Тахиатош" сув тозалаш иншоотидир. Суткалик қуввати 60 минг куб метр бўлган ушбу иншоот Амударёнинг чап қирғоғидаги туманлар аҳолисига жами узунлиги 197,6 км бўлган қувурлар орқали сув узатади.
Учинчиси эса бевосита пойтахт аҳолиси учун мўлжалланган "Нукус" сув тозалаш иншоотидир. Марказий тармоқлар етиб бормаган чекка ҳудудлар, шаҳар ва туман марказларидан олисдаги қишлоқ аҳоли пунктларига эса очиқ сув ҳавзалари ва ер ости суви манбаларидан фойдаланувчи 308 та локал сув иншоотлари хизмат кўрсатади.
Амударё туманининг "Чойкўл" овулида жойлашган "Чойкўл" сувни чучуклаштириш станцияси ана шундай аҳоли учун ҳаётий муҳим объектлардан биридир. 2019 йилда давлат дастури асосида қурилган мазкур иншоот ер остидан олинадиган шўр сувни замонавий технологиялар ёрдамида тозалашга ихтисослашган бўлиб, соатига 1 куб метр сув тозалаш қувватига эга. Ушбу ихчам станция овулдаги 80 та хонадонни тоза ичимлик суви билан таъминлаб келмоқда.
Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг Қорақалпоғистон Республикаси ҳудудий инспекцияси масъул ходимлари мазкур станцияда бўлиб, назорат тадбирларини ўтказдилар. Инспекциянинг Ичимлик сувдан оқилона фойдаланиш ва сотишни мувофиқлаштириш ҳамда оқова сув хизматларидан фойдаланиш бўлими мутахассислари нафақат сувнинг вақтида берилишини, балки техник жараёнларнинг барча босқичларини чуқур таҳлил қилдилар.
Ўрганиш давомида мутахассислар томонидан ер ости сувлари таркибидаги туз ва зарарли моддаларни ушлаб қолувчи махсус мембраналарнинг яроқлилик муддати, уларнинг ўз вақтида ювилиши ва алмаштирилиши жараёнлари текширилди. Мутахассислар истеъмолчиларга етказиб берилаётган сув намуналарининг кимёвий ва бактериологик таҳлил натижалари қайд этилган журналларни ҳам ўрганиб, сув сифатининг давлат стандартларига мувофиқлигини ҳам ўргандилар.
Инспекция томонидан олиб борилаётган бундай ўрганишлар чекка ҳудудлардаги аҳолининг ҳам сифатли сув истеъмол қилиш ҳуқуқини кафолатлашга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
